Kwidika 22:1-31
22 “Neyi muntu eya ñombi wachizamba hela mukoku nawa amujaha hela amulandisha, hanowu ñombi wachizamba wukufwetelamu añombi ayizamba atanu nawa hanowu mukoku wumu wukufwetelamu anyikoku awana.+
2 (“Neyi ikombi+ amuwana nakubalula nindi eñili, amweta nawa afwa, owu wunamujahi wukwikala namuloña wamashi indi wanyi.
3 Ilaña neyi amweta hanyima yakusela kwetena, owu wunamujahi wukwikala namuloña wamashi indi.)
“Watela kufweta. Ilaña neyi hakweti chumaku, owu muntu atela kumulandisha muloña wayuma yineyiyi.
4 Neyi chimuna cheyayi achiwana chiweni hayuma yindi, hela hiñombi wachizamba hela hichimbuulu hela himukoku, watela kufweta ayimuna ayedi.
5 “Neyi muntu wudi wejima atwala anyama indi nakuda mwiha hela mwitempa danyivinyu nawa ayileka aya nakuda mwiha damuntu wacheñi, watela kumufweta yuma yayiwahi nankashi yamwiha dindi hela yuma yayiwahi nankashi yamwitempa dindi danyivinyu.
6 “Neyi kesi kabutuka nawa kakwata kuyiputa yanyiña nakwocha yiita hela mbutu yemana hela iha, muntu wabutula kesi watela kufweta hayuma yinochiyi.
7 “Neyi muntu amwinka mukwawu mali hela yuma nindi ahembi nawa yumiyi ayiyila mwitala danowu mukwawu, neyi ikombi amuwana watela kufweta kapampa kayedi.+
8 Neyi ikombi kumuwana nehi, mwini itala atela kumutwala kumesu aNzambi walala+ kulonda amoni neyi wakwatahu makasa hayuma yamukwawu.
9 Nyiloña yejima yinakundami kuyuma yikwetiyi muntu yabula kwikala yindi, hela ñombi wachizamba, chimbuulu, mukoku, chakuvwala hela chuma chidi chejima chinajimbali chikutenayi mukwawu nindi, ‘Ichi chuma chami!’ wejima wawu ayedi anateli kutwala muloña wawu kudi Nzambi walala.+ Yowu akuwanawu namuloña kudi Nzambi wukumufweta mukwawu kapampa kayedi.+
10 “Neyi muntu amwinka mukwawu chimbuulu hela ñombi wachizamba hela mukoku hela chimuna wudi wejima nindi ahembi nawa owu kanyama afwa hela akotoka hela amuwombolola,
11 watela kusanyika kudi mukwawu kumesu aYehova nindi hakwatahu chikasa hayuma yamukwawuku; nawa yomweni watela kwiteja chumichi. Owu mukwawu wukumufweta wanyi.+
12 Ilaña neyi owu kanyama amwiyila kumakasa indi, watela kumufweta mwini kanyama.
13 Neyi anamutaboli kudi kanyama wamwisaña, akamuleti kulonda akekali wunsahu. Hakafweta hachimuna chinataboliwu kudi kanyama wamwisañaku.
14 “Ilaña neyi muntu wudi wejima alomba kanyama wamukwawu nawa owu kanyama akotoka hela afwa henohu mwini hosiyi, owu muntu walomba kanyama watela kumufweta mwini kanyama.
15 Neyi yomweni wudi hohu, wukumufweta wanyi. Neyi wahana mali hakumusenda, mali ahanayi hakumusenda didu ifutu.
16 “Neyi iyala adimbeka mujiki* abula kwotawu nawa akaama nindi, watela kuhana mali ansewu kulonda ekali ñodindi.+
17 Neyi tata yindi akaana chikupu kumwinka kulonda ekali ñodindi, owu iyala watela kufweta mali esekana namali ansewu.
18 “Bayi mwiteja mumbanda wapanda kuhandaku.+
19 “Muntu wejima wukukaama nakanyama, chakadi nikujina atela kumujaha.+
20 “Muntu wejima wukulambula kudi anzambi adi ejima chatela alambuli kudi Yehova nkawindi, atela kumujaha.+
21 “Ñiinza bayi mumukoña chatama hela kumukabishaku,+ muloña ninenu mwadiña añiinza mwituña daEjipitu.+
22 “Bayi mukabisha ntuluwa hela mwana wabula tata yindiku.*+
23 Neyi mumukabisha hela chanti chakwila andilila, chakadi nikujina nakatiya kudila kwindi;+
24 kuzuwa kwami kukasweja chikupu chakwila nakayijaha nampoku yakabali nawa añodi jenu akekala antuluwa nawa anyanenu akekala akadi atata jawu.
25 “Neyi mukongwesha* mali kudi kazweñi* wahadi antu jami, owu imunakushakama nindi, kudi yena bayi mwikala neyi mukakukongwesha* maliku. Bayi mumuleja nenu ayishilihu mali ahewuluku.+
26 “Neyi wutambula chakuvwala chamukwenu kwikala chuma chakukwatilamu muloña wankongoli,*+ watela kumufuntishila hakuhuma kwetena,
27 muloña dichuma hohu chikwetiyi chakudibuta, dichadibutañayi hamujimba windi;* hanu dinu wukudibutadi hakukaama?+ Neyi andilila, chakadi nikujina nukumutiya, muloña nikweti wushona.*+
28 “Bayi wumushiña* Nzambi+ hela nyuuli hakachi kawantu jeyiku.+
29 “Bayi wushintajala kulambula mulambu wahayakuda yeyi yayivulu niyuma yayivulu yamumawukamwinu eyiku.*+ Anyaneyi awedi awamayala niwena wakayinyinkiwu.+
30 Ichi dichiwatela kwila nañombi weyi wachizamba ninamukoku weyi:+ Hadi mafuku 7 wakekala namama yindi. Hefuku damu 8, wakamunyinkiyi.+
31 “Mwatela kudimwekesha nenu mudi antu ajila kudi ami+ nawa bayi muda mbiji yachuma chidi chejima chamwisaña chinataboliwu kudi kanyama wamwisañaku.+ Mwatela kuyinatila atuwa.
Tumazu twaheshina
^ Iwu himumbanda wabula kukaamahu dehi neyala.
^ Hela “nshona.”
^ Hela “mukakusondamisha.”
^ Hela “musondamisha.”
^ Hela “wunakukabakana.”
^ Hela “wamukudi.”
^ Hela “hekowa dindi.”
^ Hela “luwi.”
^ Hela “wumuhela.”
^ Dikwila nawu, mawukamwinu amanji nimawukamwinu avinyu.
