Masamu 78:1-72
Masikilu.* Isamu daAsafi.+
78 Tiyililenu kunshimbi jami,* enu antu jami;Teñelekenu itu denu kumazu amukanwa kami.
2 Nukuhosha nachishimu.
Nukuhosha yuma yakujinda yakunyaaka oko-o.+
3 Yuma yitwatiyili nikwiluka,Oyu yatulumbulwililiwu ankakulula jetu,+
4 Hitwakayijinda kudi anyanawuku;Twakayileja makiñu akenza+Nyidimu yaYehova yatelela kushimekewa niñovu jindi,+Nyidimu yayiwahi yinakoñiyi.+
5 Washili chanukishu mudi YakobaNawa washili lushimbi mudi Isarela;Walejeli ankakulula jetuKulejamu anyanawu yumiyi kulonda ayiluki,+
6 Kulonda ikiñu dakahiñahu,Anyana akavwalika kumbidi, akayiluki.+
Kufumahu niwena akalejimu anyanawu.+
7 Kuhiñahu awa anyana akamukuhwelela Nzambi.
Hiyamba kavulamena nyidimu yaNzambiku+Ilaña akahembaña nshimbi jindi.+
8 Kufumahu hiyakekala neyi ankakulula jawuku,Ikiñu dawinyi nawa dadikaña,+Ikiñu dadiña namuchima wabula kukola*+Nawa dadiña naspiritu yabulili kushinshika kudi Nzambi.
9 Eni Efuremu adimanyekeli mata anyikunji,Ilaña hefuku danjita atemukili nakufuntamu.
10 Akañenyi kuhemba chitiyañenu chaNzambi+Nawa akaanini kwenda munshimbi jindi.+
11 Avulameneni niyuma yakoñeliyi,+Ninyidimu yindi yayiwahi yayimwekesheleliyi.+
12 Wakoñeli yuma yayiwahi chikupu hamesu awankakulula jawu,+Mwituña daEjipitu, iluña daZowani.+
13 Waambwili kaluñalwiji kulonda ahiti hakachi,Nawa wemikili menji neyi mbañu.+
14 Namwaana wayilombweleña nevuNawa nawufuku wejima wayilombweleña nachejeji chakesi.+
15 Wabalwili malola mwisaña,Wayinwishili menji amavulu neyi kwiji anakufuma henyiñi.+
16 Wabuzili tuloña mwilolaNawa wakojejeli menji kuhita neyi tuloña.+
17 Ilaña atwalekelihu kumuvulumunaKuhitila mukudikaña naMukakubadika Chikupu mwisaña;+
18 Amwesekeli Nzambi munyichima yawu+Kuhitila mukumukanjikija nawu ayinki yakuda yakeñesheliwu.*
19 Dichi ahosheli chatama hadi Nzambi,Nawu: “Komana Nzambi nateli kwaala mesa mwisaña?”+
20 Talenu! Weteli ilolaChakwila menji atachikili kwidika nawa enzesheli tuloña.+
“Komana wukutwesha cheñi kutwinka dinkendi,Hela kwinka antu jindi mbiji?”+
21 Yehova chayitiyiliyi, wazuwili nankashi;+Kesi+ kenjili hadi Yakoba,Nawa kuzuwa kwindi kwenjili hadi Isarela+
22 Muloña amukuhweleleli Nzambi wanyi;+Hiyakuhweleleli muñovu jindi jakuyamwinaku.
23 Dichi walejeli iwulu damavu,Nawa wenzunwini yiisu yamwiwulu.
24 Watwalekelihu kunokesha manina kulonda adii;Wayinkeli mbutu yamwiwulu.+
25 Antu adiili dinkendi dawakañovu;*+Wayinkeli yakuda yayivulu yakuyikutisha.+
26 Wasañumwini mpepela yakumusela mumawuluNawa wakunkishili mpepela yakukabeta kakuchidiilu nañovu jindi.+
27 Nawa wayinokesheleli mbiji neyi lunkuñu,Atuda neyi wusekulula wakuchikumu chakaluñalwiji.
28 Wajiholweleli hakachi kachilombu chindi,Kunyeñumuka matenti indi ejima.
29 Adiili nawa ekutili nakubadikisha;Wayinkeli yuma yafwilileñawu.+
30 Ilaña henohu chipepa chawu kanda chimani,Iku yakuda yichidi mutunwa twawu,
31 Kuzuwa kwaNzambi kwayibutukilili.+
Wajahili antu jawu akola chikupu;+Wajilumwini anyikwenzi jaIsarela.
32 Hela chakwila amweni yumiyi, aswejesheli kukoñelaku nshidi+Nawa hiyakuhweleleli munyidimu yindi yayiwahiku.+
33 Dichi wakumishili mafuku awu neyi kwoona,+Nawa yaaka yawu wayikumishili nayihuñu yakukasumwisha.
34 Ilaña neyi nasweji kuyijaha, adiña nakumukeñakeña;+Afuntileña nakumukeñakeña Nzambi,
35 Nakwanuka nawu Nzambi wadiña Ilola dawu+Nawa nawu Nzambi Mukakubadika Chikupu wadiña Nkuuli yawu.*+
36 Ilaña esekeli kumudimba nakanwa kawuNawa atwambili kudi yena nedimi dawu.
37 Muchima wawu hiwemeni chakola kudi yenaku;+Nawa hiyahembeli chitiyañenu chindiku.+
38 Ilaña wadiña nakuyitiyila luwi;+Wayanakeneneña* yiluwa yawu nikubula kuyijilumuna.+
Kakavulu wakañesheleña kuzuwa kwindi+Chatela asañumuni kuzuwa kwindi kwejima.
