Yeremiya 24:1-10
-
Yikuyu yayiwahi niyikuyu yatama (1-10)
24 Kufumahu, Yehova wammwekesheleli yimpaaya* yiyedi yayikuyu yashiliwu kumbidi yatembeli yaYehova, hanyima yakwila Mwanta Nebukaneza* wakuBabiloni natwali dehi muwunkoli Yekoniya*+ mwana kaYehoyakimi,+ mwanta waYuda, hamu nawayilolu amuYuda, achiji niakakuzata nayikuñu.* Wayisendeli muYerusalema nakuyitwala kuBabiloni.+
2 Chimpaaya* chimu chadiña nayikuyu yayiwahi nankashi, neyi yikuyu yatachi, ilaña chimpaaya chikwawu chadiña nayikuyu yatama nankashi, yatama chakwila hiyakutwesha nikuyidaku.
3 Kufumahu, Yehova wañihwili nindi: “Yumanyi yiwunamoni Yeremiya?” Ami naakwili nami: “Namoni yikuyu; yikuyu yayiwahi, yayiwahi nankashi, ilaña yatama, yatama nankashi chakwila hiyakutwesha nikuyidaku.”+
4 Kuhiñahu, izu daYehova denjili kudi ami nawu:
5 “Yehova Nzambi yaIsarela nahoshi nindi, ‘Neyi chochidi iyi yikuyu yayiwahi, dichinukuyimonaña kuwaha niaYuda adi muwunkoli, inafumishili mudinu iluña nakuyitwala kwituña dawaKalideya.
6 Nukuyihembaña nakuyilila yuma yayiwahi, nawa nakayifuntisha kudinu ituña.+ Nakayituña, ilaña hinakayihumunaku; nakayitumba, ilaña hinakayibwitaku.+
7 Nawa nakayinka muchima wakuñiluka nawu yami Yehova.+ Akekala antu jami, ninami nakekala Nzambi yawu,+ muloña akafunta kudi ami namuchima wawu wejima.+
8 “‘Ilaña kutalisha hayikuyu yatama chakwila hiyakutwesha nikuyidaku,+ Yehova nahoshi nindi: “Ichi dichinukumonaña niMwanta Zedekiya+ waYuda, ayilolu jindi, antu ashalahu amuYerusalema owu ashala mudinu ituña, ninowu anakushakama mwituña daEjipitu.+
9 Nawa nakayibalumuna akekali chuma chakuhayama chikupu kudi mawanta ejima ahamaseki+ hinakayiletela yihuñu. Akayisupishaña, akayitaña muyishimu, kuyiseha nawa akekala ishiñu+ kumaluña kwejima kwinnayipalañesheli.+
10 Nawa nakayitemeshela mpoku yakabali,+ nzala yakapwelendendi nichipupu,*+ sampu anajilumuki ejima mwituña dinayinkeli wena niankakulula jawu.
Tumazu twaheshina
^ Hela “mabasiketi.”
^ MuchiHeberu, “Nebukareza,” hinsonekelu yaambukaku.
^ Atenañawu cheñi nawu Yehoyakini hela Koniya.
^ Hela hekwawu, “akakutuña jimpwembu.”
^ Hela “Basiketi.”
^ Hela “musoñu.”
