Yeremiya 22:1-30
22 Yehova nahoshi nindi: “Kunkumukaku kwitala* damwanta waYuda wutwali iyi nsañu.
2 Watela kuhosha neyi, ‘Tiyaku izu daYehova, eyi mwanta waYuda washakama hetanda daDavidi, eyi niambuñeyi niantu jeyi, eñililaña muniyi yiisu.
3 Yehova nahoshi nindi: “Londelenuña wuñanji nikuloña. Muntu anakubuwawu mwamwinenu kuchikasa chachipwapoki. Bayi mukabisha ñiinza wejima wumunakushakama nindiku, nawa bayi mwila chatama mwana wejima wakadi tata yindi* hela ntuluwaku.+ Nawa bayi mupwekesha mashi ejima akadi muloña mudinu iluñaku.+
4 Nawa neyi mukulondelaña chikupu idi izu, anyanta ashakamaña hetanda daDavidi+ akeñilila muyiisu yanidi itala, iku anakwendela mumakalu nihatuwalu, wena hamu niambuñawu niantu jawu.”’+
5 “Yehova nahoshi nindi, ‘Ilaña neyi mukubula kwovwahila awa mazu, nadisanyiki ami aweni nami idi itala dakashala kwamahembi hohu.’+
6 “Muloña Yehova nahoshi kutalisha hetala damwanta waYuda nindi,‘Kudi ami wudi neyi Giliyadi,Neyi hewulu dampidi yaLebanoni.
Ilaña nakakubalumuna isaña;Kwosi musumba weyi hela wumu mwakashakama antuku.+
7 Nawa nakakutondela* antu akukujilumuna,Muntu wejima nayitwa yindi.+
Akatema nyitondu yeyi yanyisida yayiwahiNakuyiholwela mukesi.+
8 “‘Nawa nyuza yayivulu yakahita kwakwihi naniwu musumba nakudihula mulwawu nawu: “Yehova wakoñelelidi iwu musumba weneni chumichi?”+
9 Wena akakula nawu: “Muloña alekeli chitiyañenu chaYehova Nzambi yawu nawa adibukili kudi anzambi acheñi nikuyikalakela.”’+
10 Bayi mudila muntu wunafwiku,Nawa bayi mumutiyila wushonaku.
Ilaña, dilenu makumbu muntu wunakuya,Muloña hakafunta cheñi nakumona ituña davwalikililiyiku.
11 “Muloña Yehova nahoshi kutalisha hadi Shalumi*+ mwana kaYosiya, mwanta waYuda wunakuyuula hachifulu chatata yindi Yosiya+ nawa wunafumi mudinu iluña, nindi: ‘Hakafuntamu cheñiku.
12 Muloña wakafwila mwiluña munamutwaliwu muwunkoli, nawa hakamona cheñi adinu ituñaku.’+
13 Oyihuñu yakamonayi muntu watuñaña itala dindi chakadi kuloñaNitupeka twindi twahewulu chakadi wuñanji,Wazatishaña mukwawu muntu chamukunkulu,Wakaanaña kumufweta wufwetu windi;+
14 Owu wunakuhosha nindi, ‘Nukudituñila itala deneniDikweti tupeka twahewulu twamaneni.
Nukushaku mawindu*Nakudituña mukachi nanyisida nikudipenta wulombu wuchinana.’
15 Komana wukutwalekahu kuyuula muloña wabadika akwenu mukuzatisha nyisida?
Tata yeyi niyena wadiileña nikunwa,Ilaña walondeleleña wuñanji nikuloña,+Nawa yuma yamuwahilileña.
16 Wahakwilileñaku antu anakukabakana niatuzweñi nyiloña,Chakwila yuma yamuwahilileña.
‘Komana chumichi hidimwatalisha kuñiluka amiku?’ dichinahoshiyi Yehova.
17 ‘Ilaña wunashi hohu mesu nimuchima weyi hakuhetela muwupwapoki,Hakupwekesha mashi akadi muloña,Nihawupwapoki nikubuwana.’
18 “Dichi, Yehova nahoshi kutalisha hadi Yehoyakimi+ mwana kaYosiya, mwanta waYuda nindi,‘Akamudila wanyi nawu:
“Yoyoyu, manakwami! Yoyoyu, muhelami!”
Akamudila wanyi nawu:
“Yoyoyu, eyi nkaaka yami! Yoyoyu, wukeleñi windi!”
19 Akamujiika neyi chajiikañawu chimbuulu,+Akamukulula nakumunatilaHanji yayiisu yaYerusalema.’+
20 Kandukaku kuLebanoni nakukaloka nyitetu,Nyamunaku izu deyi muBashani,Nawa wukalokeli nyitetu muAbarimi,+Muloña atujila tweyi ejima anayichiki.+
21 Nahosheli naneyi hiwadimweneña kwikala wakiñewa.
Ilaña wahosheli neyi, ‘Nukwovwahila wanyi.’+
Ichi dichaaku cheyi kufuma tuhu kuwansi weyi,Hiwovwahilaña izu damiku.+
22 Mpepela yakabiña tubiña tweyi twejima,+Nawa atujila tweyi akaya muwunkoli.
Kufumahu akakutiyisha nsonyi nikukusawula muloña wayihuñu yeyi yejima.
23 Eyi washakama muLebanoni,+Watuña hakachi kanyisida,+Ochiwakaaba neyi nyisoñu yikuwana,Nyisoñu* neyi yatiyañayi mumbanda wunakupaapa!”+
24 “Yehova nahoshi nindi, ‘Kwesekeja nachinahanda ami, hela tuhu neyi eyi Koniya*+ mwana kaYehoyakimi,+ mwanta waYuda wadiña kazeya kachilamiku kuchikasa chami chachidiilu, nadi kukufumishaku!
25 Nakakuhana muchikasa chanowu anakukeña kukujaha,* muchikasa chanowu iwatiyaña woma, muchikasa chaMwanta Nebukaneza* wakuBabiloni nimuchikasa chawaKalideya.+
26 Nawa eyi nimama yeyi wakuvweli nakayinatila mwituña dacheñi mumwabulili kuvwalikila, mwakafwila mwenomu.
27 Nawa hiyakafunta kwituña dafwilañawuku.+
28 Komana iwu Koniya hiiyala hohu adiwulawu, ndehu yafumpika,Chipwepu chinakubula kukeñawu kudi muntu wejima, tahindi?
Muloñadi yena niakamutaña windi chinayinatiliwuNakuyuumbila mwituña dabula kwilukawu?’+
29 Eyi iseki,* iseki, iseki, tiyaku izu daYehova.
30 Yehova nahoshi nindi:
‘Iwu iyala mumusoneki nenu hiiyala wabula nyana,Nenu hiiyala wakabula kumonahu yuma yayiwahi muchihandilu chindi chejima,*Kwosi wamumutaña windi hela wumu wukatweshaKushakama hetanda daDavidi nakuyuula cheñi muYudaku.’”+
Tumazu twaheshina
^ Hela “chipañu.”
^ Hela “nshona wudi wejima.”
^ MuchiHeberu, “nakakujilikila.”
^ Atenañawu cheñi nawu Yehowahazi.
^ Hela “njanina.”
^ MuchiHeberu, “Nyisoñu yakuvwala.”
^ Atenañawu cheñi nawu Yehoyakini hela Yekoniya.
^ Hela “anakufwila wumi weyi.”
^ MuchiHeberu, “Nebukareza,” hinsonekelu yaambukaku.
^ Hela “ituña.”
^ MuchiHeberu, “mumafuku indi.”
