Kwidika 34:1-35
34 Kuhiñahu, Yehova wamulejeli Mosi nindi: “Diseseli malola ayedi awubasa adi neyi ana atachi.+ Hanawa malola awubasa, nukusonekahu mazu adiña hanana malola awubasa atachi+ iwabalwili.+
2 Diloñeshi, muloña nantetemena wakakandama haMpidi yaSinayi nawa kwenoku wakemani kumesu ami, hewulu dampidi.+
3 Ilaña, kwosi muntu watela kuya hamu naneyiku. Nawa kwosi chuma chidi chejima chatela kumwekena kumpidiku. Nawa kumbidi yampidi,+ hikwatela kudiila nyikanka yanyikoku hela añombiku.”
4 Dichi Mosi waseseli malola ayedi awubasa adi neyi ana atachi. Wanyamukili ntetemena yayeni nakukandama haMpidi yaSinayi neyi chamulejeliwu kudi Yehova iku nasendi malola ayedi awubasa muchikasa.
5 Kuhiñahu, Yehova wasulukili+ mwivu nakwimana kwenoku hamu naMosi nawa wabidikili ijina dindi daYehova.+
6 Yehova wahitileña kumesu indi nakubidika nindi: “Yehova, Yehova, Nzambi wukweti luwi+ niwushona,+ hazuwaña swayiku+ nawa wavulisha kukeña kwakashinshi+ nichalala,+
7 wamwekeshelaña makombakaji awantu kukeña kwakashinshi,+ wanakenaña yiluwa ninshidi.+ Ilaña hakabula kubabesha muntu wukweti muloñaku,+ muloña wayiluwa yawatata jawantu, wababeshelañamu anyana, ejikulu nianyana kawejikulu awu.”+
8 Mosi wanyakeli kubandama chamesu heseki nawa wadifukwili.
9 Kuhiñahu wahosheli nindi: “Eyi Yehova mwani, neyi wunantiya kuwaha, wuyi hamu nanetu+ hela chakwila tudi antu achinchika nyichima,*+ eyi Yehova. Wutwanakeni yiluwa yetu ninshidi jetu+ nawa wutwiteji twiikali iheta deyi.”
10 Yena nindi: “Inakutiyañana ichi chitiyañenu nami: Hamesu awantu jeyi ejima, nakela yuma yakuhayamisha yakwila kanda ayikoñeñahu* dehi mwahita iseki dejima hela munyuza yejima.+ Antu ejima imwashakamaña nawu akamona nyidimu yanami Yehova muloña chuma chinnakuyikoñela hichuma chakutiyisha woma chikupu.+
11 “Tiyililenu nakanañachima kuyuma yinnakuyileja dalelu.+ AAmori, aKenani, aHiti, aPerizi, aHivi niaYebusi,+ inakuyitemuna afumi kudi enu.
12 Mwatela kubabala kulonda mwakabuli kutiyañana chitiyañenu nawantu ashakamaña munodu ituña dimunakuyamu,+ mukunkulwayi, chumichi chinateli kwikala muhetu kudi enu.+
13 Ilaña mwakahumoni tumeña twawu, mwakachikachiki mashiki awu ajila nawa mwakatemoni niyishimi yawu yajila.*+
14 Bayi mwakadibuka kudi nzambi mukwawuku,+ muloña ami Yehova añiluka nawu* antu atela kudifukula kudi ami hohu.* Eñañi, yami Nzambi nakeñaña antu kudifukula kudi ami hohu.+
15 Mwatela kubabala kulonda mwakabuli kutiyañana chitiyañenu nawantu ashakamaña munodu ituña, muloña neyi hiyakwila wuvumbi nawanzambi* jawu+ nikulambula kudi anzambi jawu, hadaha muntu wumu nenzi ayitambiki nawa mwakenda kada mulambu windi.+
16 Chumichi chakenda kayiletesha enu kuyisumbwila anyanenu awamayala+ anyanawu awambanda. Nawa anyanawu awambanda akela wuvumbi nawanzambi jawu nakuyikanjikija anyanenu awamayala kwila wuvumbi kuhitila mukudifukula kudi anzambi jawu.+
17 “Bayi wudituñila anzambi akweñununaku.+
18 “Wukwikalaña naChawija chaMankendi Akadi Iluñi.+ Wakadaña mankendi akadi iluñi neyi chinakulejeli. Wakeleña chumichi hadi mafuku 7 hampinji yatoñolawu mukakweji kaAbibi,*+ muloña wafumini muEjipitu mukakweji kaAbibi.
