Obadiya 1:1-21
1 Chimwenu chaObadiya:*
Yehova Mwanta Wabadika nahoshi kutalisha hadi Edomi nindi:+
“Tunatiyi mazu anafumi kudi Yehova,Ntemesha anamutemeshi kunyuza nakuhosha nindi:
‘Nyamukenu, tudiloñeshenu kuzuña njita naEdomi.’”+
2 “Tiyaña! Nakubalumuni kwikala wakehelamu hakachi kanyuza;Anakudiwuli chikupu.+
3 Kudivwimba kwamuchima weyi kunakudimbi,+Eyi washakama muyiswamu yamumalola,Washakama hewulu, nakuhosha mumuchima weyi neyi,‘Hinyi wukuntululahu nakunleta hamaseki?’
4 Hela chakwila wukutuña mukala weyi hewulu* neyi mbuulu,Hela neyi wukutuñila chisakala cheyi hakachi katutumbwa,Nakakutululahu,” dichinahoshiyi Yehova.
5 “Neyi amakombi hela atupondu akwinza kudi eyi nawufuku,(Akukukisañana chikupu!)*
Komana hiyakwiya hohu yuma yinakukeñawuku?
Hela neyi akakukumuna nyivinyu diwu enza kudi eyi,Komana hiyadi kushiyahu yikwawu yakunonojolaku?+
6 Ochinamukeñakeñiwu Esawu!
Ochinakeñakeñiwu maheta indi aswekayi!
7 Anakutwali kuñinza.
Anakudimbi kudi antu ejima iwadinuña nawu.*
Amayala adi mukuwunda naneyi anakubalumukilimu,
Antu iwadaña nawu akakutila kaleñi,Ilaña hiwakakiilukaku.
8 Hanodu ifuku,” dichinahoshiyi Yehova,“Komana hinakayijilumuna akamaana amuEdomi+Niakweti kashinshi ekala mwiluña damapidi daEsawuku?
9 Nawa amashidika eyi akatiya woma,+ eyi Temani,+Muloña antu ejima adi mwiluña damapidi daEsawu akayitapa nakuyijilumuna.+
10 Muloña wandombu yiwunazuñi namanakweyi Yakoba,+Eyi wakatiya nsonyi,+Nawa wakajiya haya nyaaka.+
11 Hefuku diwemeni hahalehi nayena,Hefuku dasendeliwu amashidika indi kudi antu acheñi nakuyitwala muwunkoli,+Hampinji yeñililiwu añiinza muchiisu chindi nakusakula Yerusalema nachinjikijilu,+Nineyi welili neyi kwiji wudi hakachi kawu.
12 Bayi wakazañalala hefuku dakakabakanayi manakweyiku,+Bayi wakatiya kuwaha hefuku dakajilumuka antu amuYudaku,+Nawa bayi wakahosha chatama hefuku dakamonawu yihuñuku.
13 Bayi wakeñila muchiisu chawantu jami hefuku dakamonawu kukalaku,+Bayi wakazañalala hefuku dakamonayi manakweyi kukalaku,Bayi wakakwata makasa eyi hamaheta indi hefuku dakamonayi kukalaku.+
14 Bayi wakemana hamaakenu anyikwakwa nakujaha antu jindi anakutemukaku,+Nawa bayi wakahana ayipuluka indi hefuku dayihuñuku.+
15 Muloña ifuku daYehova dakubabesha nyuza yejima didi kwakwihi.+
Chiwuneli, dichakakwilawu nineyi.+
Yuma yiwuneli akwenu yakakufuntila hamutu weyi.
16 Muloña neyi chiwanwinaña hampidi yami yajila,Nyuza yejima niyena yikutwalekahu kunwa chakadi kuleka.+
Akunwaña nakuminya,Nawa akekala tuhu neyi kwiji adiñaku wanyi.
17 Ilaña haMpidi yaZiyona hakekala antu akapuluka,+Nawa yakekala yajila;+Nawa amwitala daYakoba akatambula yuma yawu.+
18 Amwitala daYakoba akekala kesi,Amwitala daYosefu akekala muzuzu,Nawa amwitala daEsawu akekala neyi matahu oma,Akayocha nawa akasukuma,Kwosi wakapuluka hadi amwitala daEsawuku,+Muloña Yehova yomweni diyi wunahoshi.
19 Akatambula Negebi niiluña damapidi daEsawu,+Shefela niituña dawaFilisitinu.+
Akatambula mpata yaEfuremu nimpata yaSamariya,+Nawa Benjamini wakatambula Giliyadi.
20 Ankoli aniyi mpwembu,+Antu jaIsarela akatambula ituña dawaKenani ndo-o nikuZarefwati.+
Nawa ankoli amuYerusalema, adiña muSefaradi, akatambula nyisumba yaNegebi.+
21 Akakwamwina akakandama haMpidi yaZiyonaNakusompesha iluña damapidi daEsawu,+Nawa wanta wakekala waYehova.”+
Tumazu twaheshina
^ Daya mukwila nawu, “Kambuña aYehova.”
^ Hela hekwawu, “wukutuuka hamalela.”
^ Hela hekwawu, “Akakisañana kushika hadihi?”
^ Hela “antu iwatiyañana nawu chitiyañenu.”