Yeremiya 27:1-22
27 Kukutachika kwachiyuulu chaYehoyakimi mwana kaYosiya, mwanta waYuda, idi didu izu denjili kudi Yeremiya kufuma kudi Yehova nawu:
2 “Ichi dichinanlejiyi Yehova nindi, ‘Dilili eyi aweni nyonji nijimpaanda, nawa wujishi hanshiñu yeyi.
3 Kuhiñahu, wujitemeshi kudi mwanta wakuEdomi,+ kudi mwanta wakuMowabi,+ kudi mwanta wawaAmoni,+ kudi mwanta wakuTira+ nikudi mwanta wakuSidoni+ nawantemesha anenzi kuYerusalema kudi Mwanta Zedekiya wamuYuda.
4 Wuyinki ilu lushimbi lwawankaaka jawu, neyi:
“‘“Yehova wamazaza, Nzambi yaIsarela, nahoshi nindi; ichi dichimwatela kuleja ankaaka jenu nenu,
5 ‘Yami naleñeli iseki, antu nianyama adi heseki hejima nañovu jami jabadika ninachikasa chami chakwolola; nawa idi iseki nadihana kudi wejima inatiyaña kuwaha.*+
6 Nawa awa matuña ejima nayihani muchikasa chakambuñami Mwanta Nebukaneza+ wakuBabiloni; namwinki nianyama azuwa amwisaña kulonda amukalakeleña.
7 Nyuza yejima yikukalakelaña yena, mwanindi nimwijikulwindi, sampu mpinji yetuña dindi yomweni yinashiki dehi,+ hakamubalumunawu kudi nyuza yayivulu nikudi anyanta amaneni kwikala nduñu yawu.’+
8 “‘“Yehova nahoshi nindi, ‘Muza hela wanta wudi wejima wakakaana kumukalakela Mwanta Nebukaneza wakuBabiloni nawa wakakaana kusha nshiñu yawu mumpaanda yamwanta waBabiloni, nakababesha owu muza nampoku yakabali,+ nanzala yakapwelendendi ninachipupu,* sampu ami nayimanishi ejima nachikasa chindi.’
9 “‘“‘Dichi, bayi muyitiyilila atuprofwetu enu, akakuhoña, akakulota yilota, atutepa niakakupanda enuku, anakuyileja nawu: “Himwakakalakela mwanta waBabiloniku.”
10 Muloña anakuyiprofwetela jamakudi, kulonda akayitwali kwakulehi netuña denu, ami nakayipalañesha enu nawa mwakajiya.
11 “‘“Yehova nahoshi nindi, ‘Ilaña muza wakasha nshiñu yawu mumpaanda yamwanta waBabiloni nakumukalakela, nakawiteja kushala* mwituña dawu, kulonda wakadimeñamu nikushakamamu.’”’”
12 Mwanta Zedekiya+ waYuda niyena namulejeli mwomumu, nami: “Iñijenu nshiñu jenu mumpaanda yamwanta waBabiloni kulonda mumukalakeleña niantu jindi, nawa mukutwalekahu kuhanda.+
13 Muloñadi eyi niantu jeyi chimukufwila nampoku yakabali,+ nanzala yakapwelendendi+ ninachipupu,+ neyi chinahoshiyi Yehova hadi muza wakabula kumukalakela mwanta waBabiloni?
14 Bayi mutiyilila kumazu awatuprofwetuku, anakuyileja nawu, ‘Himwakakalakela mwanta waBabiloniku,’+ muloña anakuyiprofwetela jamakudi.+
15 “Yehova nahoshi nindi, ‘Muloña ami nayitemeshihu wanyi, ilaña anakuprofweta jamakudi mwijina dami, chumichi chakayiletesha nakayipalañeshi nawa mwakajiyila hamu nawatuprofwetu anakuyiprofwetela.’”+
16 Nawa atupristu niantu ejima nayilejeli nami: “Yehova nahoshi nindi, ‘Bayi mutiyilila kumazu awatuprofwetu twenuku, anakuyiprofwetela nawu: “Tiyenu! Katataka yuma yamwitala daYehova ayifuntishi kufuma kuBabiloni!”+ muloña anakuyiprofwetela jamakudi.+
17 Bayi muyitiyililaku. Kalakelenu mwanta waBabiloni nawa mwakatwalekihu kuhanda.+ Muloñadi iwu musumba chiwukujilumukila?
18 Ilaña neyi mwamweni hiyatuprofwetu nawa neyi izu daYehova adi nadu, mwani alembi kudi Yehova wamazaza nawu yuma yashala mwitala daYehova, mwitala* damwanta waYuda nimuYerusalema abuli kuyitwala kuBabiloni.’
19 “Muloña Yehova wamazaza nahoshi kutalisha hayishimi,+ Kaluñalwiji,*+ matemba+ niyuma yashala mumusumba,
20 yabulili kusendayi Mwanta Nebukaneza wakuBabiloni hamutwaliliyi Yekoniya mwana kaYehoyakimi muwunkoli, mwanta waYuda, kufuma muYerusalema nakumutwala kuBabiloni, hamu nawantu ejima alema amuYuda nimuYerusalema.+
21 Eña, Yehova wamazaza, Nzambi yaIsarela, nahoshi hayuma yashala mwitala daYehova, mwitala* damwanta waYuda nimuYerusalema nindi:
22 ‘“Akayitwala kuBabiloni,+ nawa yakekala kwenoku kushika nihefuku dinakayanuka,” dichinahoshiyi Yehova. “Kufumahu, nakayifuntisha nakuyitenteka cheñi mudinu iluña.”’”+
Tumazu twaheshina
^ MuchiHeberu, “kudi wejima wamwekanaña chiwahi kumesu ami.”
^ Hela “namusoñu.”
^ MuchiHeberu, “kunooka.”
^ Hela “chipañu.”
^ Dikwila nawu, Beseni yawuneñu yahatembeli.
^ Hela “chipañu.”
