Yeremiya 11:1-23
11 Idi didu izu denjili kudi Yeremiya kufuma kudi Yehova nawu:
2 “Enu antu, tiyenu mazu anichi chitiyañenu!
“Yishimuni* kudi antu amuYuda niantu ashakamaña muYerusalema
3 nawa wuyileji neyi, ‘Yehova Nzambi yaIsarela nahoshi nindi: “Washiñewa yowu muntu wabulaña kwovwahila mazu anichi chitiyañenu,+
4 inayilejeli ankakulula jenu hefuku dinayifumishili mwituña daEjipitu,+ muluteñu lwakusuñunwinamu yikuñu,+ nami, ‘Ovwahilenu izu dami nawa ilenuña yuma yejimiyi yinnayileji; nawa mukwikala antu jami ninami nukwikala Nzambi yenu,+
5 kulonda nishikiji kusanyika kunasanyikili kudi ankakulula jenu, kwakuyinka ituña dasweja mayeli niwuchi,+ neyi chichidi dalelu.’”’”
Nawa ami naakwili nami: “Ameni,* eyi Yehova.”
6 Yehova wanlejeli nindi: “Bidikaku awa mazu ejima munyisumba yamuYuda nimunyikwakwa yamuYerusalema neyi: ‘Tiyenu mazu amunichi chitiyañenu, nawa yovwahilenuña.
7 Muloña nayisoñamishili chikupu ankakulula jenu hefuku dinayifumishili mwituña daEjipitu kushika nidalelu, nakuyisoñamisha kapampa kakavulu* nami: “Ovwahilenu izu dami.”+
8 Ilaña wena hiyatiyilili hela kuteñeleka matu awuku; ilaña, muntu wejima wadikañili nakutwalekahu kulondela muchima windi watama.+ Dichi mazu ejima anichi chitiyañenu nayishikijilili hadi wena, inayilejeli kwila nawa abulili kwovwahilawu.’”
9 Kuhiñahu, Yehova wanlejeli nindi: “Antu amuYuda niantu ashakamaña muYerusalema anakasi kafuta.
10 Anafunti kuyiluwa yawankakulula jawu akushankulu, owu akaanini kwovwahila mazu ami.+ Niwena analondeli anzambi acheñi nawa anayikalakeli.+ Amwitala daIsarela niamwitala daYuda anafumpi chitiyañenu chami chinatiyañeni nawankakulula jawu.+
11 Dichi, Yehova nahoshi nindi, ‘Inakuyiletela yihuñu yikukañanya kutemukawu.+ Neyi añaabila nawu niyikwashi, nukuyitiya wanyi.+
12 Kuhiñahu, nyisumba yamuYuda niantu ashakamaña muYerusalema akaya kudi anzambi alambulañawu nyilambu* nakulomba wukwashu,+ ilaña awa hiyakayamwina hela chanti mumpinji yayihuñu yawuku.
13 Eyi Yuda, anzambi jeyi anavuli neyi nyisumba yeyi, nawa chuma chawuzondu* wunachituñili tumeña twatuvulu neyi chidi nyikwakwa yamuYerusalema, tumeña twakumulambwilahu Bayali nyilambu.’+
14 “Hakwila eyi,* bayi wuyilombelaku awa antuku. Bayi wuyidililaku hela kuyilombelakuku,+ muloña neyi añaabila muloña wayihuñu yawu ami nukutiya wanyi.
15 Wuswanyi wukwetiyi nkeñi yami wakwinza mwitala damiHenohu amavulu hakachi kawu anakasi tufuta twatama?
Komana nambiji yajila* anateli kukañesha yihuñu yakakushikena?
Hayina mpinji wakatwesha kuzañalala?
16 Mpinji yimu Yehova wakuteneneña nindi mutondu wawuwahi,Walubanji nanyikaabu yayiwahi.
Nezu dañovu chikupu, namwochi mukesi,Nawa anakotoli nyitayi yawu.
17 “Yehova wamazaza, wakutumbili,+ nashimuni nindi yihuñu yakakushikena muloña wanshidi yinakoñiwu amwitala daIsarela niamwitala daYuda, anamuzuwishi nanochu chinamulambuliwu Bayali nyilambu.”+
18 Yehova wanlejeli kulonda niiluki;Hayina mpinji wankojejeli kumona yuma yelileñawu.
19 Nadiña neyi mwana kamukoku wawunda anakuya nakujahawu.
Nelukili wanyi nami anakunkasila kafuta kakwila nawu:+
“Tukisañanenu mutondu hamu ninyikaabu yawu,Nawa tumufumishenu mwituña dawamomi,Kulonda ijina dindi akabuli kudanukahu cheñi.”
20 Ilaña Yehova wamazaza wasompeshaña mukuloña;Washinshikaña chikupu yitoñojoka yayeni yamukachi* nimuchima.+
Ñiiteji nimoni chiwukuyitenda,Muloña kudi eyi dikwinnakunjiki muloña wami.
21 Dichi, Yehova nahoshi hadi antu amuAnatoti+ anakukeña kukujaha* nawa anakuhosha nawu: “Bayi wuprofwetela mwijina daYehovaku,+ neyi nehi wukufwila kuchikasa chetu”;
22 dichi Yehova wamazaza nahoshi nindi: “Ichi inakuyisompesha. Anyikwenzi akufwa nampoku yakabali,+ nawa anyanawu awamayala niawambanda akufwa nanzala yakapwelendendi.+
23 Kwosi hela wumu wakashalahu hakachi kawuku, muloña nakaleta yihuñu hadi antu amuAnatoti+ muchaaka chakuyisompesha.”
Tumazu twaheshina
^ Hadaha anakuleja Yeremiya.
^ Hela “Chiikali mwomwenomu.”
^ MuchiHeberu, “kuhinduka nabudidi nakuyisoñamisha.”
^ Hela “nyilambu yakukakumuka wishi.”
^ Hela “nzambi wawuzondu.”
^ Dikwila nawu, Yeremiya.
^ Dikwila nawu, nyilambu yalambwileñawu mutembeli.
^ MuchiHeberu, “nshiya.”
^ Hela “anakufwila wumi weyi.”
