Masamu 55:1-23
Kudi mukulumpi wawañimbi; kwimba nayisanji yanyonji. Masikilu.* DaDavidi.
55 Tiyaku kulomba kwami, eyi Nzambi,+Nawa bayi wudiwula kulomba kwami kwakuntiyila luwiku.*+
2 Ñushi maana nawa ñaakuli.+
Kwakama kwami kwaleteshaña niluluteña,+Nawa naluwankani chikupu
3 Muloña wayuma yinakuhoshayi chilumbuNikukala kunakuletayi muntu watama.
Muloña alumbikaña mulumba wakukala hadi ami,Nawa anhembelaña nkunyi iku anazuwi.+
4 Muchima wami wunakuyeña mwivumu dami,+Nawa woma wakufwa wunankwati.+
5 Woma nikuzaala jinanshikeni,Nawa mutentu wunankwati chikupu.
6 Nahoshaña nami: “Neyi nadiñi nampuula neyi kapompa!*
Mutenowu nadi kutuuka nakuya nakushakama mwakiñewa.
7 Tiyaña! Nadi kutemukila kwakulehi nankashi.+
Nadi kushakamaña mwisaña.+ (Sela)
8 Nadi kutemukila swayi kwiluña dakwiyamamuKwakulehi nampepela yañovu, kwakulehi nanvula yampepela.”
9 Yiluwañeshi, eyi Yehova, nawa kañeshaku tufuta twawu,*+Muloña namoni madombu niwufwinda mumusumba.
10 Anyeñumokaña hambañu jawu mwaana niwufuku;Mukachi kawu mudi kuhelañana niikabisha.+
11 Mukachi kawu mudi kujilumuka;Makabisha nimakudi hijafumaña mulubanza lwawuku.+
12 Bayi neyi chilumbu diyi wansupishañaku;+Muloña nadi kuumika.
Bayi neyi chilumbu diyi wunañimakeniku;Muloña nadi kumuswama.
13 Ilaña yeyi, muntu wudi neyi ami,*+Ibwambu dami ineluka chikupu.+
14 Twadiña nakudiluñisha wubwambu hamu;Mwitala daNzambi twadiña nakwendela hamu nezaza.
15 Kujilumuka kuyishikeni!+
Akunkumukili Mwijamu* iku amomi;Muloña kutama kudi mudi wena nawa kwashakamaña mukachi kawu.
16 Hakwila ami kwami, nukumutambika Nzambi,Nawa Yehova wukuñamwina.+
17 Nakabakanaña nikwaaba namelela, ntetemena nimwaana,+Nawa yena watiyaña izu dami,+
18 Wakañamwina kudi antu anakunzuñisha nawa wakanyinka kuwunda,Muloña mazaza enzaña nakuñimakena.+
19 Nzambi wakatiya nawa wakayakula,+Owu washakama hetanda kufuma kunyaaka.+ (Sela)
Akakaana kuhimpa,Owu anabuli kumutiya Nzambi woma.+
20 Walukukili antu adiñi mukuwunda nayena;+Wafumpili chitiyañenu chindi.+
21 Mazu indi akulambisha kubadika bata,*+Ilaña wufwinda wudi mumuchima windi.
Mazu indi amwovu kubadika manji,Ilaña himpoku jatubali jakusomona dehi.+
22 Umbilaku chiteli cheyi hadi Yehova,+Nawa yena wukukukwasha.+
Yena hamba keteja muntu waloña kudimbukaku.*+
23 Ilaña eyi, eyi Nzambi, wakayikunkumwishila mwibuku dasweja kukunama.+
Antu adi namuloña wamashi niwamakudi hiyamba kashakama nakushika muchikunku chamafuku awuku.+
Ilaña ami kwami, nukukukuhwelela eyi.
Tumazu twaheshina
^ Talenu Kulumbulula.
^ Hela “bayi wuswama neyi nilomba wukwashuku.”
^ Hela “kankudimba.”
^ MuchiHeberu, “aambulaku idimi dawu.”
^ Hela “muntu, mutwesekena.”
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela “manteka.”
^ Hela “kutedañila.”
