Yeremiya 35:1-19
-
Eni Rekabi anamwekeshi chakutalilahu chachiwahi chakwovwahila (1-19)
35 Izu denjili kudi Yeremiya kufuma kudi Yehova mumafuku aYehoyakimi+ mwana kaYosiya, mwanta waYuda, nawu:
2 “Yaku kumutaña wawaRekabi+ wuhoshi nawena nawa wuyileti mwitala daYehova, mukapeka kamu kakudiilamu. Kufumahu wuyinki vinyu anwi.”
3 Dichi nasendeli Yazaniya mwana kaYeremiya, Yeremiya mwana kaHabaziniya, amanakwindi, anyanindi ejima nimutaña wejima wawaRekabi
4 nakuyitwala mwitala daYehova. Nayileteli mukapeka kakudiilamu kawanyana kaHanani mwana kaIgidaliya, muntu waNzambi walala, kadiña kwakwihi nakapeka kakudiilamu kawayilolu kadiña hewulu dakapeka kakudiilamu kaMayaseya mwana kaShalumi mukakuhemba kuchiisu.
5 Kuhiñahu, natentekeli makaapu* nimakaapu abula nyikotu* enzala vinyu kumesu awamayala akumutaña wawaRekabi nakuyileja nami: “Nwenu vinyu.”
6 Ilaña wena ahosheli nawu: “Tukunwa vinyu wanyi, muloña Yehonadabi*+ mwana kaRekabi, nkakulula yetu, watwinkeli ilu lushimbi nindi, ‘Enu hela anyanenu himwatela kunwa vinyuku.
7 Nawa himwatela kutuña matala, kukuwa mbutu, hela kutumba hela kwikala netempa danyivinyuku. Ilaña, mushakameña mumatenti mpinji yejima, kulonda mwakashakami yaaka yayivulu mwituña mumudi añiinza.’
8 Dichi tunatwalekihu kwovwahila izu daYehonadabi mwana kankakulula yetu Rekabi muyuma yejima yatulejeliyi, kuhitila mukubula kunwa vinyu, etu, añodi jetu, anyanetu awamayala niawambanda.
9 Nawa hitwatuñaña matala akushakamamuku, hitukweti matempa anyivinyu, maha hela mbutuku.
10 Tunatwalekihu kushakama mumatenti nikwovwahila yuma yejima yatulejeliyi Yehonadabi* nkakulula yetu.
11 Ilaña Mwanta Nebukaneza* wakuBabiloni chenjiliyi nakulukuka ituña,+ twahosheli netu, ‘Ilenu tuyi kuYerusalema kulonda tutemuki njita yawaKalideya niyawaSiriya,’ nawa nihayinu mpinji tunakushakama muYerusalema.”
12 Nawa izu daYehova denjili kudi Yeremiya nawu:
13 “Yehova wamazaza, Nzambi yaIsarela, nahoshi nindi, ‘Yaku wakayileji antu amuYuda niantu ashakamaña muYerusalema neyi: “Komana hinayikonkomweneneña kwovwahila mazu amiku, tahindi?”+ dichinahoshiyi Yehova.
14 “Yehonadabi mwana kaRekabi walejeli akumutaña windi kubula kunwa vinyu, nawa anovwahili mwahosheliyi nakubula kuyinwa kushika nikulelu, dichi anakwovwahila lushimbi lwankakulula yawu.+ Hakwila enu nayikonkomweni kapampa kakavulu,* ilaña himunañovwahiliku.+
15 Nawa natwalekelihu kutemesha ambuñami ejima atuprofwetu kudi enu, nayitemesheleña kapampa kakavulu,*+ nakuyileja nami, ‘Mwani, balumukenu, muntu-himuntu aleki yuma yatama+ nakwila yuma yaloña! Bayi mulondela anzambi acheñi nakuyikalakelaku. Neyi mwila mwenimu mwakatwalekahu kushakama mwituña dinayinkeli enu niankakulula jenu.’+ Ilaña himwateñelekeli itu denu hela kuntiyililaku.
16 Akumutaña waYehonadabi mwana kaRekabi analondeli lushimbi lwayinkeliwu kudi nkakulula yawu,+ ilaña awa antu anantiyilili wanyi.”’”
17 “Dichi Yehova, Nzambi wamazaza, Nzambi yaIsarela, nahoshi nindi: ‘Ichi inakuleta yihuñu yejima hadi Yuda nihadi antu ejima ashakamaña muYerusalema yinayisoñamishileñahu,+ muloña nayilejaña, ilaña wena hiyatiyililañaku, nawa natwalekihu kuyitambika, ilaña wena kwitiya nehi.’”+
18 Nawa Yeremiya walejeli mutaña wawaRekabi nindi: “Yehova wamazaza, Nzambi yaIsarela, nahoshi nindi, ‘Chimunovwahili lushimbi lwankakulula yenu Yehonadabi nawa munatwalekihu kulondela kuleja kwindi kwejima, nakwila mwejima mwayilejeliyi,
19 Yehova wamazaza, Nzambi yaIsarela, nahoshi nindi: “Hikwakabula muntu hela wumu wamumutaña waYehonadabi* mwana kaRekabi wakukalakela kumesu amiku.”’”
Tumazu twaheshina
^ Hela “jimpasa.”
^ Hela “ñaanda.”
^ MuchiHeberu, “Yonadabi,” hinsonekelu yayihi yaYehonadabi.
^ MuchiHeberu, “Yonadabi,” hinsonekelu yayihi yaYehonadabi.
^ MuchiHeberu, “Nebukareza,” hinsonekelu yaambukaku.
^ MuchiHeberu, “inakuhindukaña nabudidi nakuhosha.”
^ MuchiHeberu, “nahindukileña nabudidi nakuyitemesha.”
^ MuchiHeberu, “Yonadabi,” hinsonekelu yayihi yaYehonadabi.