Kwidika 24:1-18
24 Kuhiñahu, wamulejeli Mosi nindi: “Kandukaku wuyi kudi Yehova, eyi niAroni, Nadabi niAbihu+ kushilahu niakulumpi jawaIsarela 70 nawa munoñamini hahalehi.
2 Eyi Mosi watela kuswina kudi ami Yehova nkaweyi; ilaña owu amayala bayi aswina kudi amiku, nawa antu bayi akanduka hamu naneyiku.”+
3 Kufumahu, Mosi wenjili nakuyileja antu mazu ejima ahosheliyi Yehova nimazu awunsompeshi ejima+ nawa antu ejima etejeleli hamu nawu: “Mazu ejima anahoshiyi Yehova, tuneteji kuyovwahila.”+
4 Dichi Mosi wasonekeli mazu aYehova ejima.+ Kuhiñahu, wanyamukili ntetemena nankashi nakutuña kameña mwishina dampidi niyishimi 12 yesekana nanyichidi 12 yaIsarela.
5 Kufumahu, watemesheli anyikwenzi awaIsarela nawa alambwili nyilambu yakushita nimulambu wawañombi ayizamba kulonda yiikali nyilambu yakuwunda+ kudi Yehova.
6 Kuhiñahu, Mosi waambwili mashi hakachi, amakwawu wayishili muyeña yakunama nawa amakwawu wayisampwilili hakameña.
7 Kufumahu, wanoneli mukanda wachitiyañenu nakuyitañilawu antu nezu datiyakana.+ Nawa wena ahosheli nawu: “Mwejima munahoshiyi Yehova tuneteji kwilamu nawa tukwovwahilaña.”+
8 Dichi Mosi wanoneli mashi nakuyisampwila antu+ nawa wahosheli nindi: “Awa diwu mashi achitiyañenu chinatiyañaniyi Yehova nanenu kwesekeja nanawa mazu ejima.”+
9 Mosi niAroni, Nadabi niAbihu kushilahu niakulumpi jawaIsarela 70 akandamini hampidi
10 nawa amumweni Nzambi yaIsarela.+ Mwishina danyendu yindi mwadiña chuma chamwekeneña neyi chisesa chamalola asafira nawa chadiña chitooka neyi chachaña mawulu.+
11 Amayala aIsarela alemeshawu+ hayikoñelihu chuma chatamaku, nawa amweni chimwenu chaNzambi walala nawa adiili nikunwa.
12 Kuhiñahu, Yehova wamwilili Mosi nindi: “Kandamaku hanu hampidi hinidi nawa wushakami henohu. Nukukwinka malola awubasa hakwikala nshimbi nikuleja jinukusoneka kulonda antu ajilondeleña.”+
13 Dichi Mosi wanyamukili naYoshuwa nhembi yindi+ nawa Mosi wakandamini hampidi yaNzambi walala.+
14 Ilaña akulumpi wayilejeli nindi: “Tuhembelelenu hanu sampu tunafunti kudi enu.+ Mudi naAroni niHuri.+ Muntu wejima wukweti muloña watela kuya kudi wena.”+
15 Kuhiñahu, Mosi wakandamini hampidi iku ivu dinakubuta hampidi.+
16 Kulema kwaYehova+ kwatwalekelihu hampidi yaSinayi+ nawa ivu dabutili hampidi hadi mafuku 6. Hefuku damu 7, wamutambikilili Mosi mukachi keevu.
17 Kudi aIsarela amweneñaku, kulema kwaYehova kwamwekeneña neyi kesi kajilumunaña kadi hewulu dampidi.
18 Kuhiñahu, Mosi weñilili mwivu nakukandama hampidi.+ Nawa Mosi washakamini hampidi hadi mafuku 40, mwaana niwufuku.+
