Masamu 38:1-22
Isamu daDavidi, dakumwanukisha nachu.
38 Eyi Yehova, bayi wunhoshola iku wunazuwi,Hela kuñolola iku wunazuwiku.+
2 Muloña nyivu yeyi yinampwiki mukachi chikupu,Nawa chikasa cheyi chinanchichimiki heseki.+
3 Mujimba wami wejima wunakati* muloña wakuzuwa kweyi.
Mumafwaha ami mwosi kuwunda muloña wanshidi jami.+
4 Muloña yiluwa yami yinabuti mutu wami;+Yinambadiki ñovu chikupu neyi chiteli chalema.
5 Yilonda yami yinatoki nawa yinakununka chikupuMuloña wakusupa kwami.
6 Naneñi nawa natiyi chikela chikupu;Nendaña hohu nachineñi mwaana wejima.
7 Mukachi kami munakuha;*Mujimba wami wejima wunakati.+
8 Natiyi wujinji nawa nachikeki chikupu;Muchima wami wunakukata wunaleteshi naabeña nankashi.*
9 Eyi Yehova, yuma yinafwilaña yejima yidi kumesu eyi,Nawa kwaaba kwami hikunaswami kumesu eyiku.
10 Muchima wami wunakweta, ñovu jami jinamani,Nawa chejeji chamesu ami chinaleki kutoñeka.+
11 Amabwambu jami niantu inadikunda nawu antondolwelaña muloña wayihuñu yami,Nawa antu inadiluka nawu chikupu emenaña hahalehi.
12 Antu akeñaña wumi wami antilaña nyihetu;Owu akeñaña kunkatisha ahoshaña hakujilumuna;+Adishawutilaña jamakudi mpinji yejima.
13 Ilaña kufwana njika matu, nukutiya wanyi;+Kufwana kamama, hinukwasama kanwa kamiku.+
14 Nekali neyi njika matu,Wukweti kanwa kanabuli jakuhosha hakudihakwilaku.
15 Muloña nakuchiñililili, eyi Yehova,+Nawa wañakwili, eyi Yehova Nzambi yami.+
16 Muloña nahosheli nami: “Bayi azañalala muloña wanamiHela kuditohesha hadi ami neyi nyendu yami yinaselumukiku.”
17 Muloña kwashalili hohu hanti nakudimbuka,Nawa natiyileña kukata mpinji yejima.+
18 Nashimwini chiluwa chami;+Nakabakeni muloña wanshidi jami.+
19 Ilaña ayilumbu jami akola* nawa akweti ñovu,*Antu anhela hakadi muloña anasweji kuvula.
20 Anfweteli yuma yatama chatela anfweti yayiwahi;Ankañesheleña kufwila yuma yayiwahi.
21 Bayi wunshiya chisayikilaku, eyi Yehova.
Eyi Nzambi, bayi wimena hahalehi nanamiku.+
22 Nyakalaku kunkwasha,Eyi Yehova, wamwinu wami.+
Tumazu twaheshina
^ MuchiHeberu, “mumujimba wami mwosi kukola.”
^ MuchiHeberu, “Nkuma jami jinenzali nakuha.”
^ Hela “nibulumeña.”
^ MuchiHeberu, “amomi.”
^ Hela hekwawu, “Ilaña ayilumbu jami hakadi muloña amavulu.”