Yeremiya 1:1-19
1 Awa diwu mazu aYeremiya* mwana kaHilikiya, wumu hadi atupristu amuAnatoti+ mwituña daBenjamini.
2 Izu daYehova denjili kudi yena mumafuku aYosiya+ mwana kaAmoni,+ mwanta waYuda, muchaaka chamu 13 chachiyuulu chindi.
3 Denjili cheñi mumafuku aYehoyakimi+ mwana kaYosiya, mwanta waYuda, kushika nikukumana kwachaaka chamu 11 chaZedekiya+ mwana kaYosiya, mwanta waYuda, nichayili Yerusalema muwunkoli mukakweji kamuchitanu.+
4 Izu daYehova denjili kudi ami nawu:
5 “Nakwilukili* henohu kanda nukuwumbi mwivumu,+Nawa nakujilikili* henohu kanda wuvwaliki.*+
Nakutondeli kwikala kaprofwetu kunyuza.”
6 Ilaña ami nahosheli nami: “Mama eyi Yehova Mwanta Wabadika!
Ami neluka kuhosha wanyi,+ muloña nichidi kansi hohu.”+
7 Kufumahu, Yehova wañilili nindi:
“Bayi wuhosha neyi, ‘Nichidi kansi hohuku.’
Muloña watela kuya kudi antu ejima kunukukutemesha,Nawa watela kuhosha yuma yejima yinukukuleja.+
8 Bayi wutiya woma nanochu chinakumwekanawuku,+Muloña ‘ami nidi naneyi, nukukwamwinaña,’+ dichinahoshiyi Yehova.”
9 Kuhiñahu Yehova wolweli chikasa chindi nakukwata hakanwa kami.+ Nawa Yehova wañilili nindi: “Nashi mazu ami mukanwa keyi.+
10 Tiyaña, dalelu nakwinki wuswa hanyuza nihamawanta, wakubwita nikuhumuna, wakukisañana nikukundula, wakutuña nikutumba.”+
11 Izu daYehova denjili cheñi kudi ami nawu: “Yeremiya, wunamonidi?” Ami nahosheli nami: “Namoni mutayi wamutondu waamondi.”*
12 Yehova wanlejeli nindi: “Muwunamoni diimu, muloña ami natwalekihu kutona kulonda nishikiji izu dami.”
13 Izu daYehova denjili kamuchiyedi kudi ami nawu: “Wunamonidi?” Ami nami: “Namoni ndehu* yinakubwakata,* nawa kanwa kayu kanafutaleli kukabeta kakuchimunswa.”
14 Kufumahu Yehova wanlejeli nindi:
“Kukala kwakafumina kukabeta kakuchimunswaNakushikena antu ejima ashakamaña mwituña.+
15 Muloña Yehova nahoshi nindi,+ ‘Inakutambika yisaka yejima yakumawanta akukabeta kakuchimunswa,Nawa yikwinza; wudi wejima wakasha itanda dindiKuwiñililu wayiisu yaYerusalema,+Kumbañu jindi jejima kwi-i ndo-oNikunyisumba yejima yamuYuda.+
16 Nawa nakabidika wunsompeshi wami wunakayisompesha hakutama kwawu kwejima,Muloña ananshiyi,+Nawa anakwochela anzambi acheñi nyilambu yakukakumuka wishi+Nikudifukula kunyidimu yamakasa awu.’+
17 Ilaña diloñeshi wilimu,*Nawa watela kwimana wuyi nakuyileja yuma yejima yinnakuleji.
Bayi wuyitiya womaku,+Kulonda nakabuli kukutiyisha woma hamesu awu.
18 Muloña dalelu nakubalumuni kwikala musumba wakiñewa,Chishimi chachikuñu, nawa mbañu jawuneñu kulonda wimiki mushindu ituña dejima,+Anyanta amuYuda niayilolu adimu,Atupristu adimu niantu ashakamaña mwituña.+
19 Nawa chakadi nikujina, akazuña naneyi,Ilaña hiyakakwimika mushinduku,*Muloña ‘ami nidi naneyi,+ nukukwamwinaña,’ dichinahoshi Yehova.’”
Tumazu twaheshina
^ Hekwawu daya mukwila nawu, “Yehova Watuumbakeshaña.”
^ Hela “Nakutondeli.”
^ MuchiHeberu, “henohu kanda wufumi mwivumu.”
^ Hela “nakwaambwili.”
^ MuchiHeberu, “wunakutona.”
^ Hela “ndehu yeneni.”
^ MuchiHeberu, “kunakupepawu,” chinakumwekesha kesi kanakubidima mwishina.
^ MuchiHeberu, “manyekaku nkuma jeyi.”
^ Hela “kukushinda.”
