Isaya 50:1-11
50 Yehova nahoshi nindi:
“Indi mukanda wakuseña nachu+ mama yenu inahañili, wudi kudihi?
Hela akakunkongwesha amu yadihi kunayilandishili?
Tiyenu! Nayilandishili muloña wayiluwa+ yenu enu aweni,Nawa muloña wakwila mwafumpili nshimbi, dichinamuhañilili mama yenu.+
2 Hanu dinu, muloñadi chinabulili kuwanahu muntu hela wumu hinenjili?
Muloñadi chikwabulilili muntu wakuñakula chinatambikili?+
Komana chikasa chami chachihi chakwila chikañanyi kukuula,Hela nidana ñovu yakwamwina?+
Tiyenu! Nomishaña kaluñalwiji+ nakuzuwa kwami;Nawa nelishaña tuloña kwikala chinkalampata.+
Inshi jekalamu jatokaña muloña wakubula menji,Nawa jafwaña muloña wampwila.
3 Mawulu nayivwikaña mwidima waweni,+Nawa nayibutaña yisasa.”
4 Yehova Mwanta Wabadika nanyinki idimi dawantu adizishawu,*+Kulonda niiluki chakwakula* muntu wazeya nezu datelela.*+
Wanhindwishaña ntetemena-hintetemena;Wahindwishaña itu dami kulonda nitiyilili neyi chatiyililaña antu adizishawu.+
5 Yehova Mwanta Wabadika nenzununi itu dami,Nawa hinadikañiliku.+
Hinayili munjila yacheñiku.+
6 Nahanini nyima yami kudi antu añeteleñaNimabuta ami kudi antu ambwitili wevu.
Hinabutili kumesu ami kuchiina yuma yakutiyisha nsonyi nimazeñiku.+
7 Ilaña Yehova Mwanta Wabadika wakankwasha.+
Dichinakabulila kutiya nsonyi.
Dichinaleteshi nikoleshi kumesu ami neyi ilola,+Nawa neluki nami hiyakantiyisha nsonyiku.
8 Owu wantenaña nindi naloña wudi kwakwihi.
Hinyi wunateli kunyinka muloña?*+
Enzi tudimoni.
Hinyi wudi namuloña nanami?
Enzi anwani.
9 Tiyenu! Yehova Mwanta Wabadika wakankwasha.
Anyi akanfwisha namuloña?
Tiyenu! Wejima wawu akafwa neyi chakuvwala.
Akayida kudi kabubu.
10 Hinyi hakachikenu wamutiyaña Yehova womaNawa watiyililaña kwizu dakambuñindi?+
Hinyi wunendi mumwidima wasweja, chakadi chejeji chidi chejima?
Akuhweleli mwijina daYehova nawa ashindameni hadi Nzambi yindi.
11 “Tiyenu! Enu ejima munakubutula kesi,Nakwilisha nsasi kutotoka,Endenu muchejeji chakesi kenu,Munsasi yamuzuzu wumunakwatishi.
Ichi dichuma chimwakatambula kuchikasa chami:
Mwakakaama muyikatu yayeña chikupu.
Tumazu twaheshina
^ MuchiHeberu, “nezu.”
^ Hela hekwawu, “kukolesha.”
^ Hela “idimi dadizishawu chiwahi.”
^ Hela “kudilwisha nanami.”
