Kwidika 16:1-36
16 Hanyima yakwila ananyamuki dehi kufuma kuElimi, nkumininaku, izaza dawaIsarela dejima dashikili mwisaña daSini+ dekala hakachi kaElimi naSinayi, hefuku damu 15 dakakweji kamuchiyedi kufuma hafuminiwu mwituña daEjipitu.
2 Kuhiñahu, izaza dawaIsarela dejima datachikili kuyitoobela aMosi naAroni mwisaña.+
3 AIsarela atwalekelihu kuyila nawu: “Chiña twafwili hohu kuchikasa chaYehova mwituña daEjipitu mutwadiileña mbiji+ niyakuda* nakwikuta. Ilaña enu munatuleti munu mwisaña kulonda mujahi idi izaza dawantu dejima nanzala yakapwelendendi.”+
4 Kufumahu Yehova wamulejeli Mosi nindi: “Ichi dinu inakuyinokeshela yakuda* kufuma mumawulu,+ nawa antu ejima atela kuya nakukuñula hefuku-hefuku+ yakuda yawu muntu-himuntu kulonda niyeseki nimoni neyi akwenda munshimbi jami hela nehi.+
5 Ilaña hefuku damu 6,+ akanoni yakuda yamafuku ayedi yinesekani nayanonañahu hefuku-hefuku+ nakuyiloñeshela chadimu.”
6 Dichi aMosi naAroni alejeli aIsarela ejima nawu: “Namelela mukwiluka chikupu nenu Yehova diyi wayifumishili mwituña daEjipitu.+
7 Nantetemena mwakamona kulema kwaYehova muloña natiyi chimunakumutoobela Yehova. Indi etu yetu anyi mwaka mututoobeleña?”
8 Mosi watwalekelihu nindi: “Neyi namelela Yehova ayinka mbiji nawa nantetemena ayinka mankendi akuda nakwikuta, mwakeluka nenu Yehova natiyi kutooba kwenu kumunakumutoobela. Indi etu yetu anyi? Himunakutoobela etuku, ilaña munakutoobela Yehova.”+
9 Kuhiñahu, Mosi wamulejeli Aroni nindi: “Lejaku izaza dawaIsarela dejima neyi, ‘Twayenu kwakwihi naYehova muloña natiyi kutooba kwenu.’”+
10 Aroni chamanishiliyi tuhu kuhosha nezaza dawaIsarela dejima, abalumukili nakutalisha kukabadi kesaña, chelili nawu atali! kulema kwaYehova kwamwekeni mwivu.+
11 Yehova wamulejeli cheñi Mosi nindi:
12 “Ami natiyi kutooba kwawaIsarela.+ Yileji neyi, ‘Hakabwidibwidi* mukuda mbiji, nantetemena mwakekuta nayakuda*+ nawa mwakeluka chikupu nenu yami Yehova Nzambi yenu.’”+
13 Dichi hamelela wenowu, tuleñami twenjili nawa twataandili muchilombu+ nawa ntetemena muchilombu mwejima mwadiña wuumi.
14 Wuumi chiwakukumukili, hewulu damaseki mwisaña+ hadiña tuyuma twatuwahi twatovu, twatuwahi neyi sino* hamaseki.
15 AIsarela chatumweniwu, atachikili kudihula wumu namukwawu nawu, “Komana itu tuyumanyi?” muloña atwilukili wanyi. Mosi wayilejeli nindi: “Hiyakuda yinayinkiyi* Yehova kulonda mudii.+
16 Ilu dilushimbi lunahaniyi Yehova nindi, ‘Muntu-himuntu akuñuli kwesekeja nayatela kudayi. Munoni yakuda yinashikili muchipimu chaomeri*+ yamuntu-himuntu kwesekeja nakuvula kwawantu* imukweti wejima wenu mumatenti enu.’”
17 AIsarela atachikili kwila mwenimu; akuñwili yakuda, amakwawu akuñwileña yayivulu nawa amakwawu akuñwileña yantesha.
18 Chayipiminiwu nachipimu chaomeri, muntu wakuñwili yayivulu, yasompokelimu wanyi nawa wakuñwili yantesha yakeheli wanyi.+ Wejima wawu akuñwileña kwesekeja nayatela kudawu.
19 Kuhiñahu, Mosi wayilejeli nindi: “Kwosi watela kushiyahu yakuda kushika nintetemenaku.”+
20 Ilaña hiyamutiyilili Mosiku. Antu amakwawu chashiyiliku yakuda kushika nintetemena, yelili mavunyi nawa yanunkileña, dichi Mosi wayihililili.
