Yeremiya 15:1-21
15 Kufumahu, Yehova wanlejeli nindi: “Hela tuhu aMosi naSamweli emana kumesu ami,+ kwila niyitiyila* awa antu luwi nehi. Yitemuni kumesu ami. Yili ayeña.
2 Nawa neyi akwila nawu, ‘Tukuya kudihi?’ wuyileji neyi, ‘Yehova nahoshi nindi:
“Wejima wakuchipupu chafwana, kuchipupu chafwana!
Wejima wakumpoku yakabali, kumpoku yakabali!+
Wejima wakunzala yakapwelendendi, kunzala yakapwelendendi!
Nawa wejima wakuwunkoli, kuwunkoli!”’+
3 “Yehova nahoshi nindi, ‘Nawa nakayitoñwela yihuñu yiwana,*+ dikwila nawu mpoku yakabali yakuyijaha, atuwa akuyitulumuna, atuda amuluzwizu niatunyama ahamaseki akuyida nikuyikisañana.+
4 Nawa nakayibalumuna akekali chuma chakuhayama chikupu kudi mawanta ejima ahamaseki+ muloña waManasi mwana kaHezekiya, mwanta waYuda, hamuloña wayuma yakoñeliyi muYerusalema.+
5 Eyi Yerusalema, hinyi wakakutiyila wushona,Hinyi wakakukundeja,Nawa hinyi wakemana nakwihula chiwunakuhanda?’
6 Yehova nahoshi nindi, ‘Wunanshiyi.+
Wunatwalekihu nakunfutalela.*+
Dichi nukukwolwela chikasa chami nakukukisañana.+
Nazeyi nakukutiyila wushona.*
7 Nawa nakayipepa nafoloku muyiisu yamwituña.
Nakayijahila anyanawu.+
Nakajilumuna antu jami,Chineli hiyalekaña kwenda munjila jawuku.+
8 Antuluwa jawu akavula kumesu ami kubadika wusekulula wakutuluñalwiji.
Wena, amama jawantu nianyikwenzi, nakayiletela mukakujilumuna itena mwiwulu.
Nakayakamisha nikuyifwisha mutentu mukukasumwisha.
9 Mumbanda wavweli anyana 7 nahwidili;Nakukabakana hakwona.
Itena dindi dinahumi henohu kuchidi mwaana,Nakudiletela nsonyi nikusawuka.’*
‘Nawa antu antesha anashalihu hakachi kawuNakayihana kumpoku yakabali kumesu awayilumbu jawu,’ dichinahoshiyi Yehova.”+
10 Oyihuñu yinnamoni, eyi mama, muloña wanvweli,+Muntu anakubobweshawu nikuzuñañesha kudi ituña dejima.
Hinakongweshahu dehi hela kukongolahuku;Ilaña wejima wawu anakunshiña.
11 Yehova wahosheli nindi: “Mwamweni nakakwilila yuma yayiwahi;Chalala nakakwamwina mumpinji yayihuñu,Mumpinji yiwakamona kukala nachilumbu.
12 Kudihu muntu wunateli kukotola chikuñu muyikunku,Chikuñu chakukabeta kakuchimunswa, niwuneñu?
13 Yuma yeyi nimaheta eyi nakayihana neyi yuma yakupuupa,+Chakadi kufweta, muloña wanshidi jeyi jejima jiwunakoñi mwahita maluña eyi ejima.
14 Nakayihana kudi ayilumbu jeyiKulonda akayisendi kwituña diwabula kwiluka.+
Muloña kuzuwa kwami kunakwatishi kesi,Nawa kanakuyibidimina.”+
15 Eyi Yehova, weluka,Ñanuki nawa ñakameni.
Ntendeli antu anakunkabisha.+
Bayi wuñiteja nijilumuki* nanochu chiwunalabi kuzuwaku.
Ilukaku neyi inakusawuka muniyi njila hamuloña waneyi.+
16 Mazu eyi awanikili, nawa nayidiili;+Nawa izu deyi dekalili chuma chakunzañalesha nichakutiyisha muchima wami kuwaha,Muloña antenaña ijina deyi, eyi Yehova Nzambi wamazaza.
17 Hinashakamaña hamu nawakakuzañalala nakuzañalalaku.+
Muloña chikasa cheyi chidi hadi ami, nashakamaña nkawami,Muloña wunañinzeshi nakuzuwa.+
18 Kukata kwami kunakubuliladi kumana nichilonda chami chinakubuliladi kuukewa?
Chinakukusuka wanyi.
Komana wukwikala neyi kaseloki kamenji kakutwamba kudi amiKakadi kukuhwelela?
19 Dichi, Yehova nahoshi nindi:
“Neyi wubalumuka, dihu dinu hinukukufuntisha,Nawa wukwimana kumesu ami.
Neyi wukwaambula yuma yalema kuyuma yamukunkulwayi,Wukwikala neyi kanwa kami.*
Wena akubalumukila kudi eyi,Ilaña eyi hiwukubalumukila kudi wenaku.”
20 “Inakukubalumuna wiikali mpwembu yawuneñu yakiñewa kudi awa antu.+
Chalala akuzuña naneyi,Ilaña hiyakukwimika mushinduku,+Muloña ami nidi naneyi, nakukwamwina nikukupulwisha,” dichinahoshiyi Yehova.
21 “Nawa nukukwamwina muchikasa chawatamaNikukukuula muchikasa chawantu abula luwi.”
Tumazu twaheshina
^ Hela “wumi wami kwila wuyitiyila.”
^ Hela hekwawu, “nyichidi yiwana yawunsompeshi.” MuchiHeberu, “yisaka yiwana.”
^ Hela hekwawu, “wunatwalekihu kwenda mankinkanyima.”
^ Hela “nakuditoñesha.”
^ Hela hekwawu, “dinatiyi nsonyi nawa dinasawuki.”
^ MuchiHeberu, “Bayi wunsendaku.”
^ Hela “wukwikala mukakunhoshelaku.”
