Yeremiya 36:1-32
36 Dichi muchaaka chamuchiwana chaYehoyakimi+ mwana kaYosiya, mwanta waYuda, idi izu denjili kudi Yeremiya kufuma kudi Yehova, nawu:
2 “Nonaku muvuñilu* wusonekimu mazu ejima innakuleji anakundami aIsarela niYuda+ ninyuza yejima,+ kufuma hefuku datachi dinahosheli naneyi mumafuku aYosiya kushika nidalelu.+
3 Hadaha neyi antu amwitala daYuda atiya yihuñu yejima yinnakukeña kuyiletela, akubalumuka nakuleka njila jawu jatama kulonda nakayanakeni chiluwa chawu ninshidi yawu.”+
4 Kufumahu, Yeremiya wamutambikili Baruki+ mwana kaNeriya, nawa Yeremiya wahosheli mazu ejima amulejeliwu kudi Yehova, dichi Baruki wayisonekeli mumuvuñilu.*+
5 Kuhiñahu, Yeremiya wamulejeli Baruki nindi: “Ami anankwati nawa hinukutwesha kwiñila mwitala daYehovaku.
6 Dichi yeyi watela kwiñila mukachi nakutaña nezu datiyakana mazu aYehova adi mumuvuñilu iwasoneka chinahoshaña. Wakayitañi iku antu anakutiyaku hetala daYehova hefuku dakushakama chakadi kuda; dichi watela kuyitañilawu antu ejima amuYuda enzaña kufuma munyisumba yawu.
7 Hadaha kulomba kwawu kwakukeña kuyitiyila luwi kukushika kudi Yehova, nawa akubalumuka, muntu-himuntu wukuleka njila jindi jatama, muloña kuzuwa nikulendumuka kunashimuniyi Yehova nindi kunakwinza hadi awa antu kunasweji kutoha.”
8 Dichi Baruki mwana kaNeriya welili mwejima mwamulejeliwu kudi kaprofwetu Yeremiya; watañili nezu datiyakana mazu aYehova adiña mumuvuñilu* hetala daYehova.+
9 Dichi muchaaka chamuchitanu chaYehoyakimi+ mwana kaYosiya, mwanta waYuda, mukakweji kamu 9, antu ejima amuYerusalema niantu ejima enjili muYerusalema kufuma munyisumba yamuYuda abidikili nawu akushakama chakadi kuda kumesu aYehova.+
10 Kufumahu, Baruki watañili nezu datiyakana mazu aYeremiya adiña mumuvuñilu* hetala daYehova, mukapeka* kaGemariya+ mwana kaShafani+ mukakukopolola,* mulubanza lwahewulu, kuwiñililu wakuchiisu chachiha chetala daYehova,+ iku antu ejima anakutiyaku.
11 Chelili Mikaya mwana kaGemariya, Gemariya mwana kaShafani atiyi mazu aYehova amumuvuñilu,*
12 wakunkumukili nakuya kwitala* damwanta, kukapeka kansoneki. Ayilolu* ejima adiña ashakama kwenoku: nsoneki Elishama,+ Delaya mwana kaShemaya, Elinatani+ mwana kaAkibori,+ Gemariya mwana kaShafani, Zedekiya mwana kaHananiya niayilolu amakwawu ejima.
13 Mikaya wayilejeli mazu ejima atiyiliyi hatañileñayi Baruki mumuvuñilu* iku antu ejima anakutiyaku.
14 Dichi ayilolu ejima atemesheli Yehudi mwana kaNetaniya, Netaniya mwana kaShelemiya, Shelemiya mwana kaKushayi kudi Baruki, nakuhosha nawu: “Inzaku nawa wusendi nimuvuñilu wuwatañaña iku antu anakutiyaku.” Baruki mwana kaNeriya wasendeli muvuñilu muchikasa chindi nakuya kwadiñawu.
15 Amwilili nawu: “Mwani shakamaku, wututañiliwu nezu datiyakana.” Dichi Baruki wayitañililiwu.
16 Dichi chatiyiliwu tuhu mazu ejima, aditalili wumu namukwawu nawoma, nawa amulejeli Baruki nawu: “Awa mazu ejima chiña tuhu tumulejimu mwanta.”
