Kwidika 1:1-22
1 Yakoba, dikwila nawu Isarela, chayiliyi kuEjipitu, anyanindi awamayala ejima niwena ayili hamu nayisaka yawu.+ Awa diwu majina anyana kaYakoba awamayala:
2 Rubeni, Simiyoni, Levi niYuda;+
3 Isakari, Zebuluni niBenjamini;
4 Dani niNafitali; Gadi niAsheri.+
5 Ejima* avwalikili kudi Yakoba* adiña antu* 70, haniyi mpinji Yosefu wadiña dehi muEjipitu.+
6 Nkumininaku, Yosefu wafwili+ niamanakwindi ejima niantu amudina ikiñu dejima afwili.
7 Dichi aIsarela* asemunwini nawa atachikili kuvula chikupu, atwalekelihu nakuvula nikukola nankashi chakwila enzesheli ituña dejima.+
8 Mukuhita kwampinji, muEjipitu mwaswanini mwanta wamuha wabulili kumwiluka Yosefu.
9 Dichi walejeli antu jindi nindi: “Tiyenu! Antu jaIsarela amavulu chikupu nawa akweti ñovu kubadika etu.+
10 Tuyibabelenu. Mukunkulwayi, akutwalekahu kuvula nawa neyi njita yitachika, akadibomba nawayilumbu jetu nakuzuña nanetu nawa akatufumisha mudinu ituña.”
11 Dichi atondeli atupitawu* akutala anduñu kulonda ayizatisheña nyidimu yawuduñu+ nawa amutuñilili Fwaru nyisumba mwakuhembela yuma, yateneneñawu nawu Pitomi naRayamisesi.+
12 Ilaña, elileña chaswejawu kuyikabisha, wena hiyakusweja nikuvula nankashi nawa atwalekelihu nakutaanda, dichi atiyili woma chikupu muloña wawaIsarela.+
13 Chafuminimu, aEjipitu ayibalumwini aIsarela kwikala anduñu nakuyikanjikija kuzata nyidimu yakola.+
14 Ayikolesheleli chihandilu kuhitila mukuyizatisha nyidimu yakola yakuchaaka ndaaka nikufwatula matafwali ninyidimu yejima yawuduñu yazatileñawu mumaha. Chalala ayikabishili nankashi kuhitila mukuyizatisha nyidimu yejima yawuduñu.+
15 Mukuhita kwampinji, mwanta wakuEjipitu wahosheli nawankoñu* aHeberu aShifira naPuwa,
16 nawa wayilejeli nindi: “Neyi himukupapisha ambanda aHeberu+ nawa muyimona adi hachitwamu chakusampulukilahu,* neyi owu mwana weyala, mwatela kumujaha; ilaña neyi wamumbanda, bayi mumujahaku.”
17 Hela chochu, awa ankoñu* amutiyileña Nzambi walala woma nawa hiyakoñeleña chuma chayilejeliwu kudi mwanta wakuEjipituku. Dichi, anyana awamayala ayipulwishileña.+
18 Chimwahitili mpinji, mwanta wakuEjipitu watambikili ankoñu* nakuyihula nindi: “Muloñadi chimunakupulwishila anyana awamayala?”
19 Ankoñu* amwakwili Fwaru nawu: “Ambanda aHeberu hiyadi neyi ambanda eni Ejipituku. Wena akola nawa asampulukaña henohu nkoñu* kanda ashiki.”
20 Dichi Nzambi wayikwashili ankoñu* nawa antu atwalekelihu nakuvula nikukola chikupu.
21 Nawa hamuloña wakwila awa ankoñu* amutiyileña Nzambi walala woma, chimwahitili mpinji wayinkeli yisaka.
22 Nkumininaku, Fwaru walejeli antu jindi ejima nindi: “Mwatela kunatila mwana wejima weyala wukuvwalika wawaHeberu muKaloña Nile, ilaña mwana wejima wamumbanda mwatela kumupulwisha.”+
Tumazu twaheshina
^ Hela “mawumi ejima.”
^ MuchiHeberu, “afumini mwikata daYakoba.”
^ Hela “mawumi.”
^ MuchiHeberu, “anyana kaIsarela awamayala.”
^ Hela “atondeli akulumpi anyidimu.”
^ Hela “nawampapishi.”
^ Hela “hachitwamu chakupapilahu.”
^ Hela “ampapishi.”
^ Hela “ampapishi.”
^ Hela “Ampapishi.”
^ Hela “mpapishi.”
^ Hela “ampapishi.”
^ Hela “ampapishi.”