Yeremiya 38:1-28
38 Dichi Shefatiya mwana kaMatani, Gedaliya mwana kaPashihuri, Yukali+ mwana kaShelemiya niPashihuri+ mwana kaMalikiya atiyili mazu ahosheleñayi Yeremiya kudi antu ejima, nindi:
2 “Yehova nahoshi nindi, ‘Muntu wejima wukushala mumusumba wukufwa nampoku yakabali, nanzala yakapwelendendi ninachipupu.*+ Ilaña muntu wukudihana* kudi aKalideya wukutwalekahu kuhanda nawa wumi windi wukwikala neyi chuma chinapuupiwu* nawa wakekala nawumi.’+
3 Yehova nahoshi nindi, ‘Chakadi nikujina, iwu musumba akuwuhana kudi amashidika amwanta waBabiloni, nawa yena wukuwutambula.’”+
4 Ayilolu amulejeli mwanta nawu: “Mwani iwu iyala amujahi,+ muloña awa mazu anakuhoshayi anakuzeyesha amashidika anashali muniwu mumusumba niantu ejima. Muloña iwu iyala hanakuyikeñela awa antu kuwundaku, ilaña nakuyikeñela yihuñu hohu.”
5 Mwanta Zedekiya wayakwili nindi: “Talenu! Wudi mumakasa enu, mwanta hanateli kwila chuma chidi chejima kulonda ayikañeshiku.”
6 Dichi amusendeli Yeremiya nakumunatila mwishima daMalikiya mwana kamwanta, dadiña muLubanza lwawaNhembi.+ Amuzenzumwininimu nanyonji. Haniyi mpinji mwishima mwadiña mwosi menji, mwadiña malowa hohu, dichi Yeremiya watachikili kwiñila mumalowa.
7 Ebedi Meleki+ mwini Etiyopiya, ntuñu* wamwitala* damwanta, watiyili nawu Yeremiya anamushi mwishima. Haniyi mpinji mwanta wadiña washakama kuChiisu chaBenjamini,+
8 dichi Ebedi Meleki wedikili mwitala* damwanta nakumuleja mwanta nindi:
9 “Eyi nkaaka yami mwanta, chuma chinamwiliwu kaprofwetu Yeremiya kudi awa amayala chatama nankashi! Anamunatili mwishima, nawa wukufwilamu nanzala yakapwelendendi, muloña mumusumba himunashalihu mankendiku.”+
10 Dichi Mwanta wamulejeli Ebedi Meleki mwini Etiyopiya nindi: “Sendaku amayala 30 kunu, muyi nakumukoka kaprofwetu Yeremiya mwishima henohu kanda afwi.”
11 Dichi Ebedi Meleki wasendeli awa amayala nawa ayili mwitala* damwanta mwiluña dadiña kwishina dachisweku chayuma yalema,+ anonelimu yibeli yataboka nimahina ataboka nawa amuzenzumwininiwu Yeremiya nanyonji mwishima.
12 Kufumahu, Ebedi Meleki mwini Etiyopiya wamulejeli Yeremiya nindi: “Mwani shaku oyu yibeli nimahina munkwaha jeyi ninyonji.” Yeremiya welili mwenomu,
13 dichi amukokeli Yeremiya nanyonji nakumufumisha mwishima. Nawa Yeremiya watwalekelihu kushakama muLubanza lwawaNhembi.+
14 Mwanta Zedekiya watemesheli antu nindi amuleti kaprofwetu Yeremiya kudi yena kuwiñililu wamuchisatu, wakwitala daYehova, dichi mwanta wamwilili Yeremiya nindi: “Kudi nsañu yinnakukeña kukwihula. Bayi wunsweka chuma hela chimuku.”
15 Kuhiñahu, Yeremiya wamwilili Zedekiya nindi: “Neyi nikuleji, chakadi nikujina wukunjaha. Nawa neyi nikuleji chiwatela kwila, wukuntiyilila wanyi.”
