Isaya 5:1-30
5 Tali nimwimbili nkeñi yamiKamina kanakuhosha hadi nkeñi yami nihetempa dindi danyivinyu.+
Nkeñi yami wadiña netempa danyivinyu kukapidi kakweti wushi.
2 Wadidimini nakufumishamu malola.
Watumbilimu muvinyu wawuwahi wuchinana,Watuñilimu kaposhi hakachi,Nawa washilimu wukamwinu wavinyu.+
Kufumahu, wadiña nakukuhwelela nindi mwakasoña nyivinyu yayiwahi,Ilaña mwasoñeli nyivinyu yatama hohu.+
3 “Ichi dinu, enu antu amuYerusalema niamayala akumuchidi waYuda,Mwani sompenu hakachi kanami netempa dami danyivinyu.+
4 Chumanyi chikwawu chinadi kwila mwitempa dami danyivinyuChinnabuli kwila?+
Ami nadiña nakukuhwelela nyivinyu yayiwahi,Hanu dinu, munasoñelidi nyivinyu yatama hohu?
5 Dichi, lekenu niyilejiChuma chinukwila itempa dami danyivinyu:
Nukufumishaku ikoli dinakolekeliku,Nawa akudocha.+
Nukuhumuna mpwembu yadu yamalola,Nawa akudidatola.
6 Nukudilisha dishali kwamahembi hohu;+Hiyakadikunkula hela kudidimaku.
Mwakamena yiputa yanyiña nimatahu,*+Nawa nakaleja mavu akabuli kunokeshelamu nvula.+
7 Muloña itempa danyivinyu daYehova wamazaza hiyantu amwitala daIsarela;+Amayala akumuchidi waYuda hiiha dakeñeliyi nankashi.
Wadiña nakukuhwelela wuñanji,+Ilaña talenu! kwadiña wuñanji waheña;Wadiña nakukuhwelela kuloña,Ilaña talenu! kwadiña hohu kudila kwanowu adiña muyihuñu.”+
8 Oyihuñu yakamonawu antu anuñaña itala kwitala dikwawu+Nawa anuñaña iha kwiha dikwawu+Sampu maluña ejima anamaniNkumininaku, mwashalaña hohu nkawenu heluña!
9 Yehova wamazaza nasanyiki mumatu amiNindi matala amavulu, hela chakwila amaneni nawa alubanji,Akekala chuma chakuhayama chikupu,Chakadi muntu wakashalamu.+
10 Muloña mumahekita awana amatempa anyivinyu mwakafuma hohu mulondu* wumu,Nawa muhomeri* yimu yambutu mwakafuma ifa*+ yimu hohu.
11 Oyihuñu yakamonawu antu amenekelaña walwa,+Anwaña kushika nimelela sampu vinyu yinayisheteshi!
12 Iku akweti tudada niyisanji yanyonji,Ñoma yanyanya,* ipeleli nivinyu hayawija yawu;Ilaña kumudimu waYehova ashañaku maana wanyi,Nawa hiyamonaña mudimu wamakasa indiku.
13 Dichi antu jami akaya muwunkoliMuloña wakubula kwiluka;+Antu jawu alema akafwa nzala,+Nawa antu jawu ejima akafwa mpwila.
14 Dichi Ijamu* dinaditoheshiNawa dinaasami chikupu mukanwa;+Nawa antu jindi alema, izaza dawantu jindi aletaña ipumba niantu jindi azañalalaña namapumbaAkaya mwenomu.
15 Nawa muntu wakadibuka heseki,Muntu akamuzozesha,Nawa mesu amuntu wadinka wanta akayizozesha.
16 Yehova wamazaza akamutuumbakesha nawunsompeshi* windi;Nzambi walala, Wajila,+ wakadijilika yomweni nakuloña.+
17 Nawa anyana kamukoku akada neyi kwiji anakudiila mwiluña mwadiilañawu;Añiinza akadiila mumahembi awanyama akudiisha chiwahi.
