Isaya 8:1-22
8 Yehova wanlejeli nindi: “Nonaku ilola deneni+ dawubasa wusonekihu nansonekeshu* neyi, ‘Maheri-shalali-hashi-bazi.’*
2 Nawa inakukeña ayinsahu ashinshika, kapristu Uriya+ niZekariya mwana kaYeberekiya, asoneki nawu niwena adiña hohu hiwasonekaña.”
3 Kufumahu, nakaamini* nakaprofwetu wamumbanda,* dichi wemitili nawa mukuhita kwampinji wavweli mwana weyala.+ Kuhiñahu, Yehova wanlejeli nindi: “Mutuumbi neyi Maheri-shalali-hashi-bazi,
4 muloña henohu iwu kansi weyala kanda eluki kutambika nindi, ‘Tata!’ nawa nindi ‘Mama!’ yuma yamuDamakasa niyuma yakupuupa muSamariya akayisenda iku mwanta wakuAsiriya nakutalaku.”+
5 Yehova wahosheli nanami cheñi nindi:
6 “Chineli awa antu anakaani menji aShilowa*+ anakuhita chiwahi chovu-chovuNawa anakuzañalala muloña waRezini nimwana kaRemaliya,+
7 Dichi tiyenu! Yehova wakayiletelaMenji amuKaloña* amavulu nankashi nawa akweti mpupa,Dikwila nawu mwanta wakuAsiriya+ nikulema kwindi kwejima.
Wakenza nakuhita hewulu datuloña twindi twejimaNawa wakenzesha yikumu yindi yejima
8 Nawa wakakumpula yuma yejima muYuda.
Wakenzala nawa wakahita nakushika munshiñu;+Mpuula jindi jakutandumuna jikabuta muwihi wetuña deyi,Eyi Emanuweli!”*+
9 Enu antu, katishanenu, ilaña akayichika chiki-chiki.
Tiyililenu, enu antu ejima ahamaseki mwashakama kwakulehi!
Diloñeshenu kuzuña njita,* ilaña akayichika chiki-chiki!+
Diloñeshenu kuzuña njita, ilaña akayichika chiki-chiki!
10 Kasenu kafuta, ilaña akakikasununa!
Hoshenu chuma chimunakukeña, ilaña hichikazatikaku,Muloña Nzambi wudi nanetu!*+
11 Nachikasa chindi chañovu chidi hadi ami, ichi dichanlejeliyi Yehova hakunsoñamisha kulonda nileki kulondela yuma yelañawu awa antu:
12 “Bayi muhosha nenu kudi kafuta muloña wakwila awa antu anahoshi nawu kudi kafutaku!
Bayi muchiina chuma chachiinañawuku;Bayi muzaala ochu chumaku.
13 Yehova wamazaza, diyi Hohu imwatela kumona nenu wajila,+Diyi Hohu imwatela kuchiina,Nawa diyi Hohu watela kuyizaalisha.”+
14 Wakekala neyi iluña dajila,Ilaña neyi ilola dakuhumakuNawa neyi ilola dakuhukanaku+Matala ejima ayedi aIsarela,Neyi muhetu nawa neyi ikoñaMwakufwa antu amuYerusalema.
15 Antu amavulu akahukana nawa akadimbuka nakudikotola;Akafwa mumuhetu nawa akayikwata.
16 Wunsahu wunasonekiwu wiikali wakuvuñeka;Lamikaku nshimbi* nawa wuyihani hakachi kawatumbanji twami!
17 Nukumuchiñililaña* Yehova,+ wunasweki chamesu indi kuchiina kumumona kudi amwitala daYakoba,+ nawa nukukuhwelela mudi yena.
18 Tiyenu! Ami nianyana ananyinkiyi+ Yehova tudi neyi yinjikijilu+ nawa neyi yihayamisha muIsarela yinafumi kudi Yehova wamazaza, washakamaña haMpidi yaZiyona.
19 Nawa neyi ayila nawu: “Yenu mwihuli kudi akakuhoña nawandemoni hela kudi akakushimuna yuma yakumbidi owu ashawutaña nikunyinyita,” komana antu hiyatela kwihula kudi Nzambi yawuku? Komana atela kwihwilaku antu amomi kudi antu afwa?+
20 Ilaña, atela kutala munshimbi nimuwunsahu wunasonekiwu!
Neyi abula kuhosha kwesekeja nanidi izu, dikwila nawu hiyakweti chejejiku.+
21 Nawa muntu wejima wakahita mwituña iku nakabakani nawa natiyi nzala.+ Hamuloña wakwila natiyi nzala nawa nahili, wakashiña mwanta windi niNzambi yindi iku nakutala mwiwulu.
22 Kufumahu, wakatala hamaseki nawa wakamonahu hohu yihuñu nimwidima, kudihomba nimpinji jakala, mwidima nikubula chejeji.
Tumazu twaheshina
^ MuchiHeberu, “nansonekeshu yakutuña kudi muntu.”
^ Hadaha daya mukwila nawu, “Kutemukila kuKupuupa, Kwinza Swayi kuKupuupa.”
^ MuchiHeberu, “nayili kwakwihi.”
^ Dikwila nawu, ñoda Isaya.
^ Shilowa wadiña mumpumpa wamenji.
^ Dikwila nawu, Yufurati.
^ Hela “Dimanyekenu.”
^ Hela “kuleja.”
^ Hela “Nukumutalilaña chikupu.”
