Yeremiya 19:1-15
19 Yehova nahoshi nindi: “Yaku wakalandi mulondu wewumba kudi kañemi.+ Sendakuhu akulumpi jawantu niakulumpi jawatupristu,
2 nawa wuyi kuChinekineki chaMwana kaHinomi,+ hawiñililu wakuChiisu chaKañemi. Nawa kwenoku wubidiki mazu inukukuleja.
3 Wuhoshi neyi, ‘Tiyenu izu daYehova, enu anyanta amuYuda ninenu antu mwashakamaña muYerusalema. Yehova wamazaza, Nzambi yaIsarela, nahoshi nindi:
“‘“Katataka nileti yihuñu hanidi iluña, nawa muntu wejima wakatiya chumichi wakakankamana.*
4 Chakekala mwenimu muloña anshiyili+ nawa akojejeli adinu iluña abuli kudiluka.+ Munidi iluña dimunakuyilambwilawu anzambi acheñi nyilambu, abulili kwilukawu wena, ankakulula jawu nianyanta amuYuda, nawa anenzeshi adinu iluña namashi awantu akadi muloña.+
5 Atuñili yinañanaña yaBayali kulonda ocheleñahu anyanawu mukesi ekali nyilambu yamukuma yakushita kudi Bayali,+ chuma chinabulili kuyileja hela kuhoshahu, nawa chabulili kwinzahu nikumuchima wami.”’*+
6 “‘Yehova nahoshi nindi, “Dichi tiyenu! mafuku anakwinza, hakaleka kutenawu adinu iluña nawu Tofeti hela Chinekineki chaMwana kaHinomi ilaña nawu Chinekineki chaKujahana.+
7 Nakakañesha tufuta twaYuda naYerusalema munidi iluña, nawa nakayidimbwisha kumpoku yakabali kumesu awayilumbu jawu nikuchikasa chanowu anakukeña kukisañana wumi wawu.* Nawa yibimbi yawu nakayinkayu atuda amuluzwizu nianyama ahamaseki kwikala yakuda yawu.+
8 Nawa nakaletesha iwu musumba kwikala chuma chakuhayama chikupu nawa chuma chakwimbila muloji. Muntu wejima wakukumishaku kuhitilaku, wakahayama chikupu nikwimbila yipupu yawu yejima muloji.+
9 Nawa nakayidiisha mbiji yawanyanawu awamayala niawambanda, muntu-himuntu wakada mbiji yamukwawu muntu, muloña wakuyikuchika nikubula mwakwilila hakayilukukawu kudi ayilumbu jawu nikudi owu anakukeña kukisañana wumi wawu.”’*+
10 “Dichi chikaku mulondu iku amayala iwunakuya nawu anakutalaku,
11 nawa wuyileji neyi, ‘Yehova wamazaza nahoshi nindi: “Ichi dichinakachika awa antu niniwu musumba, neyi muntu wunakuchika chuma chinawumbiyi kañemi chakwila kwosi wunateli kuchiwumba cheñiku; nawa antu akafwa akayijiika muTofeti sampu maluña akuyijiikahu anamani.”’+
12 “Yehova nahoshi nindi, ‘Ichi dichinakadikoña adinu iluña niantu ashakamañamu, nakuwubalumuna wunu musumba kwikala neyi Tofeti.
13 Nawa matala amuYerusalema nimatala awanyanta amuYuda akekala amajilu neyi adinu iluña daTofeti,+ eña, matala ejima akweti yisu hayilambwilileñawu yuma yejima yamumawulu nyilambu+ nawa hayihuñunwinineñawu anzambi acheñi nyilambu yavinyu.’”+
14 Yeremiya chafuntiliyi kufuma kuTofeti kwamutemesheliwu kudi Yehova nakuprofweta, wemeni mulubanza lwetala daYehova nakuyileja antu ejima nindi:
15 “Yehova wamazaza, Nzambi yaIsarela, nahoshi nindi, ‘Ichi inakuleta yihuñu yejima yinashimwini kuletela iwu musumba nimatawuni* indi ejima, muloña anakaani chikupu* kwovwahila mazu ami.’”+
Tumazu twaheshina
^ MuchiHeberu, “mumatu indi mwakakata.”
^ Hela “kwiñilahu nimuyitoñojoka yami.”
^ Hela “anakufwila wumi wawu.”
^ Hela “anakufwila wumi wawu.”
^ Hela “mbaka.”
^ MuchiHeberu, “anakoleshi nshiñu yawu kulonda abuli.”
