Masamu 21:1-13
Kudi mukulumpi wawañimbi. Isamu daDavidi.
21 Eyi Yehova, mwanta wazañalelaña muñovu jeyi;+Ochazañalelañayi chikupu munyidimu yeyi yawamwinu!+
2 Wunamwinki yuma yafwilaña muchima windi,+Nawa hiwunamukiishi yuma yalombaña nyivumbu yindiku. (Sela)
3 Muloña eyi wayaña nakudibulakana nindi nankisu jasweja chikupu;Wamuvwikaña chibañula chawuru yayiwahi* kumutu windi.+
4 Wakulombeli wumi, nawa wamwinkeliwu,+Wumi wawulehi,* haya nyaaka nanyaaka.
5 Nyidimu yeyi yawamwinu yamuleteshaña kwikala walema chikupu.+
Wamwinkeli kulema niwukeleñi.
6 Wamwilishaña kwikala wakiswilewa haya nyaaka;+Wamutiyishaña kuwaha muloña wekala kwakwihi nayena.*+
7 Muloña mwanta wakuhwelela mudi Yehova;+Muloña wakukeña kwakashinshi kwaMukakubadika Chikupu, hiyamba kamunyinkeshaku.*+
8 Chikasa cheyi chakawana ayilumbu jeyi ejima;Chikasa cheyi chachidiilu chakawana antu akuhela.
9 Wakayilisha kwikala neyi luteñu lwakesi hampinji yakutoñola dehi hiwakayisha maana.
Yehova wakayiminya mukuzuwa kwindi, nawa kesi kakayinoñesha.+
10 Akunyitaña yawu,* eyi wakayijilumuna heseki,Nikujilumuna anyanawu nakuyifumisha hakachi kawanyana kawantu.
11 Muloña afuukwili kukwila chatama;+Anakasi tufuta tukubula kuzatika.+
12 Muloña eyi wakaletesha akafuntimu+Kuhitila mukwinyika wuta weyi wamukunji* hadi wena.*
13 Nyamukaku, eyi Yehova, nañovu jeyi.
Tukwimba tumina twakushimeka ñovu jeyi.
Tumazu twaheshina
^ Hela “yakweñununa chiwahi.”
^ MuchiHeberu, “Kuleha kwamafuku.”
^ MuchiHeberu, “kumesu indi.”
^ Hela “hamba katedañilaku.”
^ MuchiHeberu, “Nyikaabu yawu.”
^ MuchiHeberu, “nyikunji.”
^ MuchiHeberu, “kumesu awu.”