Masamu 34:1-22
DaDavidi, hadibalumwiniyi nakwikala neyi chizaluki+ hamesu aAbimeleki, owu wamuhañili nawa wafuminiku.
א [Alefu]
34 Nukumushimekaña Yehova mpinji yonsu;Mazu akumushimeka akwikalaña kunyivumbu yami mpinji yejima.
ב [Beti]
2 Ami* nukudisambila mudi Yehova;+Amwovu akatiya nawa akazañalala.
ג [Gimeli]
3 Mulemeshenu Yehova hamu nanami;+Twayenu tutuumbakeshi ijina dindi hamu.
ד [Daleti]
4 Namwihwili Yehova, nawa wañakwili.+
Wampulwishili kuyuma yejima yantiyishileña woma.+
ה [Hi]
5 Ejima atalili kudi yena azañaleli;Hiyatiyishili nsonyi kumesu awuku.
ז [Zayini]
6 Iwu wakehelamu watambikili, nawa Yehova watiyili.
Wamwamwinini kuyihuñu yindi yejima.+
ח [Heti]
7 Kañelu kaYehova wakiñaña ana amutiyaña Nzambi woma,+Nawa wayipulwishaña.+
ט [Teti]
8 Tompenu mumoni chawahayi Yehova;+Wudi namuzañalu yowu muntu wabatamaña mudi yena.
י [Yodi]
9 Mutiyenu Yehova woma, enu indi ajila ejima,Muloña antu amutiyaña woma hiyakakaankila chumaku.+
כ [Kafu]
10 Ninyenzi yanyitupa yakola* yinafwi nzala,Ilaña antu amukeñakeñaña Yehova hiyakakaankila chuma chachiwahiku.+
ל [Lamedi]
11 Twayenu, enu anyanami, ntiyililenu;Nukuyidizisha kumutiya Yehova woma.+
מ [Memu]
12 Hinyi hakachi kenu wadiluñishaña wumiNawa wukukeña kumona mafuku amawahi amavulu?+
נ [Nuni]
13 Komana hembaku idimi deyi kuyuma yatama,+Ninyivumbu yeyi yibuli kuhosha makudi.+
ס [Sameki]
14 Lekaku kwila yuma yatama, ilaña ilaku yayiwahi;+Keñakeñaku kuwunda nawa kufwili chikupu.+
ע [Ayini]
15 Mesu aYehova adi hadi antu aloña,+Nawa matu indi atiyaña kudila kwawu kwakulomba wukwashu.+
פ [Pi]
16 Ilaña kumesu aYehova kwahela antu anakwila yatama,Wakayijilumuna ejima kulonda akabuli kuyanuka cheñi heseki.+
צ [Tisadi]
17 Abileleli, nawa Yehova wachitiyili;+Wayipulwishili kuyihuñu yawu yejima.+
ק [Kofu]
18 Yehova wudi kwakwihi nawantu abaluka nyichima;+Wamwinaña antu achikeka muspiritu.*+
ר [Reshi]
19 Muntu waloña wamonaña kukala kwakuvulu,*+Ilaña Yehova wamupulwishaña mukukala kwejima.+
ש [Shini]
20 Nakuhemba mafwaha indi ejima;Kwosi nidimu dinakotokiku.+
ת [Tawu]
21 Yihuñu yakamujaha muntu watama;Antu ahela waloña akayifwisha namuloña.
22 Yehova nakukuula wumi wawambuñindi;Kwosi niwumu hakachi kanowu anakubatama mudi yena akawanawu namuloñaku.+
Tumazu twaheshina
^ Hela “Wumi wami.”
^ Hela “nyenzi yanyitupa yawamayala.”
^ Hela “ananeñi.”
^ Hela “yihuñu.”