Masamu 10:1-18
ל [Lamedi]
10 Muloñadi, eyi Yehova, chiwemenaña hahalehi?
Muloñadi chiwaswaminaña mumpinji yayihuñu?+
2 Muloña wakudivwimba, muntu watama wakumpishaña muntu wabula akumukwasha,+Ilaña wakafwa mutufuta twadikasilañayi yomweni.+
3 Muloña muntu watama wadinkaña wanta hayuma yatama yafwilañayi*+Nawa wakiswilaña mukalwisu;*נ [Nuni]Wamusawulaña Yehova.
4 Muloña wakudivwimba kwindi, muntu watama hakeñakeñaña wunsahuku;Yena watoñojokaña hohu nindi: “Nzambi wekalaku wanyi.”+
5 Njila jindi jinatwalekihu kulumbulukilaku,+Ilaña wunsompeshi weyi wabadika chikupu maana indi;+Wasehaña* akankunyi nindi ejima.
6 Wadihosheshaña mumuchima windi nindi: “Hiyamba kanyinkeshaku;*Kufuma kwikiñu dimu nakushika kwikiñu dikwawuHinamba kamonahu kukalaku.”+
פ [Pi]
7 Kanwa kindi kanenzali namashiñu, kutwamba, nimazu akutiyisha woma;+Kwishina dedimi dindi kudi kukala nikukatishana.+
8 Wabelamenaña kwakwihi nakwashakamañawu antu;Wafumaña heluña dindi haswamañayi nakujaha muntu wakadi muloña.+
ע [Ayini]
Mesu indi anakutalatala muntu wunahalwi.+
9 Wabelaminaña mwiluña dindi mwaswamañayi neyi mutupa wudi muwina windi.*+
Wahembelelaña kulonda akwati muntu wakadi akumukwasha.
Wakwataña muntu wakadi akumukwasha mukaleñi kindi neyi akikoka.+
10 Muntu wunakwatiyi wamuchikaña nakumunata heseki;Ahalwa aholokelaña mumakasa indi.*
11 Wahoshaña mumuchima windi nindi: “Nzambi navulameniku.+
Nafutaleliku.
Wamonaña wanyi.”+
ק [Kofu]
12 Nyamukaku, eyi Yehova.+ Eyi Nzambi, nyamunaku chikasa cheyi.+
Bayi wuvulamena antu abula wakuyikwashakuku.+
13 Muloñadi muntu watama chinamusupishiliyi Nzambi?
Wahoshaña mumuchima windi nindi: “Wakansompesha wanyi.”
ר [Reshi]
14 Ilaña eyi wamonaña kukala niyihuñu.
Watalaña nawa wamanishaña kukala.+
Antu ahalwa abalumukilaña kudi eyi;+Yeyi nkwashi yamwana wabula tata yindi.*+
ש [Shini]
15 Kotolaku chikasa chamuntu watama niwelaña yatama,+Kulonda neyi eyi wukukeñakeña kutama kwindi,Hiwukukwiwana nawa cheñiku.
16 Yehova hiMwanta haya nyaaka nanyaaka.+
Nyuza yinajiyi hamaseki.+
ת [Tawu]
17 Ilaña wakatiya mwakakulombawu amwovu, eyi Yehova.+
Wakakolesha nyichima yawu+ nawa wakayitiyilila nakanañachima.+
18 Mwana wabula tata yindi niantu anachikiki nyichima wakayisompelaku mwawuñanji,+Kulonda muntu wafwaña wekala heseki akabuli kuyitiyisha cheñi woma.+
Tumazu twaheshina
^ Hela “yafwilaña wumi windi.”
^ Hela hekwawu, “mukalwisu wadikiswilaña yomweni.”
^ Hela “wasupishaña.”
^ Hela “hinamba katedañilaku.”
^ Hela “mwivunda.”
^ Hela “mumazala indi akola.”
^ Hela “nshona.”
