Isaya 41:1-29
41 “Enu yituutu, mwenenu nzo-o muntiyilili;*Nyuza yiikali nañovu cheñi.
Yilekenu yinzi; nawa yilekenu yihoshi.+
Twayenu tubulakani hamu kulonda niyisompeshi.
2 Hinyi wunanyamuni muntu kufuma kwaselelaña itena,*+Nakumutambika mukuloña kulonda enzi kunyendu Yindi,*Kulonda amwinki nyuzaNikumukwasha kulonda emiki anyanta mushindu?+
Hinyi wayilishaña kwikala lunkuñu nampoku yindi yakabali,Nawa wayipalañeshaña nawuta windi wamukunji neyi nsaachi yinakulelolawu?
3 Wayikumpishaña chakadi wakumukañeshaMunjila mwabula kudatahu dehi nyendu yindi.
4 Hinyi wunakoñi nawa wuneli chumichi,Chakutambika makiñu kufuma kukutachika?
Ami Yehova, yami Watachi;+Nikumakiñu akukumishaku, diyowenami.”+
5 Yituutu yinamoni chumichi nawa yinatiyi woma.
Insa jeseki jinatachiki kuzaala.
Jinadipompeshi hamu nawa jinakwinza.
6 Anakudikwasha wumu namukwawuNikuleja manakwindi nindi: “Dikoleshi.”
7 Dichi mukawukalawenu nakukolesha mukakuzata nayikuñu;+Muntu wunakwesekeja namusensiNakukolesha muntu wunakuchilila heshiki.
Nakutena chuma chinalamikiwu nindi: “Chinawahi.”
Kufumahu anachikwatishi nanyisumali kulonda chakabuli kuholoka.
8 “Ilaña eyi Isarela, wudi kambuñami,+Eyi Yakoba, innatondi,+Mwana* kebwambu dami Abarahama,+
9 Eyi inasendeli kufuma kunsa jeseki,+Nawa eyi inatambikili kufuma kumaluña adu akwakulehi.
Nakulejeli nami, ‘Yeyi kambuñami;+Nakutondi; nakukaani wanyi.+
10 Bayi wutiya womaku, muloña ami nidi naneyi.+
Bayi wakamaku, muloña ami nidi Nzambi yeyi.+
Nakakukolesha, mwamweni, nakakukwasha,+Chalala nakakukwata nachikasa chami chachidiilu chakuloña.’
11 Tiyaña! Antu ejima anakukuhilila akayitiyisha nsonyi nikuyijilumuna.+
Ejima azuñaña naneyi akayijilumuna nawa akajiya.+
12 Wakakeñakeña antu ejima akulwishaña, ilaña hiwakayiwanaku;Antu akuzuñishaña njita akekala neyi yuma yabulaku, yabulahu dehi kwikalaku.+
13 Muloña ami, Yehova Nzambi yeyi, nakukwati kuchikasa cheyi chachidiilu,Yami inakukuleja nami, ‘Bayi wutiya womaku. Nakakukwasha.’+
14 Eyi muzambu* Yakoba,+ enu aIsarela, bayi wutiya womaku.Ami nakakukwasha,” dichinahoshiyi Yehova, Nkuuli yeyi,+ Wajila waIsarela.
15 “Tiyaña! Nakwilishi kwikala chuma chakuhula nachu,+Chitwa chachiha chakuhula nachu chikweti mazewu kuyedi.
Wakadatola jimpidi nikujichikaNawa wakelisha tupidi kwikala neyi muzuñu.
16 Wakayipepa,Nawa mpepela yakayilelula;Mpepela yeneni yakayipalañesha.
Wakazañalela mudi Yehova,+Nawa wakadisambila mudi Wajila waIsarela.”+
17 “Antu akaankila niatuzweñi anakukeñakeña menji, ilaña kuyiwana nehi.
Madimi awu anoomi nampwila.+
Ami Yehova, nakayikwasha.+
Ami Nzambi yaIsarela, hinakayuumba chisayikilaku.+
18 Nakelisha tuloña tukahiti hewulu datupidi+Nituseloki muyana yachinekineki.+
Nakabalumuna isaña kwikala ijiya damenji mudi matetiNawa mpata yakadi menji kwikala tuseloki twamenji.+
19 Nakatumba mutondu wamusida muchinkalampata,Muzenzi, chibuubu nikalafulu.+
Nakatumba mutondu wamunjunga muchana chachinkalampata,Hamu namutondu waashi* nimutondu wasayipresi,+
20 Kulonda antu ejima akamoni nikwilukaNawa akatiyilili nikutiyishishaNawu chikasa chaYehova dichineli chumichi,Nawa nawu Wajila waIsarela diyi wunachikojeji.”+
21 Yehova nahoshi nindi: “Shimunenu muloña wenu.”
Mwanta waYakoba nahoshi nindi: “Shimunenu wunsahu wenu.”
22 “Hanenu wunsahu nawa mutuleji yuma yakamwekana.
Tulejenu yuma yakunyima,*Kulonda tuyitoñojokihu nikwiluka yuma yafuminimu.
Hela tulejenu yuma yinakwinza.+
23 Tulejenu yuma yakamwekana kumbidi,Kulonda twiluki netu mudi anzambi.+
Ilenuhu chuma chimu, chachiwahi hela chatama,Kulonda tuhayami chitwachimona.+
24 Tiyenu! Enu mudi yuma yabula kwikalaku,Nawa nyidimu yenu yamukunkulwayi.+
Muntu watondaña kudifukula kudi enu wawuzondu.+
25 Ami nanyamuni muntu kufuma kukabeta kakuchimunswa, nawa wakenza,+Owu wakafumina kwaselelaña itena*+ wakatambika hejina dami.
Wakadatola anyuuli* neyi kwiji nakudatola ndambu,+Neyi kañemi chadatolañayi ndambu.
26 Hinyi washimwini chumichi kufuma kukutachika, kulonda tuchiluki,Hela kufuma kumashiita, kulonda tuhoshi netu, ‘Nahoshi mwalala’?+
Mwamweni, kwosi wachibidikilihuku!
Kwosi wachishimwinihuku!
Kwosi watiyilihu chuma chidi chejima kudi enuku!”+
27 Yami nadiña watachi kumuleja Ziyona nami: “Tiyaña! Diyi iyi!”+
Nawa nakatemesha mukakushimuna nsañu yayiwahi kuYerusalema.+
28 Natwalekelihu kutala, ilaña hikwadiña muntu hela wumuku;Hakachi kawu hihadiña hela wumu wakunleja maanaku.
Nawa natwalekelihu kuyileja nami añakuli.
29 Tiyenu! Wejima wawu hiyuma yakulumbisha hohu.*
Nyidimu yawu yamukunkulwayi.
Yifwikija yawu yayikuñu* himpepela hohu nawa hiyuma yabulaku.+
Tumazu twaheshina
^ Hela “mwenenu nzo-o kumesu ami.”
^ Hela “kumusela.”
^ Dikwila nawu, nakumukalakela Yena.
^ MuchiHeberu, “lubutu.”
^ Dikwila nawu, wabula kukiñewa nawa wabula kulema.
^ Iwu himutondu weneni wakulaña nakushika kujimita 15. Wukweti mafu ovwaha amenji amatamba ninyitayi yatookoloka.
^ MuchiHeberu, “yatachi.”
^ Hela “kumusela.”
^ Hela “ayinlonda awanyuuli.”
^ Hela “hiyuma yabulaku.”
^ Hela “ankishi akweñununa.”