19 “Awedi ejima awamayala* ami,+ kushilahu niyimuna yeyi yawedi yejima, hela ñombi wachizamba hela mukoku.+
20 Chimbuulu wawedi mwakamukuuli namukoku. Ilaña neyi mwakamukuula wanyi, mwakamukotoli nshiñu. Nianyanenu awamayala ejima awedi mwakayikuuli.+ Kwosi muntu watela kwinza kudi ami makasakasaku.
21 “Wukuzataña nyidimu yeyi hadi mafuku 6, ilaña hefuku damu 7, wukunookaña.*+ Hela tuhu mumpinji yakudima niyakwaañula, wukunookaña.
22 “Wukwanakanaña Chawija chaNyilungu natidiku yinasambili kuha niChawija chaKupompesha* hakumana kwachaaka.+
23 “Antu jeyi awamayala ejima akwinzaña kasatu muchaaka kumesu aMwanta walala Yehova, Nzambi yaIsarela.+
24 Ami nakatemuna nyuza kudi eyi+ nawa nakatohesha iluña deyi. Kwosi muntu wukafwilaña ituña deyi hiwakayaña nakudimona naYehova Nzambi yeyi kasatu muchaaka.
25 “Bayi wulambula mashi amulambu wami hamu nachuma chejima chikweti iluñiku.+ Mulambu wachawija chaChipandakenu bayi wuwuhemba wufuku wejima kushika nintetemenaku.+
26 “Nyikaabu yinasambili kuha yayiwahi nankashi yamwiha deyi watela kuyileta kwitala daYehova Nzambi yeyi.+
“Bayi wuteleka mwana kampembi mumayeli amama yindiku.”+
27 Yehova watwelekelihu kumuleja Mosi nindi: “Wusoneki awa mazu,+ muloña inakutiyañana chitiyañenu naneyi niaIsarela kwesekeja nanawa mazu.”+
28 Dichi washakamini kwenoku naYehova hadi mafuku 40 mwaana niwufuku. Hadiilihu yakuda hela kunwahu menjiku.+ Nawa Nzambi wasonekeli mazu achitiyañenu hamalola awubasa, dikwila nawu Nshimbi 10.*+
29 Kuhiñahu, Mosi wasulukili haMpidi yaSinayi iku nasendi muchikasa chindi malola awubasa ayedi hanasonekiwu Wunsahu.+ Mosi chasulukiliyi hampidi, ikowa dindi dakumesu dakejimineña muloña wafumini nakuhosha naNzambi. Hela chochu, yena welukili wanyi chumichi.
30 Aroni niaIsarela ejima chamumweniwu Mosi, amweni ikowa dindi dakumesu dinakukejima nawa atiyili woma kuswina kwakwihi nayena.+
31 Hela chochu, Mosi wayitambikili, dichi Aroni nianlomboli ejima ezaza dawantu enjili kudi Mosi nawa wahosheli nawu.
32 Kufumahu, aIsarela ejima enjili kudi yena nawa wayinkeli nshimbi jejima jamwinkeliwu kudi Yehova haMpidi yaSinayi.+
33 Mosi welileña chamanishayi kuhosha nawu, wadibutileña kadihina kumesu indi.+
34 Ilaña, Mosi welileña neyi eñila mwitenti dakubulakena nakuhosha naYehova, wafumishileña kadihina kumesu indi sampu nichikwidikayi.+ Kufumahu, wayileña hanji nakuyileja aIsarela yuma yinamulejiwu.+
35 Nawa aIsarela amweneña ikowa dakumesu aMosi dinakukejima. Mosi wadibutileña kadihina cheñi kumesu indi kushika nimpinji yafuntileñayi cheñi nakuhosha naNzambi.*+
Tumazu twaheshina
^ MuchiHeberu, “akola nshiñu.”
^ Hela “ayileñeñahu.”
^ Talenu Kulumbulula.
^ MuchiHeberu, “ami Yehova, ijina dami.”
^ Hela “chakadi kunhadikila.”
^ MuchiHeberu, “hiyakwila wuvumbi nawanzambi.”
^ Talenu Nsañu Jikwawu B15.
^ MuchiHeberu, “chuma chejima chashinkulaña mwivumu.”
^ Hela “kuhemba sabata.”
^ Achitenaña cheñi nawu Chawija chaYisolu (chaJitabanaka).
^ MuchiHeberu, “Mazu 10.” Atenañawu cheñi nawu Dekalogu.
^ MuchiHeberu, “nayena.”
