Kuchinda 23:1-30
23 Kufumahu, Balami wamulejeli Balaki nindi: “Tuñaku tumeña+ 7 hadinu iluña, nawa wunloñesheli añombi ayizamba 7 nianyikoku ayizamba 7.”
2 Hohenohu Balaki welili kwesekeja nachahosheliyi Balami. Dichi aBalaki naBalami alambwili ñombi wachizamba hamu namukoku wachizamba hakameña-hikameña.+
3 Kuhiñahu, Balami wamulejeli Balaki nindi: “Shalaku hanu hadi mulambu weyi wakushita, ami nayi. Hadaha Yehova wukuhosha nanami. Yuma yejima yikunlejayi, nukukulejayu nineyi.” Dichi wakandamini hewulu dakapidi.
4 Kufumahu, Nzambi wahosheli naBalami,+ Balami wamulejeli Nzambi nindi: “Natuña tumeña 7 munyisululu, nawa nalambula ñombi wachizamba hamu namukoku wachizamba hakameña-hikameña.”
5 Yehova wamulejeli Balami+ awa mazu nindi: “Funtaku kudi Balaki, nawa awa diwu mazu iwukuhosha.”
6 Dichi wafuntili nawa wamuwanini Balaki niatulamba ejima amuMowabi anemani kumulambu windi wakushita.
7 Kuhiñahu, Balami watili ichi chishimu nindi:+
“Balaki mwanta wakuMowabi nanfumishi kuArami,+Kufuma kumapidi akumusela:
‘Twaya wunshiñiliku Yakoba.
Twaya wumuteni kutama Isarela.’+
8 Nukushiña ñahi antu anabuli kushiñayi Nzambi?
Nawa nukutena ñahi kutama antu anabuli kutenayi Yehova kutama?+
9 Nayimwenaña hewulu damalola,Nawa nayimwenaña hatupidi.
Hiyantu ashakamaña nkawawu kwenoku;+Hiyadichindilaña hakachi kanyuzaku.+
10 Hinyi wunateli kuchinda mazaza aYakoba+ amavulu neyi kuvula kwawusekulula,Hela wunateli kuchinda chibalu chamuchiwana chaIsarela?
Lekenu nifwi* kufwa kwawantu aloña,Nawa kukuma kwami kwiikali neyi kwawu.”
11 Kuhiñahu, Balaki wamwihwili Balami nindi: “Wunankoñelidi chuma chamuchidiwu? Nakuleta kulonda wunshiñiliku ayilumbu jami, ilaña eyi wunayikiswili.”+
12 Yena wamwakwili nindi: “Komana hinatela hohu kuhosha mazu ananlejiyi+ Yehovaku?”
13 Balaki wamulejeli nindi: “Mwani tuyi hamu kwiluña dikwawu kuwunateli kuyimwena awa antu. Wukuyimona ejima wanyi, ilaña wukumonaku hohu antesha. Wunshiñiliwu kwenoku.”+
14 Dichi wamutwalili mwisaña daZofimi hewulu daPisiga,+ watuñili tumeña 7 nawa walambwili ñombi wachizamba hamu namukoku wachizamba hakameña-hikameña.+
15 Kufumahu, Balami wamulejeli Balaki nindi: “Shalaku hanu hadi mulambu weyi wakushita hinnakuya kuna nakuhosha naYena.”
16 Nawa Yehova wamulejeli+ Balami nindi: “Funtaku kudi Balaki, nawa awa diwu mazu iwukuhosha.”
17 Dichi wafuntili kudi yena nawa wamuwanini nakuhembelela kumulambu windi wakushita, nawa wadiña hamu nawatulamba akuMowabi. Balaki wamwihwili nindi: “Yehova nahoshi nindidi?”
18 Kuhiñahu, Balami watili ichi chishimu nindi:+
“Eyi Balaki, imanaku nawa tiyililaku.
Ntiyilili, Eyi mwana kaZipori.
19 Nzambi bayi neyi himuntu washimunaña mwakutwambaku,+Hela bayi neyi himwana kamuntu wahimpaña yitoñojoka yindiku.*+
Neyi ahosha chuma, hakachikoñaku?
Neyi ahosha, hakelamuku?+
20 Tiyaña! Ananleti kulonda nikiswili;Nzambi nakiswili dehi,+ ami nukutwesha wanyi kuhimpa chumichi.+
21 Nzambi hetejaña ñovu yakupanda yidi yejima kumwila Yakoba chumaku,Nawa hetejaña makabi adi ejima kumumwekena Isarelaku.
Yehova Nzambi yindi wudi nawena,+Nawa amuhamekaña hakachi kawu hakwikala mwanta wawu.
22 Nzambi nakuyifumisha muEjipitu.+
Kudi wena wudi neyi nseñu jeboñu dañombi.*+
23 Muloña kwosi ñombu jinateli kumuletela Yakoba+ kukalaku,Hela wunateli kumuhoña Isarelaku.+
Haniyi mpinji antu anateli kuhosha hadi Yakoba niIsarela nawu:
‘Talenu yuma yinakoñiyi Nzambi!’
24 Talenu awa antu akanyamuka neyi mutupa,Akanyamuka awenawu+ neyi chanyamukañayi mutupa.
Hiyakakaamaku, sampu anadii mbiji yawu,Nikunwa mashi awantu anajahiwu.”
25 Balaki wamwilili Balami nindi: “Neyi wukutwesha wanyi kumushiña, komana nikumukiswila bayi wumukiswilaku.”
26 Balami wamulejeli Balaki nindi: “Nakuleja wanyi nami, ‘Nukwila yuma yejima yikuhoshayi Yehova’?”+
27 Balaki wamulejeli Balami nindi: “Mwani twaya nukutwali cheñi kwiluña dikwawu. Hadaha chikumutiyisha Nzambi walala kuwaha kulonda wunshiñiliku iwu muntu kwenoku.”+
28 Dichi Balaki wamutwalili Balami hewulu daPeyori, yatalisha kuYeshimoni.*+
29 Kufumahu, Balami wamulejeli Balaki nindi: “Tuñaku tumeña 7 hadinu iluña, nawa wunloñesheli añombi ayizamba 7 nianyikoku ayizamba 7.”+
30 Dichi Balaki welili kwesekeja nachahosheliyi Balami, nawa walambwili ñombi wachizamba hamu namukoku wachizamba hakameña-hikameña.
Tumazu twaheshina
^ Hela “Wumi wami wufwi.”
^ Hela “waditoñeshañaku.”
^ Hela “jañombi wampata wachizamba.”
^ Hela hekwawu, “chinkalampata; isaña.”
