Yeremiya 44:1-30
44 Izu denjili kudi Yeremiya kutalisha hadi aYudeya ejima ashakamineña mwituña daEjipitu,+ adiña nakushakama muMigidoli,+ Tapanesi,+ Nofi,*+ niiluña daPatirosi,+ nawu:
2 “Yehova wamazaza, Nzambi yaIsarela, nahoshi nindi, ‘Munamoni yihuñu yejima yinaleteli hadi Yerusalema+ nihanyisumba yamuYuda, nawa dalelu yinashali kwamahembi, chakadi muntu wunashalimu.+
3 Muloña wayuma yatama yakoñeliwu nakunhilisha nanochu chayiliwu nakulambula nyilambu+ nikukalakela anzambi acheñi abulili kwilukawu, enu hela ankakulula jenu.+
4 Natwalekelihu kutemesha ambuñami ejima atuprofwetu kudi enu, nayitemesheleña kapampa kakavulu,* nakuyileja nami: “Mwani bayi mwila ichi chuma chawuzondu chinahelaku.”+
5 Ilaña hiyatiyilili hela kuteñeleka itu dawu nakuleka yuma yatama kuhitila mukubula kulambula nyilambu kudi anzambi acheñiku.+
6 Dichi nahuñunwini kuzuwa kwami nikulendumuka kwami nawa kwocheli munyisumba yamuYuda nimunyikwakwa yamuYerusalema, nawa yajilumukili nakushala kwamahembi, neyi chiyidi dalelu.’+
7 “Nawa Yehova, Nzambi wamazaza, Nzambi yaIsarela, nahoshi nindi, ‘Muloñadi chimunakudiletela enu aweni* iyi yihuñu yasweja, chakwila iyala wejima nimumbanda, mwana nimukeki akajiyi muYuda, nakujilumuka wejima wenu?
8 Muloñadi chimukunhilishila nanyidimu yamakasa enu nakulambula nyilambu kudi anzambi acheñi mwituña daEjipitu mumunayi nakushakama? Mwakajiya nawa nyuza yejima yahamaseki yakayitenaña hakushiñana nawa akayisawulaña.+
9 Komana munavulameni nyidimu yatama yawankakulula jenu, nyidimu yatama yawanyanta amuYuda+ ninyidimu yatama yawañodi jawu,+ kushilahu ninyidimu yenu yatama ninyidimu yatama yawañodi jenu,+ yimwakoñeleli mwituña daYuda nimunyikwakwa yamuYerusalema?
10 Kushika nidalelu hiyanadizoziku, hiyanantiyi woma+ hela kulondela nshimbi jami nikuleja kwami kunayinkeli enu niankakulula jenuku.’+
11 “Dichi, Yehova wamazaza, Nzambi yaIsarela, nahoshi nindi, ‘Inakufwila kuyiletela enu yihuñu, kulonda nijilumuni aYuda ejima.
12 Nawa nakasenda ashalahu amuYuda afwilileña kuya kwituña daEjipitu nakushakama kwenoku, nawa wejima wawu akajiya mwituña daEjipitu.+ Akafwa nampoku yakabali nawa akajiya nanzala yakapwelendendi; kutachikila kudi muntu wabula kulema nakushika kudi walema, akafwa kumpoku yakabali ninanzala yakapwelendendi. Dichi akekala ishiñu, chuma chakuhayama chikupu, ashiñewa nawa asawuka.+
13 Nakababesha antu anakushakama mwituña daEjipitu neyi chinababesheli Yerusalema, nampoku yakabali, nanzala yakapwelendendi ninachipupu.*+
14 Nawa ashalahu amuYuda anayi nakushakama mwituña daYuda hiyakatemuka hela kupuluka nakufunta kwituña daYudaku. Akafwilaña kufunta nakushakama kwenoku, ilaña hiyakafuntaku, chiña hohu ayipuluka antesha.’”
15 Amayala ejima owu elukili nawu añodi jawu anakulambula nyilambu kudi anzambi acheñi niambanda ejima emeni kwenoku, owu adiña izaza deneni, kushilahu niantu ejima ashakamineña mwituña daEjipitu,+ muPatirosi,+ amwakwili Yeremiya nawu:
16 “Hitukutiyilila izu diwunatuleji mwijina daYehovaku.
17 Ilaña, chakadi nikujina, tukwovwahila izu dejima dinahoshi kanwa ketu, kulambula nyilambu kudi Mwanta waMumbanda Wewulu* nikumuhuñunwina nyilambu yavinyu+ neyi chitwelileña etu, ankakulula jetu, anyanta jetu niayilolu jetu munyisumba yamuYuda nimunyikwakwa yamuYerusalema hitwadiileña yakuda nakwikuta nikuhanda chiwahi, hitwabulili kumonahu yihuñu yidi yejima.
18 Kufuma hitwalekeli kulambula nyilambu kudi Mwanta waMumbanda Wewulu* nikumuhuñunwina nyilambu yavinyu, hitukweti chuma hela chimuku nawa tunajiyi nampoku yakabali ninanzala yakapwelendendi.”