39 Muloña wanukili nindi adiña nyisunyi hohu,+Mpepela yakunkaña nakuhita nawa yabulaña kufunta.*
40 Ochadikañiliwu nayena kakavulu mwisaña+Nakumutiyisha kutama muchinkalampata!+
41 Amwesekeli Nzambi mapampa amavulu,+Nawa amuneñesheli* Wajila waIsarela.
42 Hiyanukili ñovu* jindiku,Ifuku dayipulwishiliyi* kudi mukankunyi,+
43 Ochamwekesheliyi yinjikijilu yindi muEjipitu+Niyihayamisha yindi mwiluña daZowani,
44 Nichabalumwiniyi nyifwolu yaNile kwikala mashi+Chakwila akañenyi kunwa mutuloña twawu.
45 Watumini nyikanka yamavutula kulonda yiyidii.+Niyuula kulonda yiyijilumuni.+
46 Wenkeli atuboola azuzuka mbutu jawu,Nyikaabu yakabakeneniwu wayihanini kudi nyikanka yatuboola.+
47 Wakisañeni nyivinyu yawu+Ninyitondu yawu yasikamo nanvula yamalola.
48 Tunyama twawu twasendaña yiteli watuhanini kunvula yamalola+Nawa yimuna yawu wayijahili nanzaji.
49 Wayilemekeli kuzuwa kwindi kwasweja,Kulendumuka, kuhila niyihuñu,Mazanvu awañelu aleteli makabi.
50 Wapulili njila yakuzuwa kwindi.
Hayamwinini kukufwaku;Nawa wayijahili* nayipupu.
51 Nkumininaku wajahili anyana awedi ejima amuEjipitu,+Ntachikilu yañovu yawu yalusemu mumatenti aHami.
52 Kuhiñahu wedishili antu jindi neyi mukanka wayimuna+Nikuyilombola neyi mukanka wayimuna mwisaña.
53 Wayilombweli nakuyikiña,Nawa atiyileña woma wanyi;+Kaluñalwiji kabutili ayilumbu jawu.+
54 Nawa wayileteli kwiluña dindi dajila,+Idi iluña damapidi datambwiliyi nachikasa chindi chachidiilu.+
55 Watemwini nyuza kumesu awu;+Wayipiminini wuswana wawu kuzatisha mwonji wakupima nachu;+Waswanishili nyichidi yaIsarela mumatala awu.+
56 Ilaña atwalekelihu kumweseka Nzambi Mukakubadika Chikupu nikudikaña nayena;+Hiyashili maana kuyanukishu yindiku.+
57 Amufutaleleli cheñi nawa adiña akakudimbana neyi ankakulula jawu.+
Adiña ashindamenewa wanyi neyi wuta wamukunji wabumbula.+
58 Atwalekelihu kumuvulumuna nayinañanaña yawu,+Nawa amukojejeli azuwi* nawankishi jawu akusoña.+
59 Nzambi wachitiyili nawa wazuwili nankashi,+Dichi wamukaanini chikupu Isarela.
60 Nkuminaku washiyili tabanaka yakuShilo,+Itenti mwashakamineñayi hakachi kawantu.+
61 Wetejeli chinjikijilu chañovu yindi kuya muwunkoli;Lubanji lwindi kuya muchikasa chamukankunyi.+
62 Wahanini antu jindi kumpoku yakabali+Nawa wazuwilili chikupu wuswana windi.
63 Kesi kanooñesheli anyikwenzi indi,Nawa ajiki* indi hiyayimbilili tumina twamawijaku.*
64 Atupristu indi afwili nampoku yakabali,+Nawa antuluwa jawu hiyadililiku.+
65 Kuhiñahu Yehova wahindukili neyi kwiji nafumi mutulu,+Neyi iyala wañovu+ wunahinduki hanyima yakunwa vinyu yayivulu.
66 Wayitemwini akankunyi nindi;+Nawa wayitiyishili nsonyi yahaya nyaaka.
67 Wakaanini itenti daYosefu;Hatondeli muchidi wa Efuremuku.
68 Ilaña watondeli muchidi waYuda,+Mpidi yaZiyona, yakeñayi.+
69 Welishili iluña dindi dajila kushimbula neyi mawulu,*+Neyi iseki dashimatishayi haya nyaaka.+
70 Watondeli Davidi+ kambuñindiNakumufumisha kwiyinda danyikoku,+
71 Wamufumishili kumudimu wakwakamena anyikoku anyikaji;Wamwilishili kwikala kabiña hadi Yakoba, antu jindi,+Nihadi Isarela, wuswana windi.+
72 Wayibiñili namuchima wakashinshi,+Nawa wayilombweli namakasa awukalawenu.+
Tumazu twaheshina
^ Talenu Kulumbulula.
^ Hela “kukuleja kwami.”
^ MuchiHeberu, “kudiloñesha.”
^ Hela “yakuda yawumi wawu.”
^ Hela “dawañelu.”
^ Hela “Mukakutenda.”
^ MuchiHeberu, “Wabutileña.”
^ Hela hekwawu, “Spiritu yinakuya nawa hiyafuntañaku.”
^ Hela “amukatishili.”
^ MuchiHeberu, “chikasa.”
^ MuchiHeberu, “dayikuuliliyi.”
^ MuchiHeberu, “wajahili wumi wawu.”
^ Hela “amutiyishili mukawu.”
^ Awa hiyambanda abula kukaamahu dehi nawamayala.
^ MuchiHeberu, “Nawa ajiki indi ayishimekeli wanyi.”
^ MuchiHeberu, “Watuñili iluña dindi dajila neyi tuposhi.”