17 Nawa amwihwili Baruki nawu: “Mwani, tuleji chiwasoneka awa amazu ejima. Wayisoneka hampinji yahoshañayi, tahindi?”
18 Baruki wayakwili nindi: “Wahoshaña awa mazu ejima kudi ami, nawa ami nayisonekaña muniwu muvuñilu* nawulombu.”*
19 Ayilolu amwilili Baruki nawu: “Yenu mwakaswami, eyi niYeremiya, nawa bayi muleja muntu wudi wejima kumudiku.”+
20 Kuhiñahu eñilili mudi mwanta, mulubanza, atentekeli muvuñilu mukapeka kansoneki Elishama, nawa amulejeli mwanta yuma yejima yatiyiliwu.
21 Dichi mwanta watemesheli Yehudi+ nakunona muvuñilu, nawa wawuleteli kufuma mukapeka kansoneki Elishama. Yehudi watachikili kumutañilawu mwanta niayilolu ejima emeni kwakwihi namwanta.
22 Mwanta wadiña washakama mwitala mwashakamineñayi mumpinji yachishika, mukakweji kamu 9,* iku nakwota kesi kabutukileña mumbabula.
23 Yehudi welileña chatañayi yibalu yisatu hela yiwana, mwanta waketwileña ochi chikunku nampoku yansoneki nakuchinatila mukesi kabutukileña mumbabula, nichamaninini muvuñilu wejima mukesi kadiña mumbabula.
24 Nawa hiyatiyili womaku; muloña mwanta hela ambuñindi ejima atiyili awa mazu ejima hiyatabwili yakuvwala yawuku.
25 Hela chakwila Elinatani,+ Delaya+ niGemariya+ amulembeleli mwanta nawu yabuli kwocha muvuñilu, yena hayitiyililiku.
26 Kubombelahu, mwanta walejeli Yerameyeli mwana kamwanta, Seraya mwana kaAziriyeli niShelemiya mwana kaAbideyeli kulonda ayi nakumukwata nsoneki Baruki nikaprofwetu Yeremiya, ilaña Yehova wayiswekeli.+
27 Nawa izu daYehova denjili cheñi kudi Yeremiya hanyima yakwila mwanta nochi dehi muvuñilu mwadiña mazu asonekeliyi Baruki ahosheleñayi Yeremiya,+ nawu:
28 “Nonaku muvuñilu wukwawu wusonekimu mazu wowamu adiña mumuvuñilu watachi ejima, wochayi Mwanta Yehoyakimi waYuda mukesi.+
29 Nawa yaku wumuleji Mwanta Yehoyakimi waYuda neyi, ‘Yehova nahoshi nindi: “Wunochi iwu muvuñilu nakuhosha neyi, ‘Muloñadi chiwunasonekelimu neyi: “Chakadi nikujina, mwanta waBabiloni wakenza nakujilumuna adinu ituña nakudishiya chakadi muntu hela kanyama”?’+
30 Dichi, Yehova nahoshi hadi Mwanta Yehoyakimi waYuda, nindi, ‘Hakekalahu namuntu wakushakama hetanda daDavidiku,+ chibimbi chindi akachishiya hankanza namwaana nawa nawufuku hamashika.+
31 Nakamubabesha yena nimutaña* windi niambuñindi muloña wachiluwa chawu, nawa nakaleta hadi wena nihadi antu ashakamaña muYerusalema nihadi antu amuYuda yihuñu yejima yinashimwini kuyiletela,+ muloña hiyatiyililiku.’”’”+
32 Kufumahu, Yeremiya wanoneli muvuñilu wukwawu nakumwinka Baruki mwana kaNeriya, nsoneki,+ nawa Yeremiya wahosheleña iku yena nakusoneka mazu ejima amumuvuñilu* wocheliyi Mwanta Yehoyakimi waYuda mukesi.+ Nawa abombeleliku mazu amakwawu amavulu adi neyi owu.
Tumazu twaheshina
^ MuchiHeberu, “muvuñilu wamukanda.”
^ MuchiHeberu, “muvuñilu wamukanda.”
^ Hela “mukanda.”
^ Hela “mukanda.”
^ Hela “kapeka kakudiilamu.”
^ Hela “nsoneki.”
^ Hela “mukanda.”
^ Hela “Atulala.”
^ Hela “chipañu.”
^ Hela “mukanda.”
^ Hela “mukanda.”
^ Hela “nainki.”
^ Chibalu chakukumishaku chaNovember nichibalu chatachi chaDecember. Talenu Nsañu Jikwawu B15.
^ Hela “mbutu.”
^ Hela “mukanda.”