16 Dichi Mwanta Zedekiya wasanyikili kudi Yeremiya mukuswamujoka nindi: “Kwesekeja nachahandayi Yehova, watwinka iwu wumi,* hinukukujahaku, nawa hinukukuhana kudi awa amayala anakukeña kukujahaku.”*
17 Kufumahu, Yeremiya wamulejeli Zedekiya nindi: “Yehova, Nzambi wamazaza, Nzambi yaIsarela, nahoshi nindi, ‘Neyi wukudihana* kudi ayilolu amwanta waBabiloni, wukupulwisha wumi weyi,* nawa iwu musumba hiyakuwocha nakesiku, eyi niamwitala deyi mukupuluka.+
18 Ilaña neyi wukubula kudihana* kudi ayilolu amwanta waBabiloni, iwu musumba akuwuhana kudi aKalideya, dichi wena akuwocha nakesi,+ nawa eyi hiwukupuluka muchikasa chawuku.’”+
19 Dichi Mwanta Zedekiya wamulejeli Yeremiya nindi: “Inakuchiina aYudeya anakudibomba nawaKalideya, muloña neyi akunhana kudi wena, akuñila chatama.”
20 Ilaña Yeremiya wamulejeli nindi: “Hiyakukuhana kudi wenaku. Mwani, ovwahilaku izu daYehova muyuma yinnakukuleja, nawa yuma yikukuwahila, wukutwalekahu kuhanda.
21 Ilaña neyi wukukaana kudihana,* ichi dichuma chinammwekesheliyi Yehova nindi:
22 Tiyaña! Ambanda ejima ashala mwitala* damwanta waYuda anakuyitwala kudi ayilolu amwanta waBabiloni,+ nawa anakuhosha nawu,‘Amayala iwakuhweleleli* anakudimbi nawa anakwimiki mushindu.+
Anakojeji mwendu weyi kwiñila mumalowa.
Ichi anakufutaleli nakukutemuka.’
23 Nawa añodi jeyi ejima nianyaneyi awamayala anakuyitwala kudi aKalideya, nawa hiwukupuluka muchikasa chawuku, ilaña akukukwata kudi mwanta waBabiloni,+ nawa iwu musumba akuwocha nakesi muloña waneyi.”+
24 Dichi Zedekiya wamulejeli Yeremiya nindi: “Bayi wulejaku muntu wudi wejima iyi nsañuku, kulonda wubuli kufwa.
25 Neyi ayilolu atiya nawu wunahosheña nanami nawa enza kudi eyi nakukwila nawu, ‘Mwani, tuleji nsañu yiwamuleja mwanta. Bayi wutusweka chuma hela chimuku, nawa tukukujaha wanyi.+ Yumanyi yakulejayi mwanta?’
26 watela kuyakula neyi, ‘Namulombeña mwanta nami abuli kunfuntisha kwitala daYehonatani kulonda nakafwiliku.’”+
27 Chimwahitili mpinji, ayilolu ejima enjili kudi Yeremiya nakumwihujola. Wayilejeli yuma yejima yamulejeliwu kudi mwanta nindi ahoshi. Dichi hiyamuhoshelelihu izu dikwawuku, muloña kwosi watiyili chahanjekeleñawuku.
28 Kushika nihefuku datambwiliwu Yerusalema, Yeremiya watwalekelihu kushakama muLubanza lwawaNhembi.+ Wachidiña mwenomu nihampinji yatambwiliwu Yerusalema.+
Tumazu twaheshina
^ Hela “musoñu.”
^ MuchiHeberu, “wukuya.”
^ Hela “wukupuluka nawumi windi.”
^ Hela “chipañu.”
^ Hela “chilolu wamuchota.”
^ Hela “chipañu.”
^ Hela “chipañu.”
^ Hela “anakufwila wumi weyi.”
^ Hela “watuleñeleli iwu wumi.”
^ MuchiHeberu, “wukuya.”
^ Hela “wumi weyi wukutwalekahu kuhanda.”
^ MuchiHeberu, “kuya.”
^ MuchiHeberu, “kuya.”
^ MuchiHeberu, “Amayala akuwunda kweyi.”
^ Hela “chipañu.”
