Masamu 9:1-20
Kudi mukulumpi wawañimbi; kwimbila haMutalabeni.* Isamu daDavidi.
א [Alefu]
9 Nukukushimeka, eyi Yehova, namuchima wami wejima;Nukushimuna nyidimu yeyi yakuhayamisha yejima.+
2 Nukuzañalala nawa nukuluñila mudi eyi;Nukwimba tumina twakushimeka ijina deyi, eyi Mukakubadika Chikupu.+
ב [Beti]
3 Neyi ayilumbu jami atemuka nakufuntamu,+Akuhukana nakujilumukila hamesu eyi.
4 Muloña wanhakwilañaku mwawuñanji;Washakamaña hetanda deyi nakusompesha mwaloña.+
ג [Gimeli]
5 Wunahosholi nyuza+ nikujilumuna antu atama,Nakujima ijina dawu haya nyaaka nanyaaka.
6 Chilumbu anamujilumuni haya nyaaka;Wunabwiti nyisumba yawu,Hiyakayanukaña nawa cheñiku.+
ה [Hi]
7 Ilaña Yehova washakama hetanda haya nyaaka;+Washimatisha chikupu itanda dindi hasompeshelañayi mwawuñanji.+
8 Wakasompesha antu ashakama heseki* mukuloña;+Wakasompesha nyuza mwawuñanji.+
ו [Wawu]
9 Yehova wakekala chiswamu chakiñewa* kudi antu anakabishiwu,+Chiswamu chakiñewa mumpinji yayihuñu.+
10 Ana eluka ijina deyi akakukuhwelela;+Hiwamba kashiya antu akukeñakeñañaku, eyi Yehova.+
ז [Zayini]
11 Mwimbilenu Yehova tumina twakumushimeka, yena washakamaña muZiyona;Tiyakeshenu nyidimu yindi hakachi kawantu.+
12 Muloña Owu watendaña mashi awu wayanukaña;+Hamba kavulamena kudila kwawantu anakukabakanaku.+
ח [Heti]
13 Ntiyili luwi, eyi Yehova; talaku chinakunkabishawu antu anhela,Eyi wanyamunaña nakunfumisha kuyiisu yakufwa,+
14 Kulonda nishimuni nyidimu yeyi yatelela kuhamekewa muyiisu yamwana kaZiyona wamumbanda,+Nikuzañalela munyidimu yeyi yawamwinu.+
ט [Teti]
15 Nyuza yinaholokeli mwibuku dapundiliwu awenawu;Nyendu yawu yinafwi mukaleñi kaswekeliwu awenawu.+
16 Yehova amwilukilaña kuchasompeshañayi.+
Muntu watama anamulawuli mumudimu wakumakasa indi yomweni.+
Higayoni.* (Sela)
י [Yodi]
17 Muntu watama wakatemuka nakuya Mwijamu,*Nyuza yejima yakamuvulamena Nzambi.
18 Ilaña kazweñi hiyamba kamuvulamenaku;+Hela kuchiñeja kwamuntu wamwovu hikwamba kajiyaku.+
כ [Kafu]
19 Nyamukaku, eyi Yehova! Bayi witeja muntu wafwaña emiki mushinduku.
Nyuza ayisompeshi hamesu eyi.+
20 Yitiyishi woma, eyi Yehova,+Lekaku nyuza yiluki nawu hiyantu hohu afwaña. (Sela)
Tumazu twaheshina
^ Talenu Kulumbulula.
^ Hela “iseki dawushi.”
^ Hela “kaposhi kakiñewa.”
^ Talenu Kulumbulula.
^ Hela “Shelu,” dikwila nawu, ijamu dawantu ejima. Talenu Kulumbulula.