Masamu 62:1-12
Kudi mukulumpi wawañimbi; daYedutuni.* Isamu daDavidi.
62 Mwalala, namuhembelelaña* Nzambi nakudiwunjika.
Wamwinu wami wafumaña kudi yena.+
2 Mwalala, diyi ilola dami nawa wamwinu wami, chiswamu chami chakiñewa;*+Hiyamba kanyinkesha nankashiku.+
3 Mukutwalekahu kumukatisha muntu kushika mwakanyi kulonda mumujahi?+
Ejima wenu mudi neyi mbañu yinaheñi, neyi mbañu yakutuña namalola yinakukeña kuhumuka.*
4 Muloña atiyañanaña hamu kulonda amufumishi hachifulu chindi cheneni;*Atiyaña kuwaha kutwamba.
Akiswilaña nakanwa kawu, ilaña munyichima yawu anakushiñana.+ (Sela)
5 Mwalala, namuhembelelaña* Nzambi nakudiwunjika+Muloña kuchiñeja kwami kwafumaña kudi yena.+
6 Mwalala, diyi ilola dami nawa wamwinu wami, chiswamu chami chakiñewa;Hiyamba kanyinkeshaku.+
7 Hadi Nzambi dihashindamena wamwinu wami nikulema kwami.
Ilola dami dakola, chiswamu chami, diyi Nzambi.+
8 Mukuhwelelenu mpinji yejima, enu antu.
Huñununenu nyichima yenu kudi yena.+
Nzambi diyi chiswamu chetu.+ (Sela)
9 Anyana kawantu himuuya hohu,Anyana kawantu hichilota hohu.+
Neyi ejima wawu ayisha hamasikelu, apeela kubadika muuya.+
10 Bayi mukuhwelela mukubuwaHela kusha kuchiñeja kwamukunkulwayi mukwiyaku.
Neyi maheta enu avula, bayi mushahu muchima wenuku.+
11 Natiyi kapampa kayedi nami Nzambi nahoshi nindi:
Ñovu yambala yaNzambi.+
12 Cheñi nawa kukeña kwakashinshi kweyi, eyi Yehova,+Muloña wafwetaña muntu wejima kwesekeja nanyidimu yindi.+
Tumazu twaheshina
^ Talenu Kulumbulula.
^ Hela “wumi wami wamuhembelelaña.”
^ Hela “kaposhi kakiñewa.”
^ Hela hekwawu, “Ejima wenu, neyi kwiji wadiña mbañu yaheña, neyi mbañu yakutuña namalola yinakukeña kuhumuka.”
^ Hela “kulema kwindi.”
^ Hela “hembelelaku nakudiwunjika, eyi wumi wami.”