18 Oyihuñu yakamonawu antu akokaña yiluwa yawu nanyonji yakudimbanaNawa akokaña nshidi jawu nanyonji yakwitemba;
19 Owu ahoshaña nawu: “Mulekenu Nzambi anyakeshi mudimu windi;Awuzati swayi-swayi kulonda tuwumoni.
Lekenu nkeñelu* yaWajila waIsarela yizatikiKulonda tuyiluki!”+
20 Oyihuñu yakamonawu antu ahoshaña nawu yayiwahi yatama, yatama nawu yayiwahi,+Antu amonaña mwidima nawu chejeji, chejeji nawu mwidimaAntu atenaña yuma yalula nawu yatowala, yatowala nawu yalula!
21 Oyihuñu yakamonawu antu adimonaña nawu akweti maanaNawa adimonaña nawu ashinshika!+
22 Oyihuñu yakamonawu antu aya mpuhu mukunwa vinyuNiantu elukisha kubombela yuma yimu kuwalwa,+
23 Antu ombañaku muntu watama namajika kanwa*+Nawa abulaña kumusompela muntu waloña mwawuñanji!+
24 Dichi, neyi chochaña muzuzu wakesi nsaachiNawa neyi chahaña matahu oma nakesi,Dichikatoka ninyiji yawu,Dichikaleluka niwuluya wawu neyi wuña,Muloña adiwili nshimbi* jaYehova wamazazaNikusawula izu daWajila waIsarela.+
25 Dichinaleteshi kuzuwa kwaYehova kuvwakukili antu jindi,Nawa wakayolwela chikasa chindi nakuyibabesha.+
Mpidi jikakanka,Nawa yibimbi yawu yikekala tuhu neyi yuma yawuzondu yidi munyikwakwa.+
Hamuloña wayuma yejimiyi, kuzuwa kwindi hikunafwomokiku,Ilaña chikasa chindi chichidi choloka kulonda chiyibabeshi.
26 Muza wudi kwakulehi+ nawushimikili chinjikijilu;*Nayimbili muloji kulonda enzi kufuma kunsa jeseki;+Dichi talenu! anakwinza lufuchi lwalweni.+
27 Hakachi kawu hosi anazeyi hela anakuhukanaku.
Hosi wunakunoñoka hela wunakaamiku.
Nyishipi yamumbunda jawu hiyinazubulikuHela nyiya yankwabilu yawu hiyinaketokiku.
28 Nsewu jawu jejima jatwa,Nawa mata awu anyikunji ejima akwevula dehi.*
Yikwa yatuwalu twawu yidi neyi malola,Nawa tufumbu twawu tudi neyi mpepela yeneni.+
29 Anakubuluma tuhu neyi mutupa;Abulumaña neyi nyenzi yanyitupa.*+
Akubuluma nezu damwishina nakukwata chuma chikudawuNawa akuchisenda chakadi wakuchamwina.
30 Hanodu ifuku, akachibulumina nezu damwishinaNeyi lushindu lwakaluñalwiji.+
Muntu wejima wakatala mwituña wakamona hohu mwidima waweni;Nichejeji chikajimañana muloña wamavu.+
Tumazu twaheshina
^ Hela “nseela.”
^ Talenu Nsañu Jikwawu B14.
^ Talenu Nsañu Jikwawu B14.
^ Talenu Nsañu Jikwawu B14.
^ Iyi hiñoma yanyanya kwakudekawu tuyikuñu nawa neyi ayinyinkesha yavumaña neyi manchakayi.
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela “wuñanji.”
^ Hela “kufuukula; kufumba.”
^ Hela “maseleka.”
^ Hela “kuleja.”
^ Hela “chishimi chachinjikijilu.”
^ Hela “anakobimu dehi.”
^ Hela “nyenzi yanyitupa yawamayala.”
