Yashimwiniyi Luka 11:1-54
11 Dichi hadiñayi kwiluña dimu nakulomba nawa chakumishiliyi, kambanji kindi wumu wamulejeli nindi: “Mwanta, tudizishi chakulomba, neyi Yowanu chadizishiliyi atumbanji twindi.”
2 Dichi wayilejeli nindi: “Neyi himukulomba, hoshenuña nenu: ‘Tata, ijina deyi diikali dajila.*+ Wanta weyi winzi.+
3 Twinkeña hefuku-hefuku yakuda* yetu kwesekeja nayuma yitunakaankili hanodu ifuku.+
4 Nawa twanakeni nshidi jetu,+ muloña ninetu twanakenaña ejima adi nanyikudi yetu;*+ nawa bayi wututwala mukwesekaku.’”+
5 Kuhiñahu wayilejeli nindi: “Tuhoshi netu wumu hakachi kenu wudi nebwambu nawa aya kudi yena hakachi kawufuku nakumwila nindi, ‘Ibwambu, nkongweshiku mankendi asatu,
6 muloña natambwili ibwambu dami nafumi kwakulehi nawa hinikweti yakuda yakumwinkaku.’
7 Ilaña yena hakwakula mwitala nindi: ‘Lekaku kunkabisha. Kuchiisu kwakukiya nawa ami nianyanami anyanya tudi dehi mukadidi. Hinukutwesha kuhinduka nakukwinka chumaku.’
8 Inakuyileja nami, muloña wanyikoyu yindi,*+ iwu muntu wukuhinduka nakumwinka chuma chejima chinakukeñayi, bayi neyi muloña wakwila hiibwambu dindiku.
9 Dichi inakuyileja nami, lombenuña,+ akayinka; keñakeñenuña, mwakawana; dondomwenenuña, akayenzunwinaku.+
10 Muloña muntu wejima walombaña, watambwilaña,+ muntu wejima wakeñakeñaña, wawanaña, nimuntu wejima wadondomwenaña, amwenzunwinañaku.
11 Mwamweni, tata yawantwinyi wukwila neyi mwanindi namulombi inshi, yena hakumwinka kapela chatela amwinki inshi?+
12 Hela neyi amulomba cheñi iteta, yena hakumwinka kanjimbu?
13 Dichi, hela chakwila enu mwatama, ilaña mweluka kwinka anyanenu yawaana yayiwahi, dikwila nawu Tata yenu wekala mwiwulu wakasweja kuyinka antu amulombaña spiritu yajila.”+
14 Chimwahitili mpinji, wafumishili ndemoni wakañeshaña kuhosha.*+ Ndemoni chafuminiyi, kamama watachikili kuhosha nawa mazaza awantu ahayamini.+
15 Ilaña amu hakachi kawu ahosheli nawu: “Wafumishaña andemoni nañovu yaBelezebubi,* nyuuli wawandemoni.”+
16 Nawa amakwawu, hakwila amweseki, atachikili kumwila nawu yayimwekesheli chinjikijilu+ kufuma mwiwulu.
17 Chelukiliyi yitoñojoka yawu,+ wayilejeli nindi: “Wanta wejima wadaambulaña waweni wakisikaña, nawa itala dadaambulaña dadeni dahumukaña.
18 Munjila yoyimu, neyi Satana niyena adaambula yomweni, indi wanta windi wukukola ñahi? Muloña mwahoshaña nenu nafumishaña andemoni nañovu yaBelezebubi.
19 Neyi nafumishaña andemoni nañovu yaBelezebubi, indi anyanenu afumishaña nañovu janyi? Ichi dichikaletesha akekali ansompeshi jenu.
20 Ilaña neyi nafumishaña andemoni namunu waNzambi,+ dikwila nawu Wanta waNzambi chalala wunayishintakeshi.+
21 Neyi muntu wukweti ñovu wunadimanyeki chiwahi yitwa, ahemba chipañu chindi, yuma yindi yikwikala yakiñewa.
22 Ilaña neyi amulukuka kudi muntu wamubadika ñovu nawa amushinda, iwu iyala wukumutambula yitwa yindi yanjita yejima mwakuhwelelayi, nawa wukwanzañana nawakwawu yuma yamutambulayi.
