Yeremiya 14:1-22
14 Idi didu izu daYehova denjili kudi Yeremiya kutalisha hayaaña nawu:+
2 Yuda nakudila,+ nawa yiisu yindi yinakisiki.
Yinaholoki heseki iku yinadihombi,Nawa mutetu wunakufumina muYerusalema.
3 Nawa ankaaka jawu anakutemeshaña añamba jawu* kuya nakutehuna menji.
Anakuyaña kumajiya,* anakuwanaña menji kwosi.
Anakufuntaña nansaba jakadi menji.
Anakutiya nsonyi nikusawuka,Nawa abutaña kunyitu yawu.
4 Chineli iseki dinabaloki,Muloña wakwila mwituña mwosi nvula,+Andimi anakameni nawa anabuti kunyitu yawu.
5 Nimbaala wamukaji nakushiya mwanindi anafumiyi tuhu nakusemaMuloña matahu kwosi.
6 Ayimbuulu amwisaña anakwimanaña hewulu datupidi.
Anakusaakwilaña neyi nyumbu;Mesu awu anakukañanya kumona chiwahi muloña munyenvu kwosi.+
7 Hela chakwila yiluwa yetu etu aweni yinakutufwisha namuloña,Eyi Yehova, koñakumu hamuloña wejina deyi.+
Muloña yilwilu yetu yakubula kushinshika yinavuli,+Nawa yeyi itunavulumuni.
8 Eyi mwakuhwelelayi Isarela, Chamwinu+ chindi mumpinji yayihuñu,Muloñadi chiwunekalili neyi muntu wakwacheñi mwituña,Neyi mukakwenda wemanaña hohu nakukaama wufuku wumu?
9 Muloñadi chiwunekalili neyi muntu wunahayami,Neyi mukañovu wukubula kwamwina?
Muloña eyi wudi hakachi ketu, eyi Yehova,+Nawa atutenaña nejina deyi.+
Bayi wutushiya chisayikilaku.
10 Yehova nahoshi hadi awa antu nindi: “Akeña kukimboka;+ hiyanalekeshi nyendu yawuku.+ Dichi Yehova hayitiyaña kuwahaku.+ Ichi wukwanuka chiluwa chawu nawa wukuyisompesha muloña wanshidi jawu.”+
11 Kuhiñahu, Yehova wanlejeli nindi: “Bayi wulomba neyi yuma yayiwahi yinzi hadi awa antuku.+
12 Neyi ashakama chakadi kuda, hinatiyaña nyaabu yawuku,+ nawa neyi alambula nyilambu yamukuma yakushita ninyilambu yambutu, hinayitiyaña kuwahaku,+ muloña nakayijilumuna nampoku yakabali, nanzala yakapwelendendi ninachipupu.”*+
13 Hohenohu nahosheli nami: “Mama eyi Yehova Mwanta Wabadika! Akunu atuprofwetu anakuyileja awa antu nawu, ‘Himwakamona mpoku yakabaliku, nawa nzala yakapwelendendi hiyakenza hadi enuku, ilaña nakayinka kuwunda kwalala mudinu iluña.’”+
14 Kufumahu, Yehova wanlejeli nindi: “Atuprofwetu anakuprofweta jamakudi mwijina dami.+ Hinnayitemeshi hela kuyileja hela kuhosha nawuku.+ Chimwenu chamakudi, kuhoña kwamukunkulwayi nimakudi amunyichima yawu diyuma yinakuprofwetawu kudi enu.+
15 Dichi, kutalisha hadi atuprofwetu anakuprofweta mwijina dami, henohu hinnayitemeshiku, nawa anakuhosha nawu kwosi mpoku hela nzala yakapwelendendi yakamwekana mudinu ituñaku, Yehova nahoshi nindi: ‘Owu atuprofwetu akafwa nampoku yakabali ninanzala yakapwelendendi.+
16 Nawa owu antu anakuprofwetelawu akayinatola munyikwakwa yamuYerusalema muloña wanzala yakapwelendendi nimpoku yakabali, chakadi wakuyijiika,+ wena, añodi jawu, anyanawu awamayala hela anyanawu awambanda, muloña ami nakayihuñunwina yihuñu yayitelela.’+
17 “Idi didu izu diwatela kuyileja neyi,‘Mumesu ami mupolomoki madilu wufuku nimwaana, bayi aketukaku,+Muloña mujiki* mwana kawantu jami wamumbanda anamuchiki chikupu nikumukotola,+Anamukatishi chikupu.
18 Neyi nidika hanji yamusumba, chinela nami nitali,Inakumona antu anajahiwu nampoku yakabali!+
Nawa neyi nifunta mumusumba,Inakumona nyisoñu yinakwinza muloña wanzala yakapwelendendi!+
Muloña kaprofwetu nikapristu anayi nakuhitañana mwituña dabula kwilukawu.’”+
19 Komana Yuda wunamuumbi chikupu, hela kumumona Ziyona neyi wawuzondu?+
Muloñadi chiwunatweteli ñana, chakwila nimwakuukewela mwosi?+
Twachiñejeleña kuwunda, ilaña hikwenjilihu chuma chachiwahiku,Nimpinji yakuukewa, ilaña kudi hohu yuma yakutiyisha woma!+
20 Eyi Yehova, tuneteji kutama kwetu,Nichiluwa chawankakulula jetu,Muloña tunakuvulumuni.+
21 Hamuloña wejina deyi, bayi wutukaanaku;+Bayi wudiwula itanda deyi dalemaku.
Anukaku, nawa bayi wufumpa chitiyañenu chiwatiyañeni nanetuku.+
22 Komana ankishi amukunkulwayi anyuza anateli kunokesha nvula,Hela komana mawulu anateli kunokesha awenawu nyisa yanvula?
Eyi Yehova Nzambi yetu, komana hiyeyi hohu wunateli kwila mwenimuku?+
Nawa yeyi itwakuhwelela,Muloña eyi nkaweyi hohu yeyi wuneli yuma yejimiyi.
Tumazu twaheshina
^ Hela “antu jawu akehelamu.”
^ Hela “yibweti; mashima.”
^ Hela “musoñu.”
^ Iwu himumbanda wabula kukaamahu dehi neyala.