Kwidika 13:1-22
13 Yehova wamulejeli cheñi Mosi nindi:
2 “Njilikili* awedi ejima awamayala* ahadi aIsarela. Mwana wawedi wejima wukuvwalika, muntu nikanyama, ami.”+
3 Kuhiñahu, Mosi walejeli antu nindi: “Mwanukeña dinu ifuku dayifumishiliwu muEjipitu,+ mwitala dawuduñu, muloña Yehova wayifumishili kunu nachikasa chañovu.+ Dichi bayi muda chuma chikweti iluñiku.
4 Mwifuku dalelu mukakweji kaAbibi,+ munakunyamuka nakuya.*
5 Yehova chikuyitwalayi mwituña dawaKenani, dawaHiti, dawaAmori, dawaHivi nidawaYebusi,+ dasanyikiliyi kudi ankakulula jenu kuyinkadu enu,+ ituña dasweja mayeli niwuchi,+ mwakanakaneña ichi chawija mukanu kakweji.
6 Mafuku 7, mwakadaña mankendi akadi iluñi+ nawa hefuku damu 7, mwakekalaña nachawija chaYehova.
7 Mankendi akadi iluñi akayiidaña hadi mafuku 7;+ enu bayi mwakekali nachuma chikweti iluñiku,+ nawa chikanka chikweti iluñi bayi chikekala mwiluña denuku.*
8 Nawa muntu-himuntu akamuleji mwanindi weyala nindi, ‘Inakwila mwenimu muloña wachuma chankoñeleliyi Yehova hinafumini muEjipitu.’+
9 Nawa chumichi chakekala chinjikijilu hamakasa enu nawa chanukishu hamahama enu*+ kulonda lushimbi lwaYehova lukekali mukanwa kenu muloña Yehova wayifumishili muEjipitu nachikasa chañovu.
10 Mulondeleña iji nshimbi nawa mwikaleña nanichi chawija hachilaaka chachu chaaka-hichaaka.+
11 “Yehova chakayitwalayi mwituña dawaKenani, dasanyikiliyi kudi enu nikudi ankakulula jenu kuyinkadu,+
12 mwakamwinki Yehova awedi ejima awamayala* kushilahu niyimuna yejima yawedi yawamayala yimukweti. Amayala ejima aYehova.+
13 Chimbuulu wejima wawedi mwakamukuuli namukoku, neyi mwakamukuula wanyi, mwakamukotoli nshiñu. Nianyanenu awamayala ejima awedi mwakayikuuli.+
14 “Kumbidi, neyi mwaneyi weyala wakakwihula nindi, ‘Indi ichi chuma chinatalishi mudihi?’ eyi wakamwakuli neyi, ‘Yehova watufumishili muEjipitu mwitala dawuduñu+ nachikasa chañovu.
15 Fwaru chadikañiliyi nakukaana kutuumbaku,+ Yehova wajahili awedi ejima mwituña daEjipitu, kutachikila kudi awedi awantu kushika nikudi awedi awanyama.+ Dichinaleteshi nimulambuleña Yehova yimuna yejima yawedi yawamayala* nawa nakuulaña anyanami awedi awamayala ejima.’
16 Chumichi chikwikala chinjikijilu hachikasa cheyi nawa chuma chakukasa kumutu hehama deyi,*+ muloña nachikasa chañovu Yehova watufumishili muEjipitu.”
17 Dichi Fwaru chetejeliyi antu kuya, Nzambi wayilombweli munjila yaya kwituña dawaFilisitinu wanyi, hela chakwila yadiña yamuketu. Muloña Nzambi wahosheli nindi: “Hadaha antu akuhimpa yitoñojoka yawu nakufunta mwituña daEjipitu neyi ayilukuka nanjita.”
18 Dichi Nzambi waletesheli antu ahitili munjila yakonda yahita mwisaña daKaluñalwiji Kachinana.+ Ilaña aIsarela chafumineñawu mwituña daEjipitu, aditanjikili chachiwahi neyi mazanvu amashidika.
19 Mosi niyena wasendeli mafwaha aYosefu, muloña Yosefu wayisanyikishili anyana kaIsarela awamayala nindi: “Chakadi nikujina, Nzambi wakayakamenaña nawa mwakasendi mafwaha ami nakuyifumisha kunu.”+
20 Anyamukili kuSukoti nawa akaaminini kuEtami kwakumina isaña.
21 Dichi Yehova watwaminineñaku hambidi yawu, namwaana wayilombweleña munjila nachishimi cheevu,+ nawufuku wayilombweleña nachishimi chakesi chayitoñekeleleña chejeji kulonda endeña namwaana niwufuku.+
22 Namwaana, chishimi cheevu hichafumineña hambidi yawantuku nawa nawufuku,+ chishimi chakesi nichena hichafumineña hambidi yawuku.
Tumazu twaheshina
^ MuchiHeberu, “awedi ejima ashinkulaña mwivumu.”
^ Hela “Ñaambwili.”
^ Talenu Nsañu Jikwawu B15.
^ MuchiHeberu, “muñinza jejimaku.”
^ MuchiHeberu, “hakachi kamesu eyi.”
^ MuchiHeberu, “wejima washinkulaña mwivumu.”
^ MuchiHeberu, “chuma chejima chashinkulaña mwivumu.”
^ MuchiHeberu, “hakachi kamesu eyi.”
