Masamu 35:1-28
DaDavidi.
35 Eyi Yehova, nhakwiliku muloña wami kudi antu adikañaña nanami;+Zuñaku nawantu azuñaña nanami.+
2 Nonaku nkebu yeyi yanyanya* ninkebu yeneni,+Nawa nyamukaku kulonda wunkiñi.+
3 Anakunhaña, yinyamwini iyoña deyi nichizembi chakunjita.*+
Nleji neyi:* “Ami yami wamwinu weyi.”+
4 Owu anakuzomba wumi wami ayitiyishi nsonyi nawa asawuki.+
Owu anakukasa kafuta nawu ankisañani afuntimu iku anatiyi nsonyi.
5 Ekali neyi muzuñu mumpepela;Kañelu kaYehova kayikumpishi.+
6 Munjila yawu mwiikali mwidima nawa museneniHakuyikumpishañawu kudi kañelu kaYehova.
7 Muloña anasweki kaleñi kulonda ankwati chakadi muloña;Anampundili ibuku chakadi muloña.
8 Kukala kumushikeni mukukasumwisha;Kaleñi kanaswekiyi kamukwati yomwenindi;Afwimu yomweni nawa ajilumuki.+
9 Ilaña ami* nukuzañalela mudi Yehova;Nukuzañalela chikupu munyidimu yindi yawamwinu.
10 Mafwaha ami ejima akahosha nawu:
“Eyi Yehova, hinyi wudi neyi eyi?
Wapulwishaña antu abula wakuyikwasha kudi antu akweti ñovu,+Abula wakuyikwasha niatuzweñi kudi owu ayibuwaña.”+
11 Ayinsahu atwambaña enzaña,+Nakuñihula hayuma yinnabuli kwiluka.
12 Anfwetaña yuma yatama chatela anfweti yuma yayiwahi,+Nakunletesha nitiyi chineñi.
13 Ilaña hakatiliwu, navwalili yisasa;Nadikabishili* nakushakama chakadi kuda,Nawa habuliliwu kwakula kulomba kwami,*
14 Nendeleña nakudila neyi kwiji inakudila ibwambu dami hela manakwami;Nafukamini iku naneñi, neyi kwiji muntu wunakudila mama yindi.
15 Ilaña hinahukeni, azañaleli nawa adipompesheli hamu;Adipompesheli hamu nakumbelamena kulonda anjahi;Antaboleli nawa amwenenihu wanyi.
16 Antu abulaña kumwakama Nzambi ansehaña nakunsupisha,Ansumonenaña kumazewu awu.+
17 Eyi Yehova, wukutalañaku hohu kushika mpinjinyi?+
Mpulwishi kumakasa awu,+Pulwishaku wumi wami walema kudi nyenzi yanyitupa.*+
18 Kuhiñahu nukukusakilila muchipompelu cheneni;+Nukukushimeka hakachi kawantu.
19 Bayi witeja owu anekali ayilumbu jami hakadi muloña azañalali muloña wanamiku;Bayi witeja owu anhela chakadi muloña+ annyachili mesu awu chatamaku.+
20 Muloña hiyahoshaña mazu akuwundaku,Ilaña akwatilaña antu awunda amwituña tufuta twakudimbana.+
21 Asamaña mutunwa twawu kulonda anfwishi namuloña,Nakuhosha nawu: “Anha! Anha! Tunadimweni namesu etu.”
22 Wunadimweni chumichi, eyi Yehova. Bayi wumwenahuku.+
Eyi Yehova, bayi wikala kwakulehi nanamiku.+
23 Nyamukaku kulonda wunkiñi,Nzambi yami, Yehova, nhakwiliku muloña wami.
24 Nsompeshi kwesekeja nakuloña kweyi,+ eyi Yehova Nzambi yami;Bayi wuyiteji azañalali muloña wanamiku.
25 Bayi adihoshesha awenawu nawu: “Anha! Tunekali nayuma yitwakeñeleñaku.”
Bayi ahosha nawu: “Tunamuminyiku.”+
26 Lekenu ejima wawu ayitiyishi nsonyi nikuyisawula,Owu azañalalaña nayihuñu yami.
Lekenu antu adinyamunaña hadi ami ayitiyishi nsonyi nikuyisawula.
27 Ilaña lekaku antu atiyaña kuwaha kuloña kweyi adikuwi namuzañalu;Atwalekihu kuhosha nawu:
“Yehova amutuumbakeshi, wazañalelaña mukuwunda kwakambuñindi.”+
28 Kuhiñahu idimi dami dikwanuka* kuloña kweyi+Nawa nukukushimeka mwaana wejima.+
Tumazu twaheshina
^ Kakavulu iji nkebu janyanya ajisendeleña kudi akakwasa namata anyikunji.
^ Hela “chizemba chawumwemu kuyedi.”
^ Hela “wumi wami.”
^ Hela “wumi wami.”
^ Hela “wumi wami.”
^ Hela “hikwafuntileña muntulu yami.”
^ Hela “nyenzi yanyitupa yawamayala.”
^ Hela “dikutoñojoka chikupu.”
