Yeremiya 18:1-23
18 Idi didu izu denjili kudi Yeremiya kufuma kudi Yehova nawu:
2 “Nyamukaku wukunkumuki kwitala dakañemi,+ nawa kwenoku nukukuleja mazu ami.”
3 Dichi nakunkumukili kwitala dakañemi, nawa namuwanini nakuwumba chuma hatufumbu twakañemi.
4 Ilaña chuma chawumbileñayi kañemi nandambu chakisikilili muchikasa chindi. Dichi kañemi wawumbilimu chuma chacheñi, mwomwamweniyi nindi munateleli.*
5 Kufumahu izu daYehova denjili kudi ami nawu:
6 “Yehova nahoshi nindi, ‘Enu amwitala daIsarela, komana kwila niyila neyi cheliliyi iwu kañemi nehi?’ Tiyenu! Enu amwitala daIsarela, neyi ndambu muchikasa chakañemi, ninenu dichimudi muchikasa chami.+
7 Mpinji yejima yinukuhosha jakubwita, kuhumuna nikujilumuna muza hela wanta,+
8 nawa owu muza wuleka kukoña yuma yatama yinawukaanishili, ninami nukuhimpa yitoñojoka yami kutalisha* hayihuñu yinakeñaña kuletela owu muza.+
9 Ilaña mpinji yejima yinnakuhosha jakutuña nikutumba muza hela wanta,
10 nawa wukoña yuma yatama kumesu ami nawa wubula kwovwahila izu dami, nukuhimpa yitoñojoka yami kutalisha* hayuma yayiwahi yinakeñaña kuwilila.’
11 “Ichi dinu, mwani, yileji antu amuYuda niashakamaña muYerusalema neyi, ‘Yehova nahoshi nindi: “Ichi nukuyiletela yihuñu nawa nukuyikasila kafuta. Mwani, balumukenu nakuleka njila jenu jatama nawa himpenu njila jenu niyilwilu yenu”’”+
12 Ilaña ahosheli nawu: “Oju akayi!+ Muloña etu tukulondelaña yitoñojoka yetu etu aweni, nawa wejima wetu muntu-himuntu wukwilaña kwesekeja nakuchinchika kwamuchima windi watama.”+
13 Dichi, Yehova nahoshi nindi:
“Mwani, dihujolenu enu aweni hakachi kanyuza.
Hinyi watiyahu dehi chuma chamuchidiwu?
Mujiki* kaIsarela nakoñi chuma chawuzondu chikupu.+
14 Komana sino* yakuLebanoni yinateli kujimañana hamalola ahanyikunkumuki yayu?
Hela menji atuuta anakufumina kwakulehi anateli kuuma?
15 Ilaña antu jami ananvulameni.+
Muloña alambulaña nyilambu* kuyuma yamukunkulwayi,+Nawa akojejaña antu kuhukana munjila jawu, munjila jakushankulu,+Kulonda endeña munjila janyaaka jamuma* nawa jamankulokela,*
16 Kulonda abalumuni ituña dawu kwikala chuma chakuhayama chikupu+Nawa chuma chakwimbila muloji.+
Muntu wejima wakukumishaku kuhitilaku, wakahayama chikupu nikudipukumuna kumutu.+
17 Neyi chelaña mpepela yakumusela, nakayipalañeshela kudi ayilumbu jawu.
Hefuku dakamonawu kukala, nakayitalishila chanyima, bayi chamesuku.”+
18 Nawa ahosheli nawu: “Twayenu tumukasili Yeremiya kafuta,+ muloña nshimbi hijikajiya kudi atupristu etu hela kufumba kudi akamaana hela izu kudi atuprofwetuku. Twayenu tumuhosholenu* nawa jikuhoshayi tukujitiya wanyi.”
19 Eyi Yehova, ntiyilili,Nawa tiyaña yuma yinakuhosha ayilumbu jami.
20 Komana chuma chachiwahi atela kuchifwetela nachuma chatama?
Muloña wumi wami anawupundili ibuku.+
Anukaku chinemeneña kumesu eyi nakuhosha yuma yayiwahi hadi wena,Kulonda wufumishi kuzuwa kweyi hadi wena.
21 Dichi hanaku anyanawu kunzala yakapwelendendi,Nawa wuyihani kuñovu yampoku yakabali.+
Añodi jawu yijahili anyana nawa ekali antuluwa.+
Anfumu jawu yijahi nachipupu chafwana,Anyikwenzi jawu wuyijahi nampoku yakabali munjita.+
22 Chiwakaleta chendu chawambanji hadi wena mukukasumwishaMakumbu akatiyakani mumatala awu.
Muloña anampundili ibuku kulonda ankwatiNawa nyendu yami anayitili nyihetu.+
23 Ilaña eyi, eyi Yehova,Wuneluki chikupu tufuta twawu twejima twakukeña kunjaha.+
Bayi wubuta chiluwa chawuku,Nawa bayi wujimañesha nshidi yawu kumesu eyiku.
Yileki ahukani iku wunakutalaku+Chiwukuyibabeshaña mukuzuwa kweyi.+
Tumazu twaheshina
^ MuchiHeberu, “chamweniyi kañemi nindi chinateleli kuwumba.”
^ Hela “kuditoñesha.”
^ Hela “kuditoñesha.”
^ Iwu himumbanda wabula kukaamahu dehi neyala.
^ Hela “nvula yachishika yitooka.”
^ Hela “jakubula kuwahisha.”
^ Hela “jabunda.”
^ Hela “nyilambu yakukakumuka wishi.”
^ MuchiHeberu, “tumwetenu nedimi.”
