Yashimwiniyi Matewu 15:1-39
15 Kuhiñahu aFwarisi niansoneki enjili kudi Yesu kufuma kuYerusalema,+ nakumwihula nawu:
2 “Muloñadi atumbanji tweyi chamotokelañawu kashidikilu kawantu akushankulu? Chakutalilahu, adaña chakadi kwisuka.”*+
3 Dichi yena wayakwili nindi: “Muloñadi chimwamotokelaña nshimbi jaNzambi hamuloña wachisemwa chenu?+
4 Chakutalilahu, Nzambi wahosheli nindi, ‘Lemeshaku tata yeyi nimama yeyi,’+ nawa, ‘Muntu wejima wukumuhosha chatama* tata yindi hela mama yindi, amujahi.’+
5 Ilaña enu mwahoshaña nenu, ‘Muntu wejima wukuleja tata yindi hela mama yindi nindi: “Chuma chejima chinikweti chinateli kukukwasha eyi hichawaana chakumwinka Nzambi,”+
6 hatelela kumulemesha tata yindiku.’ Dichi munakojeji izu daNzambi kwikala damukunkulwayi muloña watushidikilu twenu.+
7 Enu anfwikiji, Isaya waprofweteli chachiwahi hadi enu hahosheliyi nindi:+
8 ‘Awa antu anlemeshaña hohu nanyivumbu yawu, ilaña nyichima yawu yidi kwakulehi nanami.
9 Kudifukula kwadifukulañawu kudi ami kwamukunkulwayi, muloña ntañishilu yawu yashindamena hanshimbi jawantu.’”+
10 Muloña wachumichi, watambikili izaza dawantu kwinza kwakwihi nawa wayilejeli nindi: “Tiyililenu kulonda mwiluki munatalishi awa mazu:+
11 Yuma yeñilaña mukanwa kamuntu bayi neyi diyamutamishañaku, ilaña yuma yafumaña mukanwa kindi diyamutamishaña.”+
12 Kuhiñahu, atumbanji enjili kudi yena nakumwila nawu: “Wuneluki ntahi neyi aFwarisi ahila chatiyawu mazu iwahosha?”+
13 Yena wayakwili nindi: “Mutondu wejima wabulili kutumbawu kudi Tata yami wekala mwiwulu akawubwita.
14 Yilekenu ahili. Hiyanlomboli aputa mesu. Muloña neyi mputamesu alombola mukwawu mputamesu, wejima wawu akuholokela mwibuku.”+
15 Petulu wamwakwili nindi: “Tulumbulwili munatalishi chakutalilahu.”
16 Chatiyiliyi ichi wayihwili nindi: “Komana ninenu kanda mwiluki muchinatalishiku?+
17 Komana enu mweluka wanyi nenu chuma chejima cheñilaña mukanwa chahitaña muchipumba, kuhiñahu hichikuya mumusalanyiku?*
18 Hela chochu, yuma yejima yedikaña mukanwa yafumaña mumuchima nawa yumoyu diyamutamishaña muntu.+
19 Chakutalilahu, mumuchima dimwafumaña yitoñojoka yatama,+ kujahañana, wujila, wuvumbi,* wukombi, wunsahu wakutwamba nimatuka.
20 Iyi diyuma yatamishaña muntu; ilaña kuda chakadi kwisuka* kumakasa hikwatamishaña muntuku.”
21 Chafuminiyi kwenoku, Yesu wayili kwiluña damuTira niSidoni.+
22 Nawa hohenohu! mumbanda mwini Fwenisiya wamunodu iluña, wenjili nawa wamwaabilili nindi: “Ntiyili luwi, Mwanta, Mwana kaDavidi. Mwanami wamumbanda nakabakani nankashi nandemoni.”+
23 Ilaña wamwakwili wanyi. Dichi atumbanji twindi enjili nawa atachikili kumuleja nawu: “Muleji ayi, muloña nasweji kutwaabila.”
24 Wayakwili nindi: “Hiyantemesheli kwinza kudi muntu wudi wejimaku, chiña hohu kudi anyikoku ajimbala amwitala daIsarela.”+
25 Ilaña mumbanda wenjili nawa wadifukwili* kudi Yesu, nakuhosha nindi: “Mwanta, nkwashi!”
26 Hakwakula wahosheli nindi: “Chachiwahi wanyi kunona dinkendi dawanyana nakunatila anyana katuwa.”
27 Mumbanda wahosheli nindi: “Diimu Mwanta, ilaña anyana katuwa niwena adaña nkuuku* yaholokaña kumesa yawankaaka jawu.”+
28 Kuhiñahu Yesu wamwakwili nindi: “Eyi mumbanda, chikuhwelelu cheyi cheneni; chuma chiwunakukeña chizatiki.” Nawa mwanindi wamumbanda wakoleli hayoyenoyu mpinji.
29 Chafuminiyi kwenoku, Yesu wenjili kwakwihi naKaluñalwiji kaÑaliliya,+ nawa chayiliyi hampidi washakamini henohu.
30 Kuhiñahu mazaza amaneni awantu enjili kudi yena nawa amuleteleli akakubalakata, ayifwayi, amputamesu, atumama niantu amakwawu amavulu, ayikaamikili kunyendu yindi nawa wayuukili.+
31 Dichi izaza dawantu dahayamini hakumona atumama anakuhosha, ayifwayi anakoli, akakubalakata anakwenda, amputamesu anakumona, nawa amulemesheli Nzambi yaIsarela.+
32 Ilaña Yesu watambikili atumbanji twindi nawa wayilejeli nindi: “Natiyili izaza dawantu wushona,+ muloña anashakami nanami mafuku asatu nawa adana yakuda. Hinnakukeña kuyileka ayi nanzalaku,* akenda kafwa chinzeya munjila.”+
33 Ilaña atumbanji amwilili nawu: “Kudihi kutukuwana mankendi amavulu akudiisha idi izaza dejima muloña kudinu iluña hikwashakamaña antuku?”+
34 Dichi Yesu wayihwili nindi: “Mukweti mankendi añahi?” Amwakwili nawu: “7 niinshi janyanya jantesha.”
35 Chelili naleji dehi izaza dawantu kushakama hamaseki,
36 wanoneli mankendi 7 niinshi, chalombeliyi nakusakilila, wahumwini mankendi nakwinka atumbanji, atumbanji niwena enkeli mazaza awantu.+
37 Dichi wejima wawu adiili nawa ekutili, nawa anoneli yikunku yayakuda yashalilihu nakuyisha muyimpaaya* yamaneni 7 nawa yenzeli to-o.+
38 Antu adiili adiña amayala 4,000, kushilahu ambanda nianyana anyanya.
39 Nkumininaku, chelili naleji dehi mazaza awantu kuya, wakandamini muwatu nakuya kwiluña damuMagadani.+
Tumazu twaheshina
^ Dikwila nawu, kashidikilu kakuditookesha kumakasa.
^ Hela “wukumutuka.”
^ Hela “muchimbusuku.”
^ MuchiGiriki, poneya. Talenu Kulumbulula.
^ Dikwila nawu, kubula kulondela kashidikilu kakuditookesha hakuda.
^ Hela “nakubandama.”
^ Hela “wañululu.”
^ Hela “chakadi kudaku.”
^ Hela “mabasiketi.”
