Yeremiya 12:1-17
12 Eyi Yehova, wekala waloña,+ neyi nikwaabila,Neyi nihosha naneyi nsañu yawuñanji.
Hanu dinu muloñadi antu atama yuma chiyinakuyiwahila,+Nawa muloñadi akakudimbana chinakubulilawu kwakama?
2 Wayitumbili, nawa aneñiji nyiji.
Anakuli nakusoña nyikaabu.
Wekala mukanwa kawu, ilaña yitoñojoka yawu yayeni yamukachi* yekala kwakulehi chikupu naneyi.+
3 Ilaña ami wañiluka chikupu, eyi Yehova,+ wammonaña;Wunashinshiki muchima wami nawa wunawuwani neyi washinshika kudi eyi.+
Yifumishihu neyi anyikoku anakujahawu,Nawa yaambuli atalileña ifuku dakuyijaha.
4 Ituña dikutwalekahu kulepa kushika mpinjinyi?Niyuma yamenaña mwisaña yikutwalekahu kuuma kushika mpinjinyi?+
Muloña wayiluwa yawantu ashakamañamu,Anyama niatuda anayijilumuni.
Muloña anahoshi nawu: “Yena wamonaña yuma yakatumwekena wanyi.”
5 Neyi wukañanya kutemukila hamu nawakakwenda hamaseki,Hanu dinu wunateli kutemukila ñahi hamu natuwalu?+
Hela chakwila wunakuhweleli mwituña dakuwunda,Hanu dinu wakahanda ñahi mwivunda dajika didi kumukulishu waYodani?
6 Muloña niamanakweyi iwasemuka nawu, amwitala datata yeyi,Anakumwekesheli wupwapoki.+
Anakukuwi.
Bayi wuyikuhwelelaku,Hela chakwila akukuleja yuma yayiwahi.
7 “Nashiyi itala dami chisayikila;+ nashiyi wuswana wami.+
Nkeñi yami inakeña chikupu* namuhani kuchikasa chawayilumbu jindi.+
8 Wuswana wami wunekali kudi ami neyi mutupa wudi mwivunda.
Nambulumini.
Dichi namuheli.
9 Kudi ami, wuswana wami wudi neyi kada chikwata wawulombu washiyashana;*Atuda amakwawu ayikwata anamunyeñumuki nakumulukuka.+
Inzenu, pompenu hamu, enu anyama ejima amwisaña,Inzenu mudii.+
10 Atubiña amavulu anakisañani itempa dami danyivinyu;+Anadatoli chibalu cheluña dami.+
Anabalumuni chibalu cheluña dami dinakeña kwikala isaña dakadi chuma.
11 Dinekali kwamahembi hohu.
Dinalepi;*Dinabalumuki kwamahembi kumesu ami.+
Ituña dejima anadibalumuni kwamahembi hohu,Ilaña kwosi muntu wunashiku muchimaku.+
12 Akakujilumuna anenjili munjila jejima jahita mwisaña jaleka dehi kuzatika,Muloña mpoku yakabali yaYehova yinakukisañana kufuma kunsa yimu yetuña nakushika kunsa yikwawu.+
Kwosi muntu hela wumu* wudi mukuwundaku.
13 Anatumbi tidiku, ilaña anaañuli nyiña.+
Anadizeyeshi tuhu kwawu, kwosi chiyanawaninimuku.
Akatiya nsonyi nayuma yakañulawuMuloña wakuzuwa kwaYehova kwasweja.”
14 Yehova nahoshi hadi antuñi nami ejima atama, anakukwata hawuswana wunakojejeli antu jami aIsarela kwikala nawu, nindi:+ “Ichi inakuyibwita nakuyifumisha mwituña dawu,+ nawa amwitala daYuda nukuyibwita hakachi kawu.
15 Ilaña neyi nayibwiti dehi, nukuyitiyila cheñi luwi nawa muntu wejima nukumufuntisha kuwuswana windi nikwituña dindi.”
16 “Nawa neyi ashaku maana kudiza njila jawantu jami nikusanyikila mwijina dami nawu, ‘Kwesekeja nachahandayi Yehova!’ neyi chayidizishiliwu antu jami kusanyikila mudi Bayali, dihu dinu hinakayituñisha hakachi kawantu jami.
17 Ilaña neyi akaana kwovwahila, ninami nakabwita owu muza, nakawubwita nakuwujilumuna,” dichinahoshiyi Yehova.+
Tumazu twaheshina
^ MuchiHeberu, “nshiya.”
^ Hela “Nkeñi yawumi wami.”
^ Hela “kabalala.”
^ Hela hekwawu, “Dinadili.”
^ MuchiHeberu, “mujimba wudi wejima.”
