Masamu 139:1-24
Damukulumpi wawañimbi. Isamu daDavidi.
139 Eyi Yehova, wunanshinshiki chikupu mukachi kami, nawa wunañiluki.+
2 Neyi nishakama hela ninyamuka, eyi welukaña.+
Yitoñojoka yami eyi wayilukilaña hahalehi.+
3 Neyi nenda hela nikaama, eyi wammonaña;*Weluka njila jami jejima.+
4 Hedimi dami hosi izu nidimuku,Ilaña talaña! Eyi Yehova, wunadiluki dehi chiwahi.+
5 Wannyeñumukaña, hanyima nihambidi yami;Nawa washaña chikasa cheyi hadi ami.
6 Kwiluka kwamuchidiwu kunankumishi maana.*
Kudi hahalehi chikupu, kwila nishikahu nehi.*+
7 Spiritu yeyi nukuyitemuka nakuya kudihi,Nawa kudihi kunukutemukila nakufuma kumesu eyi?+
8 Neyi nukukandama mwiwulu, eyi wukwikalamu,Nawa neyi naala kadidi kami Mwijamu,* talaña! eyi wukwikalamu.+
9 Neyi nukutuuka nampuula jankunku yakuchaNakuya nakushakama kukaluñalwiji kakwakulehi nankashi,
10 Nikwenoku chikasa cheyi chikunlombolaNawa chikasa cheyi chachidiilu chikunkwata.+
11 Neyi nihosha nami: “Chalala mwidima wukunsweka!”
Dikwila nawu wufuku wunannyeñumuki wukwikala chejeji.
12 Nimwidima hiwukwikala mwidima chikupu kudi eyiku,Ilaña wufuku wukutoñeka neyi mwaana;+Kudi eyi mwidima wudi tuhu neyi chejeji.+
13 Muloña eyi waleñeli nshiya jami;Wanswekeli* mwivumu damama yami.+
14 Nakushimekaña muloña antuña chachiwahi munjila yakuhayamisha.+
Nyidimu yeyi yakuhayamisha,+Neluka* chiwahi chumichi.
15 Mafwaha ami hiyakuswekeliwukuHantuñileñawu mwakujinda,Hannuñanuñileñawu mwishina damaseki mwamweni.+
16 Mesu eyi ammweni hinatuñikileña mwivumu;Yiidi yejima ayisonekeli mumukanda weyiKwesekeja namafuku iyatuñikileña,Henohu nichimu kanda chiikaliku.
17 Dichi, yitoñojoka yeyi ochiyasweja kuwaha kudi ami!+
Eyi Nzambi, ochiyavula neyi ayibomba yejima hamu!+
18 Neyi neseka nami niyichindi, yinabadiki wusekulula kuvula.+
Neyi nihinduka, nichidi hamu naneyi.*+
19 Eyi Nzambi, mwani kisañanaku antu atama!+
Kuhiñahu akamadombu* akufuma kudi ami,
20 Ana ahoshaña yuma yatama hadi eyi;*Hiyakankunyi neyi azatishaña ijina deyi munjila yamukunkulwayi.+
21 Komana hinahela ana akuhela, eyi Yehova,+Nikutiya wuzondu ana adikañaña naneyiku?+
22 Nayihela chikupu;+Anekali ayilumbu jami chikupu.
23 Nshinshiki chikupu mukachi, eyi Nzambi, kulonda wiluki muchima wami.+
Ntalatali chiwahi, kulonda wiluki yitoñojoka yami yakwakama.+
24 Talaku neyi mumuchima wami mudihu njila yatama,+Nawa nlomboli+ munjila yahaya nyaaka nanyaaka.
Tumazu twaheshina
^ MuchiHeberu, “kupima.”
^ Hela “kunasweji, kwila nikwiluka nehi.”
^ Hela “kunanhayamishi chikupu.”
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela hekwawu, “wampikwili.”
^ Hela “Wumi wami weluka.”
^ Hela hekwawu, “nukutwesha kuyichinda.”
^ Hela “muloña wamashi.”
^ Hela “kwesekeja nayitoñojoka yawu.”
