Kwidika 4:1-31
4 Hela chochu, Mosi wahosheli nindi: “Hanu dinu nakela ñahi neyi akabuli kunkuhwelela nawa akakaani kutiyilila mwizu dami?+ Muloña akahosha nawu, ‘Yehova hamwekana kudi eyiku.’”
2 Kuhiñahu Yehova wamwihwili nindi: “Chumanyi ochu chidi muchikasa cheyi?” Yena waakwili nindi: “Mbwechi.”
3 Wamulejeli nindi: “Yinati heseki.” Dichi wayinatili heseki nawa yabalumukili kapela;+ nawa Mosi wakitemukili.
4 Yehova wamulejeli Mosi nindi: “Ololaku chikasa cheyi wukikwati kumukila.” Dichi wolweli nakukikwata nawa kabalumukili mbwechi muchikasa chindi.
5 Kuhiñahu Nzambi wahosheli nindi: “Ichi dichuma chakayileñela akakuhweleli nawu Yehova Nzambi yawankakulula jawu, Nzambi yaAbarahama, Nzambi yaIsaka nawa Nzambi yaYakoba,+ wamwekana kudi eyi.”+
6 Yehova wamulejeli cheñi nindi: “Iñijaku chikasa cheyi muchakuvwala hantulu yeyi.” Dichi weñijili chikasa muchakuvwala hantulu yindi. Chachidishiliyi, chikasa chatookeli to-o nambumba neyi sino.*+
7 Kuhiñahu, wamulejeli nindi: “Funtishaku chikasa cheyi muchakuvwala hantulu yeyi.” Dichi wafuntishili chikasa muchakuvwala chindi. Chachidishiliyi muchakuvwala, chakoleli nakwikala neyi mujimba windi wejima.
8 Wahosheli nindi: “Neyi akakukuhwelela wanyi hela neyi akabula kushaku maana kuchinjikijilu chatachi, dikwila nawu akasha maana kuchinjikijilu chamuchiyedi.+
9 Ilaña neyi akabula kukuhwelela iyi yinjikijilu yiyedi nawa neyi akakaana kutiyilila muwakahosha, wakatehuni menji muKaloña Nile nakuyimwañila heseki dooma nawa awa menji iwakatehuna muNile, akabalumuka mashi heseki dooma.”+
10 Mosi wamulejeli Yehova nindi: “Eyi Yehova, ñanakeniku, ami neluka kuhosha chiwahi wanyi, kufuma tuhu kunyima kushika nilelu hiwunahoshi nanami kambuñeyi, muloña ami kwami nalemendenda hakuhosha* nawa idimi dami dalema.”+
11 Yehova wamwihwili nindi: “Hinyi waleñeli kanwa kamuntu hela hinyi wamwilishaña muntu kwikala kamama, njika matu, kumona chiwahi hela mputamesu? Komana ami Yehova, hiyamiku?
12 Dichi yaña chochichi, nakekalaña naneyi chiwakahoshaña* nawa nakakulejaña yuma yiwatela kuhosha.”+
13 Ilaña yena wahosheli nindi: “Eyi Yehova, ñanakeniku, mwani temeshaku muntu wudi wejima iwukukeña kutemesha.”
14 Kuhiñahu, Yehova wamuzuwilili chikupu Mosi nakumuleja nindi: “Indi manakweyi Aroni+ kaLevi? Neluka nami nateli kuhosha chiwahi nankashi. Nawa wudi munjila nakwinza nakudibulakana naneyi. Chakukumonayi, wukuzañalala mumuchima windi.+
15 Dichi wuhoshi nindi nawa wushi mazu mukanwa kindi,+ nakekalaña naneyi niyena himwakahoshaña+ nawa nakayileja yuma yimwakela.
16 Yena wakakuhoshelañaku kudi antu nawa wakekala mukakukuhoshelaku, hakwila eyi wakekala neyi Nzambi kudi yena.*+
17 Wakasendi iyi mbwechi muchikasa cheyi, wakayizatishi kukoña nachu yinjikijilu.”+
18 Dichi Mosi wafuntili kudi muku windi weyala+ Yetiro nakumuleja nindi: “Inakukeña kufunta kudi amanakwami adi muEjipitu kulonda nakatali neyi achidi amomi.” Yetiro wamulejeli Mosi nindi: “Yaña mukuwunda.”
19 Kuhiñahu, Yehova wamulejeli Mosi muMidiyani nindi: “Yaña, funtaku kuEjipitu muloña antu ejima akeñeleña kukujaha,* afwa dehi.”+
20 Kufumahu, Mosi wanoneli ñodindi nianyanindi awamayala nakuyikandamisha hachimbuulu nawa watachikili kufunta kwituña daEjipitu. Kubombelahu, Mosi wasendeli mbwechi yaNzambi walala muchikasa chindi.
21 Dichi Yehova wamulejeli Mosi nindi: “Neyi wunafunti dehi kuEjipitu, wakakoñi kumesu aFwaru yihayamisha yejima yinnakuleji kukoña.+ Ilaña ami nakachinchikisha muchima windi+ nawa hakayiteja antu kuyaku.+
22 Wakamuleji Fwaru neyi, ‘Yehova nahoshi nindi: “Isarela himwanami weyala, wedi wami.+
23 Nakuleji nami, Mwiteji mwanami yayeña kulonda yakankalakeli. Ilaña neyi wukukaana kumwiteja kuya, inakujaha mwaneyi weyala, wedi weyi.”’”+
24 Chayileñawu munjila, ashikili heluña dakukaamina, Yehova+ wamubulakeni nawa wakeñeleña kumujaha.+
25 Nkumininaku, Zipora+ wanoneli ilola datwa* nakwalamisha nachu mwanindi nawa wamunatilili mwanindi kalomulomu kindi kunyendu yindi nakuhosha nindi: “Nakoñi chumichi muloña kudi ami eyi wudi kalemba kamashi.”
26 Dichi Nzambi wamwitejeli nindi ayeña. Hayoyenoyu mpinji wahosheli nindi, “kalemba kami kamashi,” muloña wakwalama.
27 Kuhiñahu, Yehova wamulejeli Aroni nindi: “Yaña mwisaña wakadibulakani naMosi.”+ Dichi wayili, wadibulakeni nindi kumpidi yaNzambi walala+ nawa wamwimushili nakumufufwa.
28 Mosi wamulejeli Aroni mazu ejima aYehova wamutemesheli,+ wamulejeli niyinjikijilu yejima yamulejeliyi kukoña.+
29 Hanyima yachumichi, Mosi naAroni ayili nawa apompesheli akulumpi ejima awaIsarela.+
30 Aroni wayilejeli mazu ejima amulejeliwu Mosi kudi Yehova nawa welili yinjikijilu+ kumesu awantu.
31 Hohenohu antu etiyili.+ Chatiyiliwu nawu Yehova nayanuki aIsarela+ nawa namoni yihuñu yinakumonawu,+ abandamini heseki nakudifukula.
Tumazu twaheshina
^ Hela “nvula yachishika yitooka.”
^ MuchiHeberu, “kanwa kalema.”
^ MuchiHeberu, “nakanwa keyi.”
^ Hela “wakamwimenañaku Nzambi kudi yena.”
^ Hela “akeñeleña wumi weyi.”
^ Hela “mpoku yatwa.”
