Isaya 58:1-14
58 “Tambikaku nezu dañovu; bayi wulekaku!
Nyamunaku izu deyi neyi luseñu.
Bidikaku kudi antu jami kudikaña kwawu,+Kudi amwitala daYakoba wubidiki nshidi jawu.
2 Ankeñakeñaña hefuku-hefuku,Nawa afwilaña chikupu kwiluka njila jami,Neyi kwiji himuza wakoñeleña yuma yaloñaNawa neyi kwiji hiyakaaninihu wuñanji waNzambi yawuku.+
Añilaña nawu niyisompeli mwaloña,Neyi kwiji anakufwila kuswina kwakwihi naNzambi:+
3 ‘Muloñadi chiwabulilaña kumona neyi tushakama chakadi kuda?+
Nawa muloñadi chiwabulilaña kushaku muchima neyi tunakudikabisha mulwetu?’*+
Muloña hefuku dimwashakamaña chakadi kuda, mwafwilaña yuma yakuditiyisha enu aweni kuwaha,*Nawa mwakabishaña antu ayizatilaña nyidimu yakola.+
4 Chimwashakamaña chakadi kuda mwafumaña kubobola nimadombu,Nawa mwadetaña nankonyi jakutama.
Kwila mushakama chakadi kuda neyi chimunakwila lelu nakukuhwelela nenu izu denu dikutiyakana mwiwulu nehi.
5 Komana kushakama chakadi kuda kunayileja nami mwileña kwatela kwikala ñana,Neyi hiifuku dakudikabisha muntu yomweni,*Dakunoñamika mutu windi neyi matahu amalehi,Dakukaama hayisasa nimumawuti?
Komana chumichi dichimwatenaña nenu kushakama chakadi kuda nawa nenu ifuku dadiwahi kudi Yehova?
6 Inehi, iku dikushakama chakadi kuda kunayileja nami mwileña:
Kufumisha mpompa jakutama,Kukasununa nyonji yampaanda,+Kusubula muntu anakukabishawu,+Nikukotola mpaanda yejima hakachi;
7 Hikwanzañana yakuda yeyi namuntu wudi nanzala,+Kutambika kazweñi nawa wabula itala kwitala deyi,Kuvwika muntu iwunamoni neyi wudi nawuvu,+Nikubula kufutalela ntaña yeyi iwasemuka nindi.
8 Kuhiñahu, chejeji cheyi chakatoñeka neyi kumacha,+Nawa akakuuka swayi-swayi.
Kuloña kweyi kwakatwamina kumbidi yeyi,Nawa kulema kwaYehova dikwakakuhembaña hanyima yeyi.+
9 Kufumahu, wakatambika nawa Yehova wakaakula;Wakalomba wukwashu, yena wakahosha nindi, ‘Yamonu!’
Neyi wakafumisha mpaanda mukachi keyiNawa wuleka kwinyeka nyinu yeyi nikuhosha kasawuntu,+
10 Neyi wuyinka antu anatiyi nzala yuma yiwakeña*+Nawa wikutisha antu anakabakani,*Chejeji cheyi chakatoñeka nimumwidima,Nawa mwidima weyi wakekala neyi itena mwiwulu.+
11 Yehova wakakulombolaña mpinji yejimaNawa wakakwikutisha nimumpata yoominina;+Wakakolesha mafwaha eyi,Nawa eyi wakekala neyi itempa dakutukumwina chiwahi,+Neyi kaseloki kakweti menji abulaña kuuma.
12 Muloña waneyi, akatuñulula yuma yakisika yakushankulu,+Nawa eyi wakawahisha yikuku yamakiñu akunyima.+
Akakutena nawu mukakuwahisha mpwembu jahumoka,+Mukakuwahisha nyikwakwa kwakutuñila antu.
13 Neyi hamuloña waSabata wuleka* kufwila yuma yakuditiyisha eyi aweni kuwaha* hefuku dami dajila+Nawa wutena Sabata neyi himuzañalu wasweja, ifuku dajila daYehova, ifuku datela kulemeshawu,+Nawa wudilemesha idi ifuku chatela wufwileña yuma yakuditiyisha eyi aweni kuwaha nikuhosha mazu amukunkulwayi,
14 Wakazañalela chikupu mudi Yehova,Nawa nakakukandamisha hayinañanaña yaheseki.+
Nakakukojeja kuda hawuswana wankakulula yeyi Yakoba,+Muloña kanwa kaYehova dikanahoshi.”
Tumazu twaheshina
^ Hela “mawumi etu.”
^ Hela “yakudizañalesha.”
^ Hela “wumi windi.”
^ Hela “yakeñaña wumi weyi.”
^ Hela “mawumi anakabakani.”
^ MuchiHeberu, “wufuntisha mwendu weyi hanyima.”
^ Hela “yakudizañalesha eyi aweni.”