21 Anoneleña iyi yakuda hantetemena-hantetemena, muntu-himuntu kwesekeja nayatela kudayi. Chikwela nkanza, yasuñunukileña.
22 Hefuku damu 6, anoneli yakuda* yamafuku ayedi,+ muntu-himuntu wanoneli yipimu yiyedi yaomeri. Dichi anlomboli ejima ezaza dawantu enjili nakumulejamu Mosi.
23 Hohenohu wayilejeli nindi: “Dichinahoshiyi Yehova. Kumadiki kwakekala kunooka chikupu,* hisabata yajila yaYehova.+ Ochenu yakuda yimunakukeña kwocha nawa telekenu yimunakukeña kuteleka;+ yakuda yejima yikushalahu muyihembi kushika nintetemena.”
24 Dichi ayihembeli kushika nintetemena neyi chayilejeliyi Mosi, nawa hiyanunkili hela kwila mavunyiku.
25 Kufumahu, Mosi wayilejeli nindi: “Yiidenu dalelu, muloña dalelu hiifuku dasabata yaYehova. Dalelu iyi yakuda mukuyiwana wanyi heseki.
26 Mukunonaña iyi yakuda hadi mafuku 6, ilaña hefuku damu 7, haSabata,+ hiyakekala kwokuku.”
27 Hela chochu, amakwawu ayili nakunona yakuda hefuku damu 7, ilaña hiyayiwaniniku.
28 Dichi Yehova wamulejeli Mosi nindi: “Mukutwalekahu kukaana kuhemba kuleja kwami ninshimbi jami kushika mpinjinyi?+
29 Ilukenu nenu Yehova nayinki Sabata.+ Dichinakojeji yayinkeña yakuda yamafuku* ayedi hefuku damu 6. Muntu-himuntu watela kushakama hadiyi; kwosi watela kufuma heluña hadiyi hefuku damu 7.”
30 Dichi antu anookeli haSabata* hefuku damu 7.+
31 Antu amwitala daIsarela atuumbili iyi yakuda nawu “manina.”* Adiña atooka neyi nteteli yakoriyanda* nawa atiyakeneña neyi mankendi atowala apapalala akushaku wuchi.+
32 Kuhiñahu Mosi wahosheli nindi: “Ilu dilushimbi lunahaniyi Yehova nindi, ‘Inzeshenu chipimu chaomeri namanina kulonda chiikali chuma chimukuhembaña mwakahita makiñu enu ejima+ kulonda akatweshi kumona yakuda yinayinkeli kuda mwisaña hinayifumishileña mwituña daEjipitu.’”
33 Dichi Mosi wamulejeli Aroni nindi: “Nonaku nsaba wushimu chipimu chaomeri chamanina nawa wuyitenteki kumesu aYehova kulonda yiikali chuma chakahembañawu mwakahita makiñu enu ejima.”+
34 Neyi chamulejeliwu Mosi kudi Yehova, Aroni wayitentekeli kumbidi yaChimbañu chaWunsahu*+ kulonda ayihembi.
35 AIsarela adiili manina hadi yaaka 40+ nichiyashikiliwu mwituña mwashakamineña antu.+ Adiili manina kushika nimpinji yashikiliwu kuñinza yetuña daKenani.+
36 Dichi chipimu chaomeri cheñilañamu mapampa 10 muchipimu chaifa.*
Tumazu twaheshina
^ MuchiHeberu, “nimankendi.”
^ MuchiHeberu, “mankendi.”
^ MuchiHeberu, “Hakachi kamamelela ayedi.”
^ MuchiHeberu, “mankendi.”
^ Hela “nvula yachishika yitooka.”
^ MuchiHeberu, “Himankendi anayinkiyi.”
^ Hela “mawumi.”
^ Kwakwihi namalita 2.2 (makwati ayedi oma). Talenu Nsañu Jikwawu B14.
^ Hela “mankendi.”
^ Hela “kuhemba sabata.”
^ Hela “mankendi amafuku.”
^ Hela “anookeli.”
^ Hadaha kufuma kwizu dachiHeberu dakwila nawu “Hichumanyi?”
^ Mbutu yakoriyanda yadifwana nambutu yamasa.
^ Idi dadiña iluña mwahembeleleñawu chiwahi yuma yalema.
^ Ifa yesekeni namalita 22 (makwati 20 oma). Talenu Nsañu Jikwawu B14.
