Isaya 39:1-8
-
Antemesha kufuma kuBabiloni (1-8)
39 Hanoyu mpinji mwanta wakuBabiloni, Merodaki Baladani mwana kaBaladani, watemesheli nyikanda nichawaana kudi Hezekiya,+ muloña watiyili nawu wadiña wakata nawa nakoli.+
2 Hezekiya wayitambwilili* namuzañalu nawa wayilejeli itala dindi mwahembeleleñayi maheta,+ dikwila nawu siliva, wuru, manji abalisamu nimanji amakwawu alema wuseya, yitwa yindi yejima yanjita niyuma yejima yadiña muyisweku yindi yayuma yalema. Kwosi chuma nichimu chabulili kuyilejayi Hezekiya mwitala* dindi nimuwanta windi wejimaku.
3 Hanyima yachumichi, kaprofwetu Isaya weñilili mwadiña Mwanta Hezekiya nawa wamwihwili nindi: “Indi awa amayala anahoshi nawudi nawa anafumini kudihi?” Dichi Hezekiya wamwakwili nindi: “Anafumi kwakulehi, kuBabiloni.”+
4 Kuhiñahu, wehwili nindi: “Yumanyi yamonawu mwitala* deyi?” Hezekiya waakwili nindi: “Amona yuma yejima yidi mwitala* dami. Kwosi chuma nichimu chamuyisweku yayuma yalema chinabula kuyilejaku.”
5 Dichi, Isaya wamulejeli Hezekiya nindi: “Tiyaku chinahoshiyi Yehova wamazaza nindi,
6 ‘Tiyaña! Mafuku anakwinza nawa yuma yejima yidi mwitala* deyi niyuma yejima yatentekawu ankakulula jeyi kushika nikulelu, akayisenda kuBabiloni. Kwosi chuma chakashalahuku,’+ dichinahoshiyi Yehova.+
7 ‘Nawa anyaneyi awamayala amakwawu iwakavwala akayisenda kulonda akekali ayilolu amuchota muchipañu chamwanta wakuBabiloni.’”+
8 Hohenohu, Hezekiya wamwilili Isaya nindi: “Izu daYehova diwunahoshi dadiwahi.” Kufumahu, wabombelelihu nindi: “Muloña mumpinji yakuhanda* kwami kwakekalaña kuwunda nikushakama kumatu kwamwena nzo-o.”+
Tumazu twaheshina
^ MuchiHeberu, “wayizañaleleli.”
^ Hela “chipañu.”
^ Hela “chipañu.”
^ Hela “chipañu.”
^ Hela “chipañu.”
^ MuchiHeberu, “mafuku.”
