Isaya 44:1-28
44 “Tiyaña, eyi kambuñami Yakoba,Nineyi, eyi Isarela, innatondi.+
2 Yehova,Wakutuñili nawa wakuwumbili,+Wunakukwashi kufuma tuhu mwivumu,* nahoshi nindi:
‘Bayi wutiya womaku, eyi kambuñami Yakoba,+Nineyi Yeshuruni,*+ innatondi.
3 Muloña nakahuñunwina menji hadi wunatiyi mpwila*+Nawa tuloña twamenji nakatwilisha tukahiti heseki dooma.
Nakahuñunwina spiritu yami hadi anyaneyi*+Ninkisu jami hadi amuchisaka cheyi.
4 Nawa akatutuka neyi munyenvu,+Neyi nyitondu yidi kwakwihi natuloña twamenji.
5 Wumu wakahosha nindi: “Ami nidi waYehova.”+
Mukwawu wakadituumba ijina daYakoba,Nawa mukwawu wakasoneka hachikasa chindi nindi: “Nidi wambala waYehova.”
Nawa wakaditena nejina daIsarela.’
6 Ichi dichinahoshiyi Yehova,Mwanta waIsarela+ nawa Nkuuli yindi,+ Yehova wamazaza nindi:
‘Ami yami watachi nawa yami wakukumisha.+
Kwosi Nzambi mukwawuku, chiña ami hohu.+
7 Hinyi wesekana nanami?+
Mulekenu abidiki, ashimuni nawa amwekeshi chumichi kudi ami!+
Kufuma tuhu hinashiliku antu akushankulu,Yilekenu ashimuni yuma yinakwinzaNiyuma yikukeña kumwekana.
8 Bayi mufwa mutentuku,Nawa bayi mudihomba nawomaku.+
Komana wejima wenu hinayilejeleli dimu chumichi nikuchibidikaku?
Yenu ayinsahu jami.+
Kudihu Nzambi mukwawu kubadika ami?
Kwosi, kwosi Ilola+ dikwawuku; kwosi hela wumu inelukaku’”
9 Ejima abazaña ankishi akubaza, amukunkulwayi,Nawa ankishi jawu akeñeshawu akayikwasha wanyi.+
Neyi chochidi ayinsahu jawu, niwena* hiyamonaña hela kwiluka chumaku,+Dichi ejima ayibazaña akayitiyisha nsonyi.+
10 Hinyi wukukeña kutuña nzambi hela kweñununa nkishi wachikuñu*Wukubula kumukwasha?+
11 Tiyenu! Amabwambu jindi ejima akayitiyisha nsonyi!+
Akawukalawenu ejima hiyantu hohu.
Ejima wawu adipompeshi hamu nawa emani hamaluña awu.
Wejima wawu akayitiyisha woma ninsonyi.
12 Muchiji wazatishaña chitwa chindi hakuzakasa chikuñu chidi hamakala.
Wachichilaña nanyisensi,Kuzatisha chikasa chindi chañovu.+
Kufumahu, watiyaña nzala nawa ñovu yamumanaña;Hanwaña menjiku nawa wazeyaña.
13 Mukakusoñasoña watandumunaña mwonji wakupima nachu, wafunjekaña nekala chuma chinakukeña kusoñayi.
Wachiwahishaña nekandu nikuchifunjeka nachitwa chakufunjeka nachu.
Wachisoñaña neyi chamwekanaña muntu,+Nikuchiwahisha chiwahi neyi muntu,Nakuchiisha mwitala.+
14 Kudi muntu wukweti mudimu wakutema nyitondu yanyisida.
Wasakulaña muchidi wamutondu wumu, mukula,Nawa wawulekaña nakukulila hamu nanyitondu yikwawu yamwisaña.+
Watumbaña mutondu walaureli, nawa nvula yawukulishaña.
15 Kuhiñahu, wekalaña nchawa yazatishañayi muntu kukwatisha nachu kesi.
Wanonañahu nchawa yikwawu yakwota;Wabutulaña kesi nakwochahu mankendi.
Ilaña wabazañamu ninzambi nakudifukulaku.
