Yeremiya 28:1-17
-
Yeremiya nakaprofwetu wakutwamba Hananiya (1-17)
28 Muchochina chaaka, kukutachika kwachiyuulu chaMwanta Zedekiya+ waYuda, muchaaka chamuchiwana, mukakweji kamuchitanu, kaprofwetu Hananiya mwana kaAzuri wakuGibeyoni+ wahosheli nanami mwitala daYehova hamesu awatupristu niawantu ejima nindi:
2 “Yehova wamazaza, Nzambi yaIsarela, nahoshi nindi, ‘Inakukotola mpaanda yamwanta waBabiloni.+
3 Muyaaka yiyedi hohu,* inakufuntisha munidi iluña yuma yamwitala daYehova yasendeliyi Mwanta Nebukaneza wakuBabiloni munidi iluña nakuyitwala kuBabiloni.’”+
4 “Yehova nahoshi nindi, ‘Nawa inakufuntisha munidi iluña Yekoniya+ mwana kaYehoyakimi,+ mwanta waYuda, niankoli ejima amuYuda aya kuBabiloni,+ muloña inakukotola mpaanda yamwanta waBabiloni.’”
5 Kuhiñahu, kaprofwetu Yeremiya wahosheli nakaprofwetu Hananiya hamesu awatupristu niawantu ejima emeni mwitala daYehova.
6 Kaprofwetu Yeremiya wahosheli nindi: “Ameni!* Yehova eli mwenimu! Yehova ashikiji mazu eyi iwaprofweta akufuntisha munidi iluña yuma yamwitala daYehova niankoli ejima kufuma kuBabiloni!
7 Hela chochu, mwani, tiyaku iyi nsañu yinnakuhoshela mumatu eyi nimumatu awantu ejima.
8 Kushankulu kwakweni atuprofwetu adiñaku henohu ami nineyi kanda, aprofweteleña kutalisha hamatuña amavulu nimawanta amaneni, hanjita, hayihuñu nihachipupu.*
9 Neyi kaprofwetu aprofweta nsañu yakuwunda nawa munaprofwetiyi mumwekana, akwiluka nawu mwamweni Yehova diyi wamutemesha owu kaprofwetu.”
10 Hohenohu kaprofwetu Hananiya wafumishili mpaanda munshiñu yakaprofwetu Yeremiya nawa wayikotweli.+
11 Hananiya wahosheli hamesu awantu ejima nindi: “Yehova nahoshi nindi, ‘Chochenichi dichinakakotola mpaanda yaMwanta Nebukaneza wakuBabiloni munshiñu yanyuza yejima muyaaka yiyedi hohu.’”+ Kufumahu, kaprofwetu Yeremiya wadiyilili.
12 Chelili kaprofwetu Hananiya nakotoli dehi mpaanda munshiñu yakaprofwetu Yeremiya, idi izu daYehova denjili kudi Yeremiya nawu:
13 “Yaku wumuleji Hananiya neyi, ‘Yehova nahoshi nindi: “Wunakotoli mpaanda janyitondu,+ ilaña wukutuñilamu mpaanda jachikuñu.”
14 Muloña Yehova wamazaza, Nzambi yaIsarela, nahoshi nindi: “Nukusha mpaanda yachikuñu munshiñu yaniyi nyuza yejima, kulonda yimukalakeleña Mwanta Nebukaneza wakuBabiloni, nawa yatela tuhu kumukalakela.+ Nianyama azuwa amwisaña nukumwinkawu.”’”+
15 Kufumahu, kaprofwetu Yeremiya wamulejeli kaprofwetu Hananiya+ nindi: “Tiyaku mwani, eyi Hananiya! Yehova nakutemeshi wanyi, ilaña eyi wunakojeji awa antu kukuhwelela makudi.+
16 Dichi, Yehova nahoshi nindi, ‘Tiyaña! inakukufumisha heseki. Achinu chaaka wukufwa, muloña wunaleji antu kulonda adikañeña naYehova.’”+
17 Dichi kaprofwetu Hananiya wafwili muchochina chaaka, mukakweji kamu 7.
