Yeremiya 4:1-31
4 Yehova nahoshi nindi, “Eyi Isarela, neyi wukufunta,Neyi wukufunta kudi amiNawa neyi wukufumisha anzambi jeyi awuzondu kumesu ami,Hiwakekala itundukaku.+
2 Nawa neyi wukusanyika muchalala, muwuñanji nimukuloña neyi,‘Kwesekeja nachahandayi Yehova!’Nyuza yikatambwila nkisu kufuma kudi yena,Nawa yikadisambila mudi yena.”+
3 Muloña Yehova nayileji antu amuYuda nimuYerusalema nindi:
“Chipenu iseki diyabulahu dehi kudima,Nawa bayi mutwalekahu kukuwa munyiñaku.+
4 Daalamishenu enu aweni kulonda ayitiyeña kuwaha kudi Yehova,Nawa fumishenu tulomulomu twakunyichima yenu,+Enu antu amuYuda ninenu mwashakamaña muYerusalema,Kulonda kuzuwa kwami kubuli kubutuka neyi kesiNakubidima chakadi wakukwijima,Muloña wayuma yatama yimunakoñi.”+
5 Chishimunenu muYuda, nawa chibidikenu muYerusalema.
Bidikenu nikuvumisha luseñu mwituña dejima.+
Tambikenu nezu datiyakana nenu: “Pompenu,Nawa twayenu tutemukili munyisumba yakiñewa.+
6 Shimikenu chinjikijilu* chitalishi kuZiyona.
Keñakeñenu mwakuswama, nawa kwimana kuka-a nehi,”
Muloña inakuleta yihuñu kufuma kukabeta kakuchimunswa,+ yihuñu yayivulu nankashi.
7 Nediki neyi mutupa wunakufuma mwivunda dindi;+Mukakujilumuna nyuza nediki.+
Nafumi mwiluña dindi kulonda abalumuni ituña deyi kwikala chuma chakuhayama chikupu.
Nyisumba yeyi akayikisañana chikupu, chakadi muntu wakashalamu.+
8 Dichi, vwalenu yisasa,+Dishonenu* nikudila makumbu,Muloña kuzuwa kwaYehova hikunafumi hadi etuku.
9 Yehova nahoshi nindi, “Hanodu ifuku, mwanta wakakañanya kuhamuka,*+Niayilolu akakañanya kuhamuka;*Atupristu akafwa mutentu, nawa atuprofwetu akahayama.”+
10 Kufumahu nahosheli nami: “Mama eyi Yehova Mwanta Wabadika! Chalala wunayidimbi chikupu awa antu+ niamuYerusalema, chiwunahoshi neyi, ‘Mwakashakama mukuwunda,’+ henohu mpoku yakabali yidi hanyidiwu yetu.”*
11 Hanoyu mpinji awa antu niamuYerusalema akayileja nawu:
“Mpepela yitaata yikufuma kutupidi twakadi wushi twamuchinkalampataYikukomba mwana kawantu* jami wamumbanda;Hiyinakwinza nakupepa hela nakutookeshaku.
12 Mpepela yañovu yafumaña kunawa maluña chinayileja.
Ichi dinu nukubidika wunsompeshi wakuyisompesha.
13 Tiyenu! Wukwinza neyi mavu anvula,Nawa makalu indi adi neyi mpepela yeneni.+
Tuwalu twindi twatemuka kubadika ambuulu.+
Oyihuñu yitunamoni, muloña anatujilumuni!
14 Eyi Yerusalema, kosaku muchima weyi wutooki kukutama, kulonda akwamwini.+
Wakatwalekahu nayitoñojoka yatama kushika mpinjinyi?
15 Muloña izu dahoshelaña nsañu kuDani,+Nawa dabidikilaña yihuñu kumpidi jaEfuremu.
16 Yishimunenu kunyuza;Mubidikilenuju Yerusalema.”
“Akakutalatala* anakwinza kufuma kwituña dakwakulehi,Nawa akubidika mbila yanjita yikushikena nyisumba yaYuda.
17 Akwinza nakumulukukila kutubadi twejima neyi anhembi ahembaña isaña,+Muloña nadikañi nanami,”+ dichinahoshiyi Yehova.
18 “Njila jeyi niyilwilu yeyi akakuletelaju.+
Ochalula yihuñu yeyi,Muloña kunashiki chikupu kumuchima weyi!”
