Mika 1:1-16
1 Izu daYehova denjili kudi Mika*+ wakuMoresheti, mumafuku aYotamu,+ Ahazi+ niHezekiya,+ anyanta amuYuda,+ datambwililiyi muchimwenu kutalisha hadi Samariya naYerusalema nawu:
2 “Tiyenu, enu antu ejima!
Eyi iseki niyuma yenzalamu, tiyililenu,Nawa Yehova Mwanta Wabadika ekali chinsahu wakuyikonkolola,+Yehova mutembeli yindi yajila.
3 Muloña tiyenu! Yehova nakwidika mwiluña dindi;Wakasuluka nakudatola yinañanaña yahamaseki.
4 Mapidi akasuñunuka mwishina dindi,+Nawa yinekineki yakaambukaNeyi nsela yidi kukesi,Neyi menji anechiliwu kwakunkumuka chikupu.
5 Yuma yejimiyi yinenzi muloña wakudikaña kwaYakoba,Muloña wanshidi jawantu amwitala daIsarela.+
Indi kudikaña kwaYakoba dikudihi?
Komana hiSamariyaku?+
Indi yinañanaña yaYuda diyidihi?+
Hidiyi Yerusalemaku?
6 Nakamubalumuna Samariya akekali mulumba wayuma yinakisiki mwisaña,Iluña dakudimahu matempa anyivinyu;Nakanatila* malola indi muchinekineki,Nawa nakashiya yikuku yindi hatooka.
7 Ankishi jindi ejima akubaza akayichika chiki-chiki,+Nawa yawaana yejima yamondeleñawu* akayocha mukesi.+
Nakakisañana ankishi jindi ejima.
Muloña wayisendeli nawufwetu wamuwuvumbi,Nawa akekala cheñi wufwetu wawayivumbi.”
8 Muloña wachumichi nakadila makumbu nikukaloka;+Nakenda nyendu hanji nawa nzekesi.+
Makumbu ami akatiyakana neyi awanyumbu,Nawa kudila kwami neyi kwawanyamalanda.
9 Muloña yilonda yindi hiyokewañaku;+Yinashiki nikuYuda.+
Chipupu chinataandi kushika nikuchiisu chawantu jami, kuYerusalema.+
10 “Bayi muchibidika muGatiku;Bayi mudila hela chantiku.
Mudivubi mulunkuñu muBeti Afira.*
11 Enu mwashakama muShafiri, hitenu nzekesi nawa nansonyi.
Antu ashakama muZayanani hiyanedikiku.
MuBetezeli mwakekala makumbu, nawa wakaleka kuyikwasha.
12 Muloña antu ashakama muMaroti ahembelelaña yuma yayiwahi,Ilaña yuma yatama diyinafumi kudi Yehova nakuya kuchiisu chaYerusalema.
13 Enu mwashakama muLakishi, kasenu ikalu kumukanka watuwalu.+
Nshidi yamwana kaZiyona wamumbanda yafumini kudi enu.Muloña mudi enu dimwawaniniwu kudikaña kwaIsarela.+
14 Dichi mwakamwinka Moresheti Gati yawaana yakudaambula* nachu.
Antu* amuAkizibi+ adiña yuma yamakudi kudi anyanta amuIsarela.
15 Enu mwashakama muMaresha,+ nakayiletela mukakwimika mushindu.*+
Kulema kwaIsarela kwakashika nikuAdulami.+
16 Ditewulenu mabala nawa tewulenu nsuki jenu muloña wawanyanenu imwakeñesha.
Ditewulenu mabala neyi ikubi,*Muloña anayifumishi kudi enu nakuyitwala muwunkoli.”+
Tumazu twaheshina
^ Hinsonekelu yaMikayeli hela Mikaya muwihi, daya mukwila nawu, “Hinyi Wudi Neyi Yehova?”
^ MuchiHeberu, “Nakamwaña.”
^ Hela “wufwetu wejima wamuwuvumbi windi.”
^ Hela “mwitala daAfira.”
^ Hela “yakudishiika.”
^ MuchiHeberu, “Matala.”
^ Hela “wakayitambula.”
^ Izu dachiHeberu dinateli kutalisha nikudi mbuulu.