23 Wejima wunabuli kwikala kukabadi kami, nakudikaña nanami, nawa wejima wabulaña kupompesha hamu nanami, wapalañeshaña.+
24 “Spiritu wazonda neyi nafumi mudi muntu, wahitañanaña mumaluña akadi menji nakukeñakeña iluña dakunookela, nawa neyi kudiwana nehi, wahoshaña nindi, ‘Nukufunta mwitala dami munafumini.’+
25 Nawa neyi nashiki, wukuwana mwitala anakombimu nikuwahishamu chiwahi.
26 Kuhiñahu, wukuya nakusenda akwawu aspiritu 7 atama chikupu kubadika yena, neyi aneñilimu dehi, akushakama mwenomu. Dichi chihandilu chanowu muntu chakukuminina chikutama nankashi kubadika chatachi.”
27 Dichi hahosheleñayi yumiyi, mumbanda wumu wadiña munodu izaza dawantu wabidikili nindi: “Wudi namuzañalu yowu mumbanda wakusendeli mwivumu dindi nawa wakwamwishili kumayeli indi!”+
28 Ilaña yena wahosheli nindi: “Inehi, adi namuzañalu wowu antu atiyaña izu daNzambi nikudihemba!”+
29 Mazaza awantu chadipompesheleñawu hamu, watachikili kuhosha nindi: “Idi ikiñu hiikiñu datama; dakeñaña chinjikijilu, ilaña kwosi chinjikijilu chakadimwekeshelawu idi ikiñuku, chiña chinjikijilu chaYona hohu.+
30 Neyi chekaliliyi Yona+ chinjikijilu kudi aNiniva, niMwana kamuntu dichakekalayi kunidi ikiñu.
31 Mwanta wamumbanda wakukabeta kakuchidiilu+ wakasañuka hamu nanawa antu amunidi ikiñu hakusompesha nawa wakayifwisha namuloña, muloña yena wafumini kwakulehi chikupu nakwinza nakutiya maana aSolomoni. Ilaña tiyenu! muntu wabadika Solomoni wudi hanu.+
32 Antu amuNiniva akasañuka hamu nanidi ikiñu hakusompesha nawa idi ikiñu akadifwisha namuloña, muloña abalumukili munyichima nansañu yashimwininiyi Yona.+ Ilaña tiyenu! muntu wabadika Yona wudi hanu.
33 Muntu neyi nabutuli inoñu, haditentekaña mwiluña mwaswamanyika hela mwibañuku,* ilaña waditentekaña hatentekañawu inoñu+ kulonda antu anakwiñila amoni chejeji.
34 Inoñu damujimba hidisu deyi. Neyi disu deyi datala mumu hohu,* nimujimba weyi wejima niwena watoñeka;* ilaña neyi didi nalwisu,* nimujimba weyi wejima niwena himwidima.+
35 Dichi, babalaku kulonda chejeji chidi mudi eyi chibuli kwikala mwidima.
36 Muloña, neyi mujimba weyi wejima wukutoñekaña chakadi nihamu hadi mwidima, dikwila nawu mujimba weyi wukutoñekaña to-o neyi inoñu chidayitoñekelaña chejeji.”
37 Chahosheliyi awa mazu, kaFwarisi wamutambikili nindi adiili hamu yakuda. Dichi weñilili mwitala nawa washakamini kaheña kumesa.
