Kwidika 5:1-23
5 Kuhiñahu, Mosi naAroni eñilili nakumuleja Fwaru nawu: “Yehova Nzambi yaIsarela nahoshi nindi, ‘Yiiteji antu jami ayi kulonda akandiili chawija mwisaña.’”
2 Ilaña Fwaru wayihwili nindi: “Yehova diyinyi+ mwaka novwahili mwizu dindi nakuyuumbaku aIsarela?+ Ami hinamwiluka Yehova hela hantiku, nawa aIsarela nukuyuumbaku wanyi.”+
3 Ilaña wena aakwili nawu: “Nzambi yawaHeberu nahoshi nanetu. Mwani, tunakukeña kuya lwendu lwamafuku asatu mwisaña kulonda twakalambuli mulambu kudi Yehova Nzambi yetu;+ neyi nehi, wukutujaha namusoñu hela nampoku yakabali.”
4 Ilaña mwanta wakuEjipitu wayilili nindi: “Muloñadi enu aMosi naAroni chimunakufumishila antu kumudimu wawu? Funtenu kumudimu* wenu wawuduñu!”+
5 Nawa Fwaru wahosheli cheñi nindi: “Talenu antu adi mudinu ituña chinavuliwu, ilaña enu munakukeña anooki nawa aleki kuzata mudimu wawu.”
6 Hadodina ifuku, Fwaru walejeli akulumpi anyidimu niatupitawu awu nindi:
7 “Muleki kuyinka antu matahu oma akufwatwisha nachu matafwali.+ Yilekenu ayeña nakudikeñela matahu oma awenawu.
8 Ilaña muyipimini chikonkwanyi chamatafwali chinesekani nachafwatwileñawu kunyima. Bayi muyikeheshelachuku, muloña anakatali.* Dihanakufuma adiladileña nawu, ‘Tunakukeña kuya twakalambuli mulambu kudi Nzambi yetu!’
9 Muyizatishi chikupu nawa muyinki nyidimu yayivulu nankashi kulonda abuli kusha maana kunsañu yakutwamba.”
10 Dichi akulumpi anyidimu+ niatupitawu awu, edikili hanji nakuyileja antu nawu: “Fwaru nahoshi nindi, ‘Ami naleki kuyinka enu matahu oma.
11 Yenu mwakadikeñeli matahu oma kwejima kumukuyiwana, ilaña mudimu wenu hiyakuwukeheshaku.’”
12 Dichi, antu apalañeneni mwituña daEjipitu dejima nakupompesha nsaachi kulonda ayizatisheña neyi matahu oma.
13 Nawa akulumpi anyidimu akonkomweneneña antu nawu: “Muntu-himuntu watela kumanisha mudimu windi wahefuku-hefuku neyi chelileñayi mpinji yamwinkeleñawu matahu oma.”
14 Nawa atupitawu awaIsarela owu atondeliwu kudi akulumpi anyidimu aFwaru nawu ayitaleña, ayeteli.+ Ayihwili nawu: “Muloñadi chimunakañenyi kushikija chikonkwanyi chakufwatula matafwali neyi chimwafwatwileña kunyima? Chahaloshi mwachikañanya nichalelu.”
15 Dichi atupitawu twawaIsarela eñilili nakudidilisha kudi Fwaru nawu: “Muloñadi chiwunakutukabishila etu ambuñeyi ñana?
16 Etu ambuñeyi hiyanatwinkihu matahu omaku, hela chochu, anakutwila nawu, ‘Fwatulenu matafwali!’ Etu ambuñeyi anakutweta henohu antu jeyi diwu anatamishi.”
17 Ilaña yena wayilejeli nindi: “Munaleki kuzata nañovu,* munaleki kuzata nañovu!*+ Dihanakufuma muhosheña nenu, ‘Tunakukeña kuya twakalambuli mulambu kudi Yehova.’+
18 Dichi funtenu kumudimu wenu! Hiyakuyinka matahu omaku, hela chochu, mwatela kufwatula chikonkwanyi chamatafwali chinayipiminiwu.”
19 Atupitawu twawaIsarela amweni nawu adi mukukala kweneni muloña walushimbi lwakwila nawu: “Bayi mukeheshaku chikonkwanyi chenu chahefuku-hefuku chakufwatula matafwaliku.”
20 Chafumineñawu kudi Fwaru, adibulakeni naMosi niAroni owu emeni kwenoku nakuyihembelela kulonda adimoni nawu.
21 Hohenohu ayilili nawu: “Yehova ashinshiki hayuma yimunakoñi nawa ayisompeshi, muloña munamuleñeli Fwaru niambuñindi kutuhela* nawa munashi mpoku yakabali muchikasa chawu kulonda atujahi.”+
22 Dichi Mosi wahosheli kudi Yehova nindi: “Eyi Yehova, muloñadi chiwunakabishili awa antu? Wunantemeshelidi?
23 Kufuma tuhu hineñilili kudi Fwaru nakuhosha nindi mwijina deyi,+ dihu dinu hanaswejiyi kukabisha awa antu+ nawa eyi hiwunayipulwishi antu jeyiku.”+
Tumazu twaheshina
^ Hela “kuyisenda.”
^ Hela “hiyankopi.”
^ Hela “Munekali ankopi.”
^ Hela “munekali ankopi.”
^ Hela “munatuleñeli kununka chatama kudi Fwaru nikudi ambuñindi.”