Wasoñañamu nkishi, nawa wadibukaña kudi yena.+
16 Chibalu chimu chanchawa wachishaña hakesi;Haniyi nchawa wochañahu mbiji yadañayi, nawa wekutaña.
Nawa wotaña kesi nakuhosha nindi:
“Eyo-o! Natiyi iyena chinnamoni tuhu kesi.”
17 Ilaña nchawa yinashali wabazañamu nzambi, nkishi windi wakusoña.
Wadibukaña kudi yena nawa wadifukulañaku.
Walombaña kudi yena nakuhosha nindi:
“Ñamwini, muloña eyi yeyi nzambi yami.”+
18 Kwosi chuma chelukawuku, hiyekala nakanañachima kakutiyishisha yumaku,+Muloña mesu awu akwenzela nawa hiyakutwesha kumonaku,Nawa nyichima yawu yidana kashinshi.
19 Kwosi watoñojokaña mumuchima windiHela kwiluka hela kutiyishisha, nakuhosha nindi:
“Chibalu chikwawu chanchawa nachocheli mukesi,Nawa hamakala achu nochelihu mankendi nimbiji yakuda.
Komana nchawa yinashalihu niyibalumuni chuma chawuzondu?+
Komana nidifukuleña kwikunji?”*
20 Wadaña mawuti.
Muchima windi wadimbanaña wunamusenwishi munjila.
Hakutwesha kudamwina yomweniku,* hela kuhosha nindi:
“Komana muchikasa chami chachidiilu mwosi makudi tahindi?”
21 “Eyi Yakoba, nawa eyi Isarela, anukaku yumiyi,Muloña eyi wudi kambuñami.
Nakuwumbili, nawa wudi kambuñami.+
Eyi Isarela, nakakuvulamena wanyi.+
22 Nukujimañesha yiluwa yeyi neyi kwiji neevu+Ninshidi jeyi neyi kwiji neevu diyila bwi-i.
Funtaku kudi ami, muloña nukukukuula.+
23 Bidikenu namuzañalu, enu mawulu,Muloña Yehova nakoñi!
Dikuwenu namuzañalu, enu maluña eseki anekuka!
Bidikenu muloña wamuzañalu, enu jimpidi,+Eyi isaña ninyitondu yejima yidimu!
Muloña Yehova namukuuli Yakoba,Nawa namwekeshi lubanji lwindi muIsarela.”+
24 Yehova, Nkuuli yeyi,+Wakuwumbili kufuma tuhu hiwadiña mwivumu, nahoshi nindi:
“Yami Yehova, waleñeli yuma yejima.
Yami natandumwini mawulu,+Nawa yami natandumwini niiseki.+
Hinyi wadiña nanami?
25 Yami naluwañeshaña yinjikijilu yawantu ahoshaña yuma yamukunkulwayi,*Nawa yami nelishaña akakuhoña kwila yuma neyi ayisupi;+Yami naluwañeshaña akamaanaNikubalumuna kwiluka kwawu kwikala wusupi;+
26 Yami nelishaña izu dakambuñami kwikala dalalaNawa yami nashikijaña chikupu yuma yashimwinañawu chadimu antemesha ami;+Yami nahoshaña hadi Yerusalema nami, ‘Mwakashakama antu,’+
Nihadi nyisumba yamuYuda nami, ‘Akayituñulula,+Nawa nakawahisha yuma yindi yakisañeniwu’;+
27 Yami nalejaña manyiñi nami, ‘Umenu,Nawa nakomisha tuloña tweyi twejima’;+
28 Yami nahoshaña hadi Kirusi+ nami, ‘Hikabiña kami,Nawa wakashikija chikupu nkeñelu yami yejima’;+Yami nahoshaña hadi Yerusalema nami, ‘Akamutuñulula,’
Nihadi tembeli nami, ‘Akaala chikuku cheyi.’”+
Tumazu twaheshina
^ Hela “kufuma tuhu kukuvwalika.”
^ Daya mukwila nawu, “Woloka,” hinkumbu yaIsarela yakumulemesha nachu.
^ Hela “ituña dakadi menji.”
^ MuchiHeberu, “mbutu.”
^ Dikwila nawu, ankishi.
^ Hela “chifwikija chakweñununa.”
^ Hela “ikunji dooma.”
^ Hela “wumi windi.”
^ Hela “atuprofwetu akutwamba.”
