Masamu 33:1-22
33 Dikuwenu namuzañalu, enu aloña, muloña waYehova.+
Chatelela antu aloña kumushimeka.
2 Muhamekenu Yehova nakadada;Mwimbilenu tumina twakumushimeka nachisanji chanyonji 10.
3 Mwimbilenu kamina kakaha;+Imbenu chiwahi nanyonji, ninyiñula yamuzañalu.
4 Muloña izu daYehova doloka,+Nawa yuma yejima yelañayi yalala.
5 Wakeña kuloña niwuñanji.+
Iseki denzala nakukeña kwaYehova kwakashinshi.+
6 Nezu daYehova mawulu ayituñili,+Nawa yuma yejima yekalamu* yatuñikili naspiritu* yamukanwa kindi.
7 Wapompeshaña menji amutuluñalwiji neyi ijiya;+Washaña menji ampupa mumatala akuhembela yuma.
8 Iseki dejima dimutiyi Yehova woma.+
Antu ashakamaña heseki dawushi amutiyi woma.
9 Muloña wahosheli, nawa dekaliliku;+Washiliku lushimbi, nawa dashimatili.+
10 Yehova naluwañeshi tufuta* twawakanyuza;+Nakañeshi munafuukuliwu* antu.+
11 Ilaña mwafuukulañayi* Yehova mwakakola haya nyaaka;+Yitoñojoka yamumuchima windi yatwalekañahu kumakiñu ejima.
12 Wudi namuzañalu yowu muza wukweti Nzambi yawu Yehova,+Antu atondayi kwikala iheta dindi.+
13 Yehova watalaña hamaseki iku wudi mwiwulu;Wamonaña anyana kawantu ejima.+
14 Iku wudi mwiluña mwashakamañayi,Washinshikaña antu ashakama hamaseki.
15 Yena diyi watuñaña nyichima yawantu ejima;Washinshikaña nyidimu yawu yejima.+
16 Kwosi mwanta apulwishañawu kudi amashidika amavuluku;+Muntu mukañovu hapulukaña nañovu jindi jaswejaku.+
17 Kawalu kwila kamwamwina nehi;+Ñovu jaku jabadika kwila jimukwasha kutemuka nehi.
18 Talenu! Disu daYehova datalaña antu ejima amutiyaña woma,+Antu achiñililaña kukeña kwindi kwakashinshi,
19 Kulonda ayamwini* kukufwaNikuyihemba amomi mumpinji yanzala.+
20 Etu* tunakumuchiñilila Yehova.
Yena diyi nkwashi yetu nawa nkebu yetu.+
21 Nyichima yetu yazañalelaña mudi yena,Muloña twakuhwelela ijina dindi dajila.+
22 Kukeña kweyi kwakashinshi kwiikali hadi etu, eyi Yehova,+Hitunakukuchiñilila.+
Tumazu twaheshina
^ MuchiHeberu, “izaza dawu dejima.”
^ Hela “muuya.”
^ Hela “nkeñelu.”
^ Hela “yitoñojoka.”
^ Hela “nkeñelu.”
^ Hela “amwini wumi wawu.”
^ Hela “Wumi wetu.”