19 Ambanda abombelelihu nawu: “Nawa hitwalambwileña nyilambu kudi Mwanta waMumbanda Wewulu* nikumuhuñunwina nyilambu yavinyu, komana anfumu jetu hiyatwitejeli nawu tutuñeña mankendi atowala akulambula, akutuña neyi chamwekeneñayi nikumuhuñunwina nyilambu yavinyuku?”
20 Kuhiñahu, Yeremiya walejeli antu ejima, amayala niañodi jawu niantu ejima ahosheleña nayena, nindi:
21 “Nyilambu yenu, yawankakulula jenu, yawanyanta jenu, yawayilolu jenu niyawantu amwituña yimwalambwileña munyisumba yamuYuda nimunyikwakwa yamuYerusalema,+ Yehova wayanukili nawa yenjili kumuchima windi!
22 Nkumininaku, Yehova walekeli kudiwula yaaku yenu yatama niyuma yawuzondu yimwakoñeleña, nawa ituña denu dekalili mahembi, chuma chakuhayama chikupu nawa ishiñu, chakadi muntu washalilimu, neyi chididi dalelu.+
23 Chineli munakulambula iyi nyilambu nawa munamuvulumuni Yehova nanochu chimunakubula kwovwahila izu daYehova nikubula kulondela nshimbi jindi, kuleja kwindi niyanukishu yindi dichinaleteshi iyi yihuñu yinzi hadi enu, neyi chichidi dalelu.”+
24 Yeremiya watwalekelihu kuhosha nawantu ejima niambanda ejima nindi: “Enu aYuda ejima adi mwituña daEjipitu, tiyenu izu daYehova.
25 Yehova wamazaza, Nzambi yaIsarela, nahoshi nindi, ‘Yuma yimunahoshi enu niañodi jenu natunwa twenu, munayishikiji namakasa enu, muloña munahoshi nenu: “Chakadi nikujina, twakela mutunakani mwakumulambula Mwanta waMumbanda Wewulu* nyilambu nikumuhuñunwina nyilambu yavinyu.”+ Mwamweni enu ambanda mwakela mumunakani nawa mwakazata kwesekeja nayikaninu yenu.’
26 “Dichi enu aYuda ejima munakushakama mwituña daEjipitu, tiyenu izu daYehova: ‘“Nasanyiki mwijina dami dabadika,” dichinahoshiyi Yehova, “nami ijina dami akaditenahu cheñi wanyi hakusanyika, kudi antu ejima amuYuda+ mwituña dejima daEjipitu ahoshaña nawu, ‘Kwesekeja nachahandayi Yehova Mwanta Wabadika!’+
27 Ichi inakuyitala kulonda niyileteli yihuñu bayi yuma yayiwahiku;+ antu ejima amuYuda mwituña daEjipitu akujiya nampoku yakabali ninanzala yakapwelendendi, sampu ejima anamani.+
28 Antu antesha hohu diwu akupuluka kumpoku yakabali nakufuma kwituña daEjipitu nakufunta kwituña daYuda.+ Kufumahu, ejima ashalahu amuYuda ayili nakushakama mwituña daEjipitu akwiluka izu danyi dinashikijewi, dami hela dawu!”’”
29 “Yehova nahoshi nindi, ‘Nawa ichi dichinjikijilu chimukwilukilaku nenu nukuyibabesha mudinu iluña, kulonda mwiluki nenu mazu ami inakanini akuyiletela yihuñu mwamweni akushikijewa.
30 Yehova nahoshi nindi: “Inakumuhana Fwaru Hofira, mwanta waEjipitu, muchikasa chawayilumbu jindi nichanowu anakukeña kumujaha,* neyi chinamuhanini Mwanta Zedekiya waYuda muchikasa chaMwanta Nebukaneza* wakuBabiloni, wadiña chilumbu chindi nawa wakeñeleña kumujaha.”’”*+
Tumazu twaheshina
^ Hela “Memfisi.”
^ MuchiHeberu, “kuhinduka nabudidi nakuyitemesha.”
^ Hela “mawumi enu.”
^ Hela “musoñu.”
^ Hinkumbu yanzambi wamumbanda kwadifukwileña aIsarela akakusekesha; hadaha nzambi wamumbanda walusemu.
^ Hinkumbu yanzambi wamumbanda kwadifukwileña aIsarela akakusekesha; hadaha nzambi wamumbanda walusemu.
^ Hinkumbu yanzambi wamumbanda kwadifukwileña aIsarela akakusekesha; hadaha nzambi wamumbanda walusemu.
^ Hinkumbu yanzambi wamumbanda kwadifukwileña aIsarela akakusekesha; hadaha nzambi wamumbanda walusemu.
^ Hela “anakufwila wumi windi.”
^ MuchiHeberu, “Nebukareza,” hinsonekelu yaambukaku.
^ Hela “anakufwila wumi windi.”