19 Oyihuñu yami,* yihuñu yami!
Inakutiya kukata chikupu kumuchima wami.*
Muchima wami wunakululuta mukachi kami.
Hinukutwesha kumwenaku,Muloña ami* natiyi chivumina chaluseñu,Kabobobu kanjita.*+
20 Kunatiyakani yihuñu yayivulu,Muloña ituña dejima anadikisañani.
Matenti ami anayikisañani mukukasumwisha,Mahina akwitenti dami anayikisañani mukapinji kantesha.+
21 Nukutwalekahu kumona chinjikijilu* kushika mpinjinyi,Nakutwalekahu kutiya chivumina chaluseñu?+
22 “Muloña antu jami asupa;+Hiyashaña maana kudi amiku.
Hiyanyana asupa, hiyatiyishishaña yumaku.
Ababala* nankashi mukwila yuma yatama,Ilaña hiyeluka kwila yuma yayiwahiku.”
23 Namweni ituña, kutala! kwosi jidimu nawa dashala kwamahembi.+
Natalili mumawulu, nawa himwadiña cheñi chejejiku.+
24 Namweni mapidi, kutala! anakukanka,Nitupidi tunakunyinkesha.+
25 Chinelili nami nitali! hinamwenihu muntuku,Nawa atuda amuluzwizu ejima adiña atemuka dehi.+
26 Chinelili nami nitali! namweni itempa danyikaabu dinabalumuki chinkalampata,Nawa nyisumba yadu anayihumuni yejima.+
Chadiña ñana muloña waYehova,Muloña wakuzuwa kwindi kwasweja.
27 Muloña Yehova nahoshi nindi: “Ituña dejima dakashala kwamahembi hohu,+Ilaña hinakadijilumuna chikupuku.
28 Muloña wachumichi ituña dakadila,+Nawa mawulu akeyila.+
Muloña ami nahoshi dehi, nafuukuli dehi,Nawa hinakahimpa yitoñojoka yami* hela kubula kwilamuku.+
29 Muloña walushindu lwawakakwendela hatuwalu niakakwasa namata anyikunji,Antu mumusumba wejima anakutemuka,+
Anakwiñila mumavunda,Nawa anakukandama hamalola.+
Musumba wejima anawushiyi chisayikila,Nawa kwosi muntu hela wumu wunakushakamamuku.”
30 Hanu dinu chineli anakukisañani dehi, wukwila ñahi?
Wadiña nakuvwala yakuvwala yichinana nge-e,Nakudikudeka eyi aweni yingelingeli yawuru,Nikuwahisha mesu eyi nawulombu wiyila.
Ilaña kudiwahisha kweyi kwamukunkulwayi,+Muloña owu akutiyilaña mpwila yawuvumbi anakukaani;Ichi dinu anakukeña kukujaha.*+
31 Muloña natiyi mutetu neyi wamumbanda wakata,Yihuñu neyi yatiyaña mumbanda wunakuvwala mwani watachi,Mutetu wamwana kaZiyona wamumbanda wunatwalekihu kusaakwila.
Nakuhosha iku nololi makasa indi nindi:+
“Oyihuñu yinnamoni, ami* nazeyi muloña wawakakujahana!”
Tumazu twaheshina
^ Hela “chishimi chachinjikijilu.”
^ Hela “Etenu hantulu jenu.”
^ MuchiHeberu, “muchima.”
^ MuchiHeberu, “muchima.”
^ Hela “henohu mpoku yakabali yinawani mawumi etu.”
^ Iyi hinhoshelu yankinji, hadaha yakumwekeshelamu luwi niwushona.
^ Hela “Anhembi.”
^ MuchiHeberu, “nyijiñwa yami.”
^ MuchiHeberu, “mumbañu jamuchima wami.”
^ Hela “wumi wami.”
^ Hela hekwawu, “Kubidika mbila yanjita.”
^ Hela “chishimi chachinjikijilu.”
^ Hela “Akweti maana.”
^ Hela “kuditoñesha.”
^ Hela “anakufwila wumi weyi.”
^ Hela “wumi wami.”
