Yeremiya 33:1-26
33 Izu daYehova denjili kudi Yeremiya kamuchiyedi, hamukwatiliwu nakumuhembela muLubanza lwawaNhembi,+ nawu:
2 “Yehova Ntuñi yeseki, Yehova wadiwumbili nawa wadishimatishili; Yehova didu ijina dindi, nahoshi nindi
3 ‘Ntambiki, ami nukukwitiya nawa nadiloñeshi kukuleja yuma yamaneni nawa yakukañanya kutiyishisha yiwabula kwiluka.’”+
4 “Muloña Yehova Nzambi yaIsarela nahoshi hamatala amuniwu musumba nihamatala awanyanta akuYuda anahumuniwu muloña wayuma yakukuchika nachu nimpoku yakabali,+
5 nihadi antu anakwinza nakuzuña nawaKalideya, nakwinzesha awa maluña nayibimbi yanowu ajahiliyi nakuzuwa kwindi ninakulendumuka kwindi, owu elili yuma yatama yinamukojeji asweki chamesu indi kuniwu musumba, nindi:
6 ‘Inakuuka iwu musumba nikuwukolesha,+ nukuyuuka nawa nukuyinka kuwunda kwasweja nichalala.+
7 Nawa nukufuntisha ankoli aYuda niankoli aIsarela,+ nukuyituña neyi chinelili hakusambila.+
8 Nawa nukuyitookesha kunyiloña yejima yanshidi yinanvulumuniwu,+ nawa nukuyanakena nyiloña yejima yanshidi jawu niyakufumpa nshimbi jami.+
9 Nawa kudi ami wakekala ijina dakuzañalelamu, kushimeka kwami nawa chuma chami chalubanji kumesu anyuza yejima yahamaseki yakatiya yuma yejima yayiwahi yinakayilila.+ Akafwa mutentu nawa akazaala+ muloña wayuma yejima yayiwahi nikuwunda kunakawuletela.’”+
10 “Yehova nahoshi nindi: ‘Munidi iluña dimwakatena nenu mahembi, mwakadi antu hela yimuna, munyisumba yamuYuda nimunyikwakwa yamuYerusalema yashala mahembi, mwakadi antu hela yimuna, mwakatiyakana cheñi
11 ipumba dakudikuwa nidakuzañalala,+ izu dakalemba nezu dakankaña niizu danowu anakuhosha nawu: “Musakililenu Yehova wamazaza, muloña Yehova himuwahi;+ kukeña kwindi kwakashinshi kwahaya nyaaka!”’+
“‘Akaleta mwitala daYehova yawaana yakusakilila nachu,+ muloña nakafuntisha antu amwituña atwaliliwu wunkoli, neyi chinelili hatachi,’ dichinahoshiyi Yehova.”
12 “Yehova wamazaza nahoshi nindi: ‘Munawa mahembi, mwakadi antu hela yimuna nimunyisumba yawu yejima, mwakekala cheñi maluña amunyenvu kwakanookeshelañawu atubiña yimuna yawu.’+
13 “Yehova nahoshi nindi, ‘Munyisumba yamwiluña damapidi, munyisumba yamunkulu, munyisumba yakukabeta kakuchidiilu, mwituña daBenjamini, mumaluña anyeñumuka Yerusalema+ nimunyisumba yamuYuda,+ yimuna yakahita cheñi mwishina damakasa anowu wunakuyichinda.’”
14 “Yehova nahoshi nindi, ‘Tiyenu! Mafuku anakwinza, hinakashikija chikaninu chachiwahi chinashimuna hadi amwitala daIsarela niamwitala daYuda.+
15 Munowu mafuku nawa hanoyu mpinji nakamututwishila Davidi mutombu*+ waloña nawa wakasompa mwawuñanji nimwaloña mwituña.+
16 Munowu mafuku Yuda akamwamwina+ nawa Yerusalema wakashakama mukuwunda.+ Nawa ichi dichakamutenañawu nawu: Yehova Diyi Kuloña Kwetu.’”+
17 “Muloña Yehova nahoshi nindi: ‘Mundonda yachisaka chaDavidi himwakabula iyala wakashakama hetanda danowu amwitala daIsarelaku,+
18 hela mudi atupristu aLevi himwakabula muntu wakwimana kumesu ami nakulambula nyilambu yamukuma yakushita, nakwocha nyilambu yambutu nikulambula nyilambu yikwawuku.’”
19 Nawa izu daYehova denjili cheñi kudi Yeremiya, nawu:
20 “Yehova nahoshi nindi, ‘Neyi mufumpa chitiyañenu chami kutalisha kumwaana nichitiyañenu chami kutalisha kuwufuku, nakukañesha mwaana niwufuku kwinza hampinji yawu yatelela,+
21 dihu dinu hakafumpika chitiyañenu chami chinatiyañeni nakambuñami Davidi,+ kulonda akabuli kwikala namwana wakekala mwanta hetanda dindi,+ nichitiyañenu chami chinatiyañeni nawatupristu aLevi, akakunkalakela.+
22 Neyi chavula yuma yejima yamumawulu yakukañanya nikuchinda niwusekulula wakukaluñalwiji wakukañanya nikupima, dichinakavulisha anyana* kakambuñami Davidi niaLevi anakunkalakela.’”
23 Nawa izu daYehova denjili cheñi kudi Yeremiya, nawu:
24 “Wunatiyi wanyi chinakuhoshawu awa antu nawu, ‘Yehova wakakaana yisaka yiyedi yatondeliyi’? Nawa anakulemesha antu jami wanyi, nawa aleka dehi kuyimona nawu himuza.
25 “Yehova nahoshi nindi: ‘Neyi chinashaku chitiyañenu chami kutalisha kumwaana niwufuku,+ nshimbi jewulu niiseki,+
26 munjila yoyimu hinakakaana anyana* kaYakoba niakambuñami Davidi, chakwila nakabuli kutondahu anyanindi* kwikala anyuuli akuyuula mutaña* waAbarahama, waIsaka niwaYakobaku. Muloña nakafuntisha ankoli jawu+ nawa nakayitiyila wushona.’”+
Tumazu twaheshina
^ Hela “nswana.”
^ MuchiHeberu, “mbutu.”
^ MuchiHeberu, “mbutu.”
^ MuchiHeberu, “mbutu.”
^ MuchiHeberu, “mbutu.”