38 Hela chochu, kaFwarisi wahayamini chamweniyi nakuda chakadi kwisuka.*+
39 Ilaña Mwanta wamulejeli nindi: “Enu aFwarisi, mwatookeshaña hanji yakaapu* nicheña, ilaña mukachi kenu mwenzala ntuuya* nikutama.+
40 Enu antu abula maana! Komana owu waleñeli mukachi hidiyi waleñeli nihanjiku?
41 Ilaña hanenuña yawaana yaluwi* yidi munyichima yenu, nawa tiyenu! yuma yejima kudi enu yakekala yitooka.
42 Ilaña, oyihuñu yimwakamona enu aFwarisi, muloña mwahanaña yamwikumi yalweñi,* nipeganoni* nimafu ejima evumba dadiwahi amumatempa,+ ilaña mwadiwulaña wuñanji nikumukeña Nzambi! Yumiyi mwateleleli kuyila, ilaña bayi kudiwula oyu yuma yikwawuku.*+
43 Oyihuñu yimwakamona enu aFwarisi, muloña mwakeña kushakama hayitwamu yakumbidi* mumasinagogi nikukeña nenu ayimusheña muyisankanu!+
44 Oyihuñu yimwakamona enu, muloña mudi neyi majamu* abulaña kumwekana,*+ nawa antu endujolañahu chakadi kwiluka nawu hadi majamu!”
45 Muntu wumu hakachi kanowu elukili chikupu Nshimbi wamulejeli nindi: “Ntañishi, owu mazu iwunahoshi, wunatutuki ninetu.”
46 Yena wahosheli nindi: “Oyihuñu yimwakamona ninenu mweluka chikupu Nshimbi, muloña mwatwikaña akwenu yiteli yalema yakala kusenda, ilaña enu aweni himwatweshaña kukunka oyu yiteli hela namunu wenu wumuku!+
47 “Oyihuñu yimwakamona enu, muloña mwatuñaña majamu* awatuprofwetu henohu ankakulula jenu diwu ayijahili!+
48 Mwamweni mweluka nyidimu yawankakulula jenu, ilaña mwayitiyaña kuwaha, muloña wena ajahili atuprofwetu,+ ilaña enu munakutuña majamu awu.
49 Dichaletesheli maana aNzambi niwena ahoshi nawu: ‘Nakayitemeshela atuprofwetu niapostolu nawa amakwawu hakachi kawu akayijaha nikuyikabisha,
50 kulonda idi ikiñu diikali namuloña wamashi awatuprofwetu ejima apwekeli kufuma haaliliwu chikuku chakaayi,+
51 kutachikila kumashi aAbeli+ kushika nikumashi aZekariya ajahililiwu hakachi kakameña netala.’*+ Inakuyileja chalala nami, idi ikiñu dikekala namuloña wamashi.
52 “Oyihuñu yimwakamona enu mweluka chikupu Nshimbi, muloña mwasendeli nsapi yakwiluka.* Enu aweni himweñililimuku, nawa mwakañeshaña antu anakwiñilamu!”+
53 Dichi chafuminiyi kwenoku, ansoneki niaFwarisi atachikili kumukabisha nankashi nakumwihula malwihu amavulu,
54 kulonda amudii kwizu amoni hakumwinkela muloña namazu akuhoshayi.+
Tumazu twaheshina
^ Hela “adijiliki.”
^ MuchiGiriki, “dinkendi.”
^ Hela “nshidi jetu.”
^ Hela “walukakela lwindi.”
^ Hela “ndemoni wawumama.”
^ Ijina dinakundami kudi Satana.
^ Hela “ibañu dakupiminamu.”
^ Hela “diweni.”
^ Hela “wukwikala nachejeji chikupu.”
^ MuchiGiriki, “kutama.”
^ Dikwila nawu, kashidikilu kakuditookesha yomweni.
^ Hela “lupasa.”
^ Hela “kupuupa.”
^ Hela “yawaana yakwinka atuzweñi.” Talenu Kulumbulula.
^ Dikwila nawu, wuñanji nikumukeña Nzambi.
^ MuchiGiriki, peganoni. Himutondu wazatishañawu kuyitumbu nikusha muyakuda kulonda yitiyakani chiwahi.
^ Hela “minti.”
^ Hela “yayiwahi nankashi.”
^ Hela “majamu achanukishu.”
^ Hela “majamu akadi yinjikijilu.”
^ Hela “majamu achanukishu.”
^ Hela “natembeli.”
^ Hela “kii.”
