Yeremiya 41:1-18
41 Mukakweji kamu 7, Ishimayeli+ mwana kaNetaniya, Netaniya mwana kaElishama owu wadiña hakachi kawantu atela kuswana wanta* nawa wahadi antu jamwanta alema, wenjili nawamayala 10 kudi Gedaliya mwana kaAhikami kuMizipa.+ Hadiileñawu yakuda hamu muMizipa,
2 Ishimayeli mwana kaNetaniya niamayala 10 adiñayi nawu anyamukili nakumutapa Gedaliya mwana kaAhikami, Ahikami mwana kaShafani nampoku yakabali. Dichi wajahili muntu atondeliwu kudi mwanta waBabiloni nindi ataleña ituña.
3 Ishimayeli watapili niaYudeya ejima adiña naGedaliya muMizipa, kushilahu niamashidika awaKalideya adiña kwenoku.
4 Hefuku damuchiyedi kufuma hamujahiliwu Gedaliya, henohu muntu hela wumu kanda eluki,
5 kwenjili amayala 80 kufuma kuShekemi,+ kuShilo+ nikuSamariya.+ Wevu wawu wadiña wakutewula, yakuvwala yawu yadiña yataboka, iku anaditapoli awenawu+ nawa adiña nanyilambu yambutu nimanaña evumba dadiwahi+ mumakasa aleteleñawu kwitala daYehova.
6 Dichi Ishimayeli mwana kaNetaniya wafumini kuMizipa nakuya nakuyikinkilila, wayileña iku nakudila. Chayiwaniniyi, wayilejeli nindi: “Tuyenu kudi Gedaliya mwana kaAhikami.”
7 Ilaña chashikiliwu mumusumba, Ishimayeli mwana kaNetaniya hamu nawantu jindi wayijahili nawa wayinatilili mwishima.
8 Ilaña hakachi kawu hadiña amayala 10 amulejeli Ishimayeli nawu: “Bayi wutujahaku, muloña tukweti nkalaña jatidiku, bali, manji niwuchi jakusweka mwisaña.” Dichi wena hayijahilili hamu nawamana kwawuku.
9 Kufumahu, Ishimayeli wanatilili mwishima deneni yibimbi yejima yawamayala ajahiliyi, dapundiliwu kudi Mwanta Asa muloña waMwanta Bayasha wakuIsarela.+ Idi ishima didenzesheliyi Ishimayeli mwana kaNetaniya nayibimbi yawamayala ajahiliyi.
10 Ishimayeli watwalili antu ejima amuMizipa muwunkoli,+ kushilahu nianyana kamwanta awambanda niantu ejima ashalili muMizipa, owu ashiliyi Nebuzaradani mukulumpi wawatulama mumakasa aGedaliya+ mwana kaAhikami. Ishimayeli mwana kaNetaniya wayitwalili muwunkoli nakuya nawu kudi aAmoni.+
11 Chelili Yohanani+ mwana kaKareya niakulumpi ejima awamashidika adiñayi nawu atiyi yuma yatama yejima yakoñeliyi Ishimayeli mwana kaNetaniya,
12 asendeli amayala ejima nakuya nakuzuña naIshimayeli mwana kaNetaniya, nawa amuwanini kwakwihi namenji amavulu* muGibeyoni.
13 Antu ejima adiña naIshimayeli azañaleli chamumweniwu Yohanani mwana kaKareya niakulumpi ejima awamashidika adiñayi nawu.
14 Dichi antu ejima atwalileñayi Ishimayeli muwunkoli kufuma kuMizipa+ abalumukili nakufunta naYohanani mwana kaKareya.
15 Ilaña Ishimayeli mwana kaNetaniya nawantu jindi awamayala 8 amutemukili Yohanani nakuya kudi aAmoni.
16 Yohanani mwana kaKareya hamu nawakulumpi ejima awamashidika adiñayi nawu asendeli antu ejima kufuma kuMizipa, apulwishiliwu kuchikasa chaIshimayeli mwana kaNetaniya hanyima yakwila najahi dehi Gedaliya+ mwana kaAhikami. Afuntishili amayala, amashidika, ambanda, anyana niayilolu amuchota kufuma kuGibeyoni.
17 Dichi ayili nakushakama mwiluña dakukaamina daKimihami kwakwihi naBetelemi,+ nakukeña kuya kuEjipitu+
18 kuchiina aKalideya. Ayitiyileña woma, muloña Ishimayeli mwana kaNetaniya wamujahili Gedaliya mwana kaAhikami, atondeliwu kudi mwanta waBabiloni nindi ataleña ituña.+
