Yeremiya 3:1-25
3 Antu ehulaña nawu: “Neyi iyala ahaña ñodindi nawa yamushiya nakuya nakusumbuka kudi iyala wacheñi, komana iyala wukumufuntila cheñi owu mumbanda?”
Komana odu ituña hiyanaditamishi chikupuku?+
“Wuneli wuvumbi nawatujila tweyi amavulu,+Komana watela kufunta kudi ami?” dichinahoshiyi Yehova.
2 “Fumbulaku mesu eyi hewulu datupidi wumoni.
Kudihi kuyabulawu dehi kukukaama chakukukanjikija?
Wayishakaminineña kunsa yanyikwakwa,Neyi mukakukimboka* wudi mwisaña.
Wunatwalekihu nakutamisha ituñaNawunyakalwalu weyi nikutama kweyi.+
3 Dichi nvula anayilekeshi,+Nawa kwosi nvula mumpinji yachishikaku.
Kumesu* eyi kunakumwekana wuzondu neyi mumbanda chivumbi;Wabulaña kutiya nsonyi.+
4 Ilaña ichi hiwukundilila neyi,‘Tata yami, yeyi ibwambu dami wakuwansi wami!+
5 Komana muntu watela kuzuwa haya nyaaka,Hela kuhemba nkunyi mpinji yejima?’
Ichi dichiwahoshaña,Ilaña eyi wunatwalekihu kukoña yuma yatama yejima yiwunateli kukoña.”+
6 Mumafuku aMwanta Yosiya,+ Yehova wanlejeli nindi: “‘Wunamoni chuma chakoñañayi Isarela wabula kushinshika? Wayaña hewulu dampidi yejima yanyuña nimwishina damutondu wejima wawuwahi nakwila wuvumbi.+
7 Nihanyima yakukoña yuma yejimiyi, natwalekelihu kumuleja nami afunti kudi ami,+ ilaña hafuntiliku; nawa Yuda wamutalileña hohu yayindi wadikaña.+
8 Ilaña chinelukili chumichi, namuhañili Isarela wabula kushinshika namukanda wakumuseña nachu+ muloña wawujila windi.+ Ilaña mwanyikindi Yuda wadikaña hatiyili womaku; niyena watachikili kwila wuvumbi.+
9 Hamweni nindi wunyakalwalu windi watamaku, watwalekelihu kutamisha ituña nikwila wujila namalola ninanyitondu.+
10 Hela chakwila yuma yamwekeni muniyi njila, mwanyikindi Yuda wadikaña hafuntili kudi ami namuchima windi wejimaku, ilaña chakutwamba hohu,’ dichinahoshiyi Yehova.”
11 Kufumahu, Yehova wanlejeli nindi: “Isarela wabula kushinshika nadimwekeshi yomweni* nindi waloña chikupu kubadika Yuda wadikaña.+
12 Yaña wakabidiki awa mazu kukabeta kakuchimunswa neyi:+
“‘“Funtaku, eyi Isarela mukakusekesha,” dichinahoshiyi Yehova.’+ ‘“Nakakutala nakuzuwa* wanyi,+ muloña ami nashinshika,” dichinahoshiyi Yehova.’ ‘“Hinakatwalekahu kukuhilila haya nyaakaku.
13 Kuminaku dakwiteja nshidi jeyi, muloña wunadikañi naYehova Nzambi yeyi. Watwalekelihu kukaama* nawantu akwacheñi* mwishina damutondu wejima wawuwahi, ilaña hiwatiyilileña mwizu damiku,” dichinahoshiyi Yehova.’”
14 “Funtenu, enu anyana akakusekesha,” dichinahoshiyi Yehova. “Muloña ami nekali nkaaka yenu walala;* nawa nakayisenda, wumu kufuma mumusumba nawa ayedi muchisaka, dichi nakayileta kuZiyona.+
15 Nakayinka atubiña elaña mwaya muchima wami+ nawa akayidiishaña enu nakwiluka ninakashinshi.
16 Munowu mafuku mwakavula nawa mwakasemununa mwituña,” dichinahoshiyi Yehova.+ “Akahoshahu cheñi wanyi nawu, ‘Chimbañu chachitiyañenu chaYehova!’ Hiyakachitoñojokahu hela kuchanuka hela kuchitoñaku, nawa hiyakachituñahu cheñiku.
17 Hanoyu mpinji Yerusalema akamutena nawu itanda daYehova;+ nawa nyuza yejima akayikuñulwila hamu kwijina daYehova muYerusalema,+ nawa hiyakadikañahu cheñi nakulondela muchima wawu watamaku.”
18 “Munowu mafuku akendela hamu, amwitala daYuda niamwitala daIsarela,+ nawa akafumina hamu kwituña dakukabeta kakuchimunswa nakwinza mwituña dinenkeli ankakulula jenu kwikala wuswana wawu.+
19 Nawa natoñojokeli nami, ‘Nayishi chiwahi hakachi kawanyanami nawa nayinki ituña dadiwahi, wuswana wawuwahi chikupu munyuza!’*+ Natoñojokeli cheñi nami mukuntenaña nenu, ‘Tata yami!’ nawa himukuleka kunlondelaku.
20 ‘Mwamweni, neyi mumbanda chamukwatilañayi nfumwindi* makasu, enu amwitala daIsarela, ninenu dichimunakunkwatila makasu,’+ dichinahoshiyi Yehova.”
21 Hewulu datupidi hanatiyakani ipumba,Kudila nikulemba kwawantu jaIsarela,Muloña analuwañeshi njila jawu;Anamuvulameni Yehova Nzambi yawu.+
22 “Funtenu, enu anyana akakusekesha.
Nukuuka kusekesha kwenu.”+
“Yetu anu! Tunenzi kudi eyi,Muloña eyi, eyi Yehova, yeyi Nzambi yetu.+
23 Chalala tupidi niwufwinda wudi hampidi jakutwamba.+
Mwamweni mudi Yehova Nzambi yetu dimudi wamwinu waIsarela.+
24 Ilaña kufuma tuhu kuwansi wetu chuma chawuzondu* chinakisañani yuma yakabakeneniwu ankakulula jetu,+Nyikanka yawu yanyikoku niyawañombi,Anyanawu awamayala niawambanda.
25 Tukaamenu hamaseki muloña tunasawuki,Nawa nsonyi jetu jitubuti,Muloña tunamuvulumuni Yehova Nzambi yetu,+Etu niankakulula jetu kufuma tuhu kuwansi wetu kushika nikulelu,+Nawa hitunovwahili izu daYehova Nzambi yetuku.”
Tumazu twaheshina
^ MuchiHeberu, “mwini Arabiya.”
^ MuchiHeberu, “Kwihama.”
^ Hela “wumi windi.”
^ MuchiHeberu, “Nakaholola chamesu ami.”
^ Hela “kwila wuvumbi.”
^ MuchiHeberu, “anzambi akwacheñi.”
^ Hela hekwawu, “nfumwenu.”
^ MuchiHeberu, “wamazaza anyuza.”
^ MuchiHeberu, “ibwambu dindi.”
^ Hela “nzambi wawuzondu.